Rut 1 - Maktub Ta Kumkajir

Kamkɔl so dɔ ngekɨɓet lo Elimelek

¹ Kaglot lo ngégangtag ye, ɓo kɨbobe so kam dɔning Israelt. De mad kɨ Betlehemt kɨ Juda aw dɔning Moabt nat kɨ nẽn kɨ nganɨn kɨdɨngãg joo.

² Tɔ de'n non i Elimelek, tɔ nẽa i Naomi, na ta ngana kɨjoo i Maklon kɨ Kiljon. Ĩn de kɨ Eprata kɨ ɓe Betlehemt kɨ Juda. Teen dɔning Moabt, hɔn londɨ tit nu.

³ Elimelek kɨ ngaw Naomi oi, na nyàa kɨ ngana kɨdɨngãg joo.

⁴ Ngang kɨjoo'n non taan dekɨdẽg ku Moabiagt, tɔ kɨkɨɗa i Orpa, tɔ kɨmad i Rut. Ndɨn nõbe asɨ ɓal kɨlah.

⁵ Goot gog Maklon kɨ Kiljon tujoo oin. Naomi ndɨ kanj nganɨn kɨdɨngãg kɨjoo kɨ ngawɨn tu.

Naomi tel kɨ dɔningt kɨ Israel kɨ Rut

⁶ Kamla ndɔ mad Naomi, oo dɔ hoita kɨmaj kad Bɨraɓe gen girrdeg lon ad ad'd nyasa ɗago ron, ɓai nat kɨ mumɨng kɨjoo dɔning Moabt.

⁷ Ɓai lot'n hɔlondɨt nõ nat kɨ mumɨn kɨdẽg kɨjoo, son ɗobo kɨta tel kɨ dɔning Judat gog.

⁸ Naomi elta kɨ mumɨng kɨjoo an: Tajigla nganɨm kɨdẽ, kɨ dekɨɗen tel kɨ ɓe lo kõn gog. Kɨ Bɨraɓe ɔjsɨ kamkẽ tit'n i ɗan ne kɨ nganɨmg'n oin kɨ mĩ ho.

⁹ Kɨ Bɨraɓe ad dekɨɗen ngah ngaw taa ho kɨ ngah lo taakò kam kujɨnt ho. Kamla Naomi hɔd kɨ ront, kamla dekɨdẽg kɨjoo'n non unɨn ndid kɨ dõ nõn ne.

¹⁰ Na elɨn Naomi anan: Be al, j'a j'aw nat sei ro girrdegt loi.

¹¹ Naomi turd an: Nganɨmg kɨdẽg, i telɨn kɨ ɓe kɨ ro ngesɨgt. I ndig kawɨn sem kɨtɔɗi a? Mĩ kɨ ngang kammt tɔ kad telɨn ngawsɨg gog ɓaitɔ ɔ?

¹² Nganɨm kɨdẽg, i telɨn, awɨn lo losɨ kɨta kagɨm tɔi dɔ taa ngaw ta. Ke neni m'an: Mĩ kɨ nyandahkamdɔt, na m'asɨ ngah ngaw ndɔ ne,

¹³ ke m'a m'ooj ngan kɨdɨngãg kaa ne, a i ngoond mbã kad tɔgɨn, na a i mbetɨn ta ngaw kɨɗang a? Be al, nganɨm kɨdẽg, kamkil lom i ngãibe tɔi kɨlosɨ kɨta ji Bɨraɓe nda ɔjɨm.

¹⁴ Kamla unɨn ndid kɨ dõ nõn ne ɓaitɔ, na Orpa hɔ mumɨn kɨ ront kamla nyad ne tel aw ro noojɨnt gog. Na Rut taa ne, tĩyan na Kɨ Naomi.

¹⁵ Ta ne Naomi el Rut an: Oo nii tel aw ro girrdegt lon, aw ro luwahgt lon tɔ, na ĩ kaa ne, maj kad i ɗa tita, i tel aw ɓe.

¹⁶ Na Rut tur an: Ot tuɓam kɔ goit kad M'nyai, na m'tel m'aw ɓe gog. Lokɨɗah a awt a ne, m'a m'awt ho. Lokɨɗen kɨ a i ndɨt a ne, m'a m'ndɨt tɔ ho. Girrdeg loi a i girrdeg lom, Luwah loi a i Luwah lom tɔ,

¹⁷ Lokɨɗah a oi tit a ne, m'a m'oi lot'n non kad dubmɨnt ho. Kɨ Bɨraɓe nda ɔjɨm ĩla m'ɗa titbe al a ne, koi kɨɗabe koon la a gangɨm nat sei ye.

¹⁸ Lon Naomi oo ad Rut ire kamɨn ngang kɨ n'aw sen nat ye, nya takela kad tel aw ɓe ro noojɨngt gog.

¹⁹ Awɨn tujoo mbã teen Betlehem. Lon teen Betlehemt ye, ad deg kɨ kam ɓebot kɨtaagbe rod ndad yatata kɨ tatɔd. Dekɨdẽg elɨn na anan: I Naomi ale?

²⁰ Eld an: Ot kunmɨn Naomi, ad i dekɨdẽ kɨ ngeronel. Na i kunmɨn Mara, ad i ngerokat, kɨta Ngetɔgtube ɗa sem nya kɨ katbang.

²¹ Lon'n ɓai dɔning koojɨmt ye m'aw kɨ nyag ngãibe, na tajigla Bɨraɓe adɨm m'tel jim kari. I kunmɨn Naomi kɨtɔɗi a? Kɨtɔ Bɨraɓe nda ɔjɨm, Ngetɔg tube ɗa sem nyakɨto.

²² I titbe la Naomi ɓain dɔningt Moabt telɨn kɨ ɓe koojɨnt nat kɨ mumɨn Rut'n i dekɨdẽ kɨ Moab. Aw teen Betlehemt kaglo ja nyako ɔrjt.