Romag 7 - Maktub Ta Kumkajir

Ngétaa ta lo Krist ĩn girr tɔgt lo mberkɨnda al

¹ Ngankom, m'ndɨ m'elsɨ ta tit'n ngéger mberkɨnda, i gerɨn kad mberkɨnda aw kɨ tɔg dɔ det lon ndɨn kɨ dɔndõ ale?

² Titbe dekɨdẽ kɨ ngengaw i kɨdɔnat kɨ ngawɨn kɨgo mberkɨndat lon ngawa ndɨn kɨdɔdõ, na ĩla ngawa oi a ne, i girr mberkɨndat'n dɔa nat kɨ ngawa al ta.

³ Ĩla ngawa ndɨ kɨ dɔn dõ ɓaitɔ, na tel nẽ de mad kɨɗang a ne, a kunɨna ngeɗangaw, na ĩla ngawa oi a ne, i kɨ nyadõ dɔ mberkɨndat, a taa de mad kɨɗang kari, mberkɨnda ɔg al, i ngeɗangaw al.

⁴ Ĩn kaa, i titbe kɨtɔsɨ ngankom, mberkɨnda lo Moij aw kɨ tɔg dɔsɨt al tajigla ĩn kɨ lana nat kɨ ngaw mad, ad ĩn kɨ lo Krist'n Luwah ada ɓai ku ngekoit, kɨtakad i teen kɨ kɨlag kɨmaj maj kɨta Luwah.

⁵ Kɨtɔ lon maɗi kɨ ndɨ kɨ ɗa nyag kɨgo jindahjt ye, nyurkõg kɨmajal'n mberkɨnda ndud ɗan kɨla kam dãrojt kɨtaagbe ad kɨ ɗa kɨlag kɨmajal'n a awɨn sej kɨ kɔit.

⁶ Maɗi mberkɨnda hɔj ɓert lon. Na tajigla jĩ kɨ koi dɔ tat lo mberkɨnda kɨta Luwah taanyàj dõ kad kɨ ɗa kɨlaɓer lon, kɨ go ɗob kɨ kij'n Ndila ɔj'j. Na kɨ ndɨ kɨ ɗa kɨlaɓer loa kɨgo mberkɨndat lo Moij kɨ ndang kɨ maɗi al.

De i girr tɔgt lo majal.

⁷ Ta ye, ka j'anɗi. Mberkɨnda lo Moij i nya kɨmaj ale? I titbe al. Ĩla mberkɨnda goto a ne, m'a m'ger majal al, kɨta ĩla mberkɨnda el an: A i ɗa kumndà al a ne, ni m'a m'ger majal kɨ tɔa i kumndà al.

⁸ Na lon mberkɨnda ɔjɨm an majal la ten ye, majal ngah ɗob ndu kumndà kɨ dang dang kammt. Kɨ kanj mberkɨnda, majal i nya kɨ koi.

⁹ Maɗi, lon m'gerɨn mberkɨnda al ɓaitɔ ye, m'oo m'an m'ndɨ kɨ dɔm dõ, na lon mberkɨnda ɗe ye, tɔsɨ majal ndool kammt ad m'oo koim.

¹⁰ Mberkɨnda'n Luwah ndah kad ad deg kumkajir ye, m'oo ndɨ aw kɨ deg koit.

¹¹ Kɨtɔ lon majal ngah ɗɔb kɨtakul mberkɨnda ye, goolɨm na tɔlɨm kɨtakula tɔ ho.

¹² Mberkɨnda lo Moij i kɨ kunjɗang, ndikun kɨɗen kɨ kamt i kɨkunjɗang ho, i denesew ho, na maj tɔ.

¹³ Ad nya'n i kɨmaj ye, tel nyakoim a? I titbe al, na majal la tel nyakoim ye, majal un nya kɨmaj la tɔlmɨn, tee kɨ dɔn kammt, ad m'gera maj, i majal. Titbe la majal kɨtakul mberkɨnda tel nya kɨmaj nyat kɨmajal tɔi kɨtaagbe.

Majal õɓe dɔ det

¹⁴ Kɨ ger maj, mberkɨnda i kɨgo Ndilt, na mĩ taa ne, mĩ de kɨgo dãrot, mĩ kɨ ndugo kɔ tit ɓer be girr tɔgt lo majal.

¹⁵ Kɨtɔ nya'n m'ndɨ m'ɗa nõ m'ger girra al: nya'n m'ndɨ m'ɗa ye, i nya kɨ m'ndig ɗa al, na nya'n m'ndig al nõ la m'ndɨ m'ɗa ye.

¹⁶ Ĩla m'ndɨ m'ɗa nya'n m'ndig al a ne, m'ger kad mberkɨnda i nya kɨmaj.

¹⁷ Na tajigla i mĩ hã m'ndɨ m'ɗa nya'n non al, na majal'n ndɨ kammt la ndɨ ɗa ye.

¹⁸ M'ger ɓet nya kɨmaj goto kammt, ad i kam dãromt. Rota, m'ndig ɗa maj, na tɔg ɗamaj la goto ye.

¹⁹ Kɨtɔ ɗamaj ĩn hã m'ndig ɗa ye m'ɗa al, na majal'n hã m'ndig ɗa al nõ la m'ɗa ye.

²⁰ Ĩla m'ndig m'ɗa nya'n m'ndig al a ne, i mĩ hã m'ndɨ m'ɗa titbe al, na majal'n ndɨ kammt la i ngeɗaa ye.

²¹ Tɔgg ĩn joo kammt, lon m'ndig ɗa maj a ne, i majal koon la m'ɗa ye.

²² Rom kɨ keme ndig tel ron go mberkɨndat lo Luwah.

²³ Na m'oo tɔg mad kɨɗang kam dãromt. Tɔgɨn non ndɨ ɗɔɔ kɨ mberkɨnda'n kamm ndig tel ron goat, ndɨ hɔm ɓert girr tɔg majalt kan ndɨ kam dãromt nõ.

²⁴ Mĩ de kɨdangt kɨtakul dãrom'n ndɨ aw sem kɨ koit. Nõ a ug ɔrrɨm kam dãrot 'nten a?

²⁵ M'ndɨ m'ɗa mersi Luwah kɨta ug ɔrrɨm ta koit kɨtakul Jeju Krist kɨ Bɨraɓe loj. Titbe tɔ la, mĩ kɨdɔm, kɨ ta gaam, m'ndɨ m'tel rom go mberkɨndat lo Luwah, na kɨgo tõt lo dãrom, m'ndɨ m'ɗa ɓer lo tɔg lo majal.