Romag 4 - Maktub Ta Kumkajir

Luwah ɔrr ta dɔ Abrahamt kɨtakul kadkam

¹ Na j'a j'el j'an ɗi dɔ Abrahamt, bɔwj kɨgo dãrot a? Abraham ngah ɗi ro Luwaht a?

² Ĩla Luwah ɔrrta dɔ Abrahamt kɨtakul kɨlaɗaag a ne, ndɨ kɨ nya mad kɨ asɨ kad gaburo dɔt. Na asɨ gaburo nõ Luwaht al.

³ I tit'n ndangɨn ne kam maktubt lo Luwah anan: Abraham adkamɨn Luwah kɨta 'nten Luwah telan kɨdenesew nont kɨtakul kadkam loa.

⁴ De'n ɗa kɨla a ngah nara, nar'n non i kadkari kɨgo kamkẽt al, na i nyabajia.

⁵ Na de'n ɗa kɨla al na ndɨ adkamɨn Luwah kɨ ngekɔrrta dɔ degt kɨ ngéɗamajal a ne, de'n non Luwah a tela kɨdenesew nont kɨtakul kadkam loa.

⁶ Dabid elta titbe tɔ dan ronel lo de'n Luwah ɔrr ta dɔat kɨkanj ɗa kɨlag lo mberkɨnda an:

⁷ Ngéronelg la ĩn deg'n Luwah nyàgo tɔidɔtag lod kɔ, kɨ deg'n Luwah nyàgo majalg lod.

⁸ Ngeronel la i de'n Luwah ndɨ tɨda majal loa kɨ dɔat al.

⁹ Ronel 'nten ye, i kɨta ngejagaj koon ne, ke i kɨta ngéjagajg al ho? Kɨtɔ j'el j'an: Luwah tel Abraham denesew nont kɨtakul kadkam loa.

¹⁰ Ɗɨngãt hã Luwah tel Abraham denesew a? I lon jan gaj a ke lon jan gaj al ɓaitɔ? Luwah tel Abraham denesew kɨtakul kadkam loa lon ĩn kɨkanj jagaj ɓaitɔ.

¹¹ Abraham taa gaj kɨja nyakɔjt kam dãront, tit nyatɨnya ta denesew'n ngah kɨtakul kadkam, lon jan gaj al ɓaitɔ. Titbe la Abraham ĩn bɔw ngéjagajalg tube'n ndɨ adɨn kamd Luwah kad Luwah teld denesew ho.

¹² Na Abraham i bɔw ngéjagajg ho ad i deg'n jand gaj koon al, na i deg'n jand gaj na ndɨ ndian bang kadkamt lo bɔwj Abraham lon jan gaj al ɓaitɔ.

Kunkɔ lo Luwah i kɨta deg'n adɨna kamd

¹³ Luwah un kɔ'n maɗi ad Abraham kɨ ngakaa kad ĩn ngékõnduba dɔning; i kɨtakul tel roa go mberkɨndat al na i kɨtakul kadkam Luwah la Luwah telan de kɨdenesew nont ye.

¹⁴ Kɨtɔ ĩla ngételro go mberkɨndat ngahn nya'n Luwah unɨn kɔ'n ad Abraham kɨ ngakaa a ne, kadkam Luwah i nya mad al, kunkɔ tɔ i nya kɨ kari.

¹⁵ Kɨtɔ mberkɨnda ndɨ ɗe kɨ wong lo Luwah dɔ degt, kɨta tɔin dɔ mberkɨnda, na lon mberkɨnda goto a ne, tɔidɔ mberkɨnda goto ho.

¹⁶ Nya nduba'n Luwah unɨn kɔn ye, ad deg'n adɨna kamd kad n'ɔjdɨn kamkẽ lon, ndig kɨ n'ad Abraham kɨ ngakaa koon al, na ad deg tube'n adɨn kamd Luwah tit'n Abraham adɨn be, kɨta Abraham i bɔwj tube.

¹⁷ Kɨgo tat'n ndangɨn kam maktubt: M'ndai kad ĩ bɔw girr koosɨdeg dang dang ye, Abraham i bɔwj nõ Luwaht, ada kamɨn ad i Luwah'n ad kumkajir ngékoig, na kun nyag'n goto'n ad teen.

¹⁸ Lon kam kɨ ndah dɔ kunkɔt ngang ngãi kaa ne, Abraham ndahkamɨn dɔt adkamɨn Luwah telɨn bɔw girrdeg ngãibe kɨgo tat'n Luwah ela an: Titbe la ngakaai a bɨlan ne ngãi.

¹⁹ Ɓal Abraham i nderbe kad asɨ ɓu, kam Sara tɔ ngɨra jakt asɨ kooj ngon al, na Abraham oo dãron tit nya kɨ koi be al, ad kadkam lon tel tõ al.

²⁰ Kadkam al loa ɗaa ad ɓadta dɔ kunkɔt'n Luwah un ada al, ngang kɨtakul kadkam, na ɔsɨgon Luwah.

²¹ Abraham ger kɔi kɔi kad Luwah asɨ ɗa nya'n unɨn kɔ'n ada.

²² Kɨtɔ 'nten Luwah tɨda kadkam loa i denesew kɨ dɔat.

²³ I kɨtatɔa kɨɗabe hã ndangɨn ne tag'n non al, tag kɨ el an: Tɨdan kadkam loa i denesew kɨ dɔat.

²⁴ Na ndangɨn ta'n non kɨtatɔj ho, kɨta a tɨdan denesew kɨ dɔjt jĩn kɨ ndɨ kɨ jad kamj Luwah'n ad Jeju kɨ Bɨraɓe loj ɓai ku ngékoigt.

²⁵ Jeju'n non Luwah laa ji degt ad tɔlɨna kɨta tɔidɔtag loj, kamla ada ɓai ku ngékoit kad ɔrr ta dɔjt nõat.