Romag 6 - Maktub Ta Kumkajir

Jĩ kɨ koi dɔ majalt kad kɨ ndɨ kumkajir kam Krist't

¹ Kɨtɔ 'nten, ka j'an ɗi ta? J'a kɨ ndɨ kɨ kam majalt kad kamkẽ lo Luwah ton mbujmbuj a?

² Ãã i titbe al. Jĩ deg kɨ koi dɔ majalt, j'asɨ ndɨ kɨ dɔj dõ kam majalt gog al ta.

³ Kamsɨ oi dɔ kad jĩ tube'n ɗajɨn baptem kam Krist't ye, i kam koiat hã ɗajɨn baptem ale?

⁴ Kɨtɔ 'nten dubjɨn nat sia kɨtakul baptem kam koiat, kɨtakad kɨ ndia kam kumkajirt kɨ kij, tit'n Krist ɓain ku ngékoit, kɨtakul tɔg kɨ tɔitɔi lo Bɔw.

⁵ Na ĩla jĩ sia kam dãrot kɨkɨɗa a ne, jĩ kɨ koi nat sia, titbe Luwah a adj kɨ ɓai lo koit nat sia ho.

⁶ Ad kɨ ger nya 'nten maj, lon Krist oi kagdosɨt, Luwah ga konde loj kagdosɨt nat sia, kad kɨɗaɓer lo majal gog al ta.

⁷ Kɨtɔ de'n oi dɔ majalt ye, majal aw kɨ tɔg dɔat al.

⁸ Na ĩla j'oi nat kɨ Krist a ne, kɨ ger kɔikɔi, j'a kɨ ndɨ kumkajir nat sia ho.

⁹ Kɨ ger Luwah ad Krist ɓai ku ngékoit, Krist asɨ koi gog al ta.

¹⁰ Koin Krist oi nõ, oi kɨtɔ majal lo deg nja kɨɗabedo, tajigne ndia kumkajir, i kɨta Luwah la ndɨn ye.

¹¹ Titbe tɔ ĩn, kɨ oon rosɨ tit deg kɨ koi dɔ majalt, na kɨ oon rosɨ degt kɨ ndɨn kɨ dɔ dõ kɨta Luwah nat kɨ Krist Jeju.

¹² Kɨtɔ 'nten, ot kadɨn majal õɓe dɔ dãrosɨt kɨ koi nõ, ad i telɨn rosɨ go nyurkõgt loa.

¹³ Ot lan rosɨ girr tɔg majalt kad tel nyaɗakɨla lo nyaɗa kɨgoɗoɓt al. Na adɨn rosɨ Luwah tit ngékumkajɨr ku ngékoit. Adɨn rosɨ kad tel nyaɗakɨla lo nyaɗa kɨdenesew.

¹⁴ Taa ne, majal a õɓe dɔsɨt al, kɨta ĩn girr mberkɨndat al, na ĩn girr tɔg kamkẽt lo Luwah.

Ɓerg lo Luwah ĩn ngéɗanya kɨdenesew

¹⁵ Ɗi kɨ be? J'a kɨ ɗa majal kɨta ndɨn kɨ ndɨ girr tɔgt lo kamkẽt lo Luwah, na girr tɔgt lo mberkɨnda al la, j'a kɨ ɗan majal yo? I titbe al.

¹⁶ I gerɨn nya 'nten ale? Ĩla i ndɨ lan dɔsɨ girr nyat mad kad i telɨn rosɨ go tat loa a ne, a ĩn ɓerg lo majal kɨ a tee sesɨ koit. Na ĩla i telɨn rosɨ go tat lo Luwah a ne, a ĩn ɓerg kɨdenesew nõ Luwaht.

¹⁷ Na ad kɨ ɗan mersi Luwah. Kɨtɔ ke maɗi in ɓerg lo majal kaa ne, i tajigla telɨn rosɨ go nyandoot kɨ rota'n i taan.

¹⁸ Luwah taa nyasɨdõ ta ɓert lo majal kɨ ɗa kad i ɗan nya kɨdenesew.

¹⁹ M'un nyakɔj kɨ dɔ ɓergt m'elɨn ta kɨta kĩsɨ deg kɨ dɔsɨ un nya Kanag al. Maɗi i lan rosɨ girr tɔgt lo yerr kɨ ɗa kɨɗagootal, ad majal losɨ bɨlan kɨ dɔtdɔt. Na tajigla i telɨn rosɨ ɓert lo nyaɗa kɨdenesew kɨtakad ĩn kɨjaɓat.

²⁰ Kɨtɔ lon ĩn ɓerg lo majal ye, nyaɗa kɨdenesew aw kɨ tɔg dɔsɨt al.

²¹ Kaglot'n non ye, i ngahn ɗi dɔ nyaɗasɨt a? Nyag'n non rosɨ sɔlsɨ dɔt tajigla. Kɨtɔ dɔngoi nyag'n non i koi.

²² Na tajigla ĩn kɨ ta nya dõ dɔ majalt, i telɨn ɓerg lo Luwah, i ndɨ i teen kɨ kandsɨ kɨmaj ad i ro kɨjaɓat'n dɔngoia i kumkajir kɨ mbãkɨnõt.

²³ Kɨtɔ nyaba majal i koi, na kadkari'n Luwah ad kɨgo kamkẽt lon i kumkajir kɨ mbãkɨnõt nat kɨ Krist Jeju kɨ Bɨraɓe loj.