Romag 5 - Maktub Ta Kumkajir

Jeju laj nooj nat kɨ Luwah

¹ Tit kan jĩ kɨ kɔrrtadɔt kɨtakul kadkam ye, tajigla kɨ ndɨn kɨ lapia kɨ Luwah kɨtakul Bɨraɓe loj Jeju Krist.

² Kɨtakul kadkamj Jeju la kɨ ngahn lo kand kam kamkẽt lo Luwah, lot'n kɨ ɗat bijir tajigla ye. Na kɨ ndɨ kɨ gaburo kɨ kam kɨndahdɔ majt kɨ tɔitɔi lo Luwah.

³ Na ĩ nõ kɨɗabe al, na kɨ ndɨ kɨ gaburo dɔ kamkɔlt'n ɗa sej kad kɨ ndoo hɔtɔgba.

⁴ Lon kɨ hɔtɔgjba, j'a kɨ tee dɔ nyaɗat kɨro, nyaɗakɨro tɔ a adj kam kɨndahdɔt.

⁵ Kam kɨndahdɔt ndɨ goolj al, kɨta Luwah ũ tar lon ngarkamjt kɨtakul Ndil Kɨkunjɗang'n adj.

⁶ Kɨtɔ lon tɔgj goto ɓaitɔ ye, Jeju ɗe oi kɨtaj jĩ ngéɗamajalg, kɨ kaglo'n Luwah ĩ kɨɓe ɔj.

⁷ Lo gang lam kad de mad oi kɨta de kɨdenesew. Na maja de mad a ire kamɨn ndang kad n'oi kɨta de kɨ ngeɗamaj mad.

⁸ Luwah ɔj'j tar lon kɨ ngãi kɨ ɗob 'nten lon jĩn ngéɗamajalg ɓaitɔ la, Krist oi kɨtatɔj ye.

⁹ Tajigla, jĩ kɨ kɔrrtadɔt nõ Luwaht kɨtakul mosɨ Krist, kɨtɔi 'nten j'a kɨ j'ajɨn ta wongt lo Luwah kɨtakula ho.

¹⁰ Maɗi lon jĩn madngétaa Luwah ɓaitɔ la, Luwah laj nooj nat sen kɨtakul koi ngonɨn ye, ad tajigla jĩn kɨ nooj kɨ la nat sia, kɨtɔi 'nten ndɨ kɨ j'ajɨn kam tɔg ndɨ kɨ dɔ dõt'n Jeju ndɨn nõ ho.

¹¹ 'Nten hã kɨɗabe al, na kɨ ndɨ kɨ gaburo kam Luwaht kɨtakul Bɨraɓe loj Jeju Krist ngelaj-nooj nat kɨ Luwah tajigla.

Ta lo Adam kɨ Krist

¹² Kɨtɔ 'nten, tit'n hã majal ɗe dɔningt kɨtakul de kɨɗa ye, koi tɔ ɗe kɨtakul majal, titbe koi ɔrr go degt tube, kɨta deg tube ɗan majal.

¹³ Kete lon mberkɨnda lo Moij goto ɓaitɔ ye, majal i dɔningt woi. Na Luwah tɨda majal kɨ dɔ ngéɗamajalgt al kɨta mberkɨnda mad goto ɓaitɔ.

¹⁴ Titbe la, koi õɓe gong Adamt mbã teen dɔ Moijt, ad deg'n tɔin dɔ ta tit Adam al kaa ne, koi õɓe dɔdt.

Adam i ɓakumta ngeɗe ad i Krist

¹⁵ Na kadkari kɨ go kamkẽt lo Luwah i tit kɨ tɔidɔ ta lo Adam al. Rota kɨtakul majal lo de kɨ kɨɗa'n non la deg ngãibe oin ne. Na kamkẽ lo Luwah tɔi majal lo Adam ngãibe, titbe la kadkari lo Luwah'n ad deg ngãi kɨtakul kamkẽ lo de kɨkɨɗa, ad i Jeju Krist tɔia'n ngãibe tɔ ye.

¹⁶ Kadkari lo Luwah i nya kɨmaj, i tit majal kɨ ɗa al. Majal ĩn de kɨ kɨɗa'n non ɗa i dang tɔ. Luwah gangta dɔ det kɨta majal'n non, na kadkari'n Luwah ɔjɨn kamkẽ lon deg kɨtakul koosɨ majalg lod ye, i kɔrrtadɔt, kad takɨgang hɔd kɨ ta nõ Luwaht al.

¹⁷ I rota, kɨta tɔidɔta lo de kɨɗa la koi õnɓe dɔ degt ye, kɨta 'nten de mad kɨɗa, ad i Jeju Krist ɗakɨla kɨbo ngãi tɔia, na deg'n Luwah ɔjd kamkẽ lon kɨ ngãi, na ad'd telɨn deg kɨdenesew ye, ngahn kumkajir kɨ mbãkɨnõt ho, a õnɓe kɨtakul Jeju Krist ho.

¹⁸ Tit'n, tɔidɔta lo de kɨkɨɗa ad takɨgang lo Luwah hɔn deg tube ye, titbe tɔ, kɨtakul nyaɗa kɨdenesew lo de kɨkɨɗa ndɨ ɔrrɨn ta dɔ degt tube, na ndɨ ad'd kumkajir tɔ.

¹⁹ Tit'n maɗi, kɨtakul telrogotat al lo de kɨkɨɗa deg ngãibe ĩn ne ngéɗamajalg ye, titbe tɔ tajigla telrogotat lo de kɨkɨɗa, deg ngãibe telɨn ne deg kɨdenesew nõ Luwaht.

²⁰ Mberkɨnda ɗe kɨtakad tɔidɔta lo deg bɨlan. Na lon majal lo deg bɨlat ngãi a ne, kamkẽ lo Luwah tot mbujmbuj kɨ tɔi ta kɔl.

²¹ Tit'n maɗi majal õɓe de degt kɨtakul koi ye, titbe tɔ tajigla kamkẽ lo Luwah ndɨ õɓe dɔ degt ad'd telɨn denesew, ad ngahn kumkajir kɨ mbãkɨnõt kɨtakul Jeju Krist kɨ Bɨraɓe loj.