Romag 13 - Maktub Ta Kumkajir

La dɔ girr tɔg ngékõɓegt

¹ Kɨ dekɨɗen la dɔn girr tɔg ngékõɓegt kɨta tɔg kõɓe kɨɗang goto na tɔg kõɓe'n ɗe kokɨro Luwaht tã. Ngékõɓeg tube nõ, Luwah la ndahd ye.

² Kɨtɔ 'nten de'n ndɨ taaɗɔ ngekõɓe a ne ndɨ taaɗɔ tɔg kõɓe'n Luwah ndah. Na deg'n ndɨ taa'n ɗɔɔ titbe ye ndɨ ɔrrɨn takɨgang kɨ dɔdt.

³ Ngékõɓeg ĩn nya kɨkootɓool al ro degt kɨ ngéɗamaj, na ro degt ngéɗamajal la ĩn nya kɨkootɓool ye. I ndig kad i ndɨ kɨkanj ɓool de'n ndɨ kɨ tɔg kõɓe e? I titbe a ne, i hɔ ɗa maj, na a i ngah hit roat.

⁴ Ngekõɓe i ngekɨlaɓer lo Luwah kɨtɔ maj loi. Na ĩla i ndɨ i ɗa majal a ne, sumba kad i ɓool, kɨta i kɨ ndang hã ton nyakat al, na i kɨta nda ngɨra lo Luwah, kɨta kɔj kuma ngéɗamajalg.

⁵ Kɨtɔ 'nten sumba kad i telɨn rosɨ go ngékõɓegt kɨta ɓool wong lo Luwah hã koon al, na kɨtakad kamsɨ hɔsɨ kɨ ta al tɔ.

⁶ Kɨtɔ 'nten tɔ la i ndɨ i ban ne lambo, ngéɗakɨla taa lambo lo ngékõɓeg ndɨ ɗan kɨla lo Luwah ho.

⁷ Adɨn dekɨɗen nya'n sumbaa: Adɨn lambo de'n lambo sumbaa, adɨn nyatɨr de'n nyatɨr sumbaa, i ɓoolɨn de'n sumba kad i ɓoolɨna. Ɔsɨngon de'n kɔsɨgon sumbaa.

Sumba kad ngékad kamd Krist tarɨn na

⁸ Ot kadɨn girra nya lo de mad to dɔsɨt, na girra tar kɨɗabedo tã kad i tarɨn na. Kɨtɔ de'n ndɨ tar madɓen a ne, ndɨ telron go mberkɨndat lo Luwah kɨtaagbe.

⁹ Mberkɨnda lo Luwah la ten: A i sah dekɨdẽ kɨɗang al, a i sah ngaw al, a i tɔl de al, a i ɓog al, a i ɗa kumndà al, kɨ ndeg mberkɨndag tube ndand nat kam tat 'nten: A i tar madɓei tit roi be.

¹⁰ De'n ndɨ tar madɓen ndɨ ɗaa majal al, kɨta 'nten tar i tɔlta mberkɨnda lo Luwah.

Ɗa ro woi kɨta tel Krist

¹¹ I ɗan titbe kɨta i gerɨn kaglo kɨ titbãi jĩnt: Kad asɨ woi kad i ndoolɨn dɔɓit, kɨta kaj i rojt nderbe tɔi kɨ kaglot kɨ dasa'n jadɨn kamj Krist.

¹² Lo kɨ ndɔ ndɨ sah ti, lo kɨ gang i nderbe. Kɨtɔ 'nten ad kɨ tɔrrɨn kɨlag'n deg ndɨ ɗan kam tilt kɔ, na kɨ lan nyakat rojt kɨɗɔɔn kam kunjt.

¹³ Ad ɗob nyaɗaj ĩ kɨ goɗobat, kɨ sumba lo deg kɨ ngenda kàda na kɨ nda ndom kɨ kasɨ kɨ ɗa al, kɨ sah ngaw kɨ ɗa dekɨdẽg al, kɨyerr kɨ ro al, kɨ kɔl kɨ nĩ al.

¹⁴ Na maj kad i lan nyakatg lo Bɨraɓe Jeju Krist rosɨt na ot soolɨn kɨta dãro kad i tɔlɨn kon nyurkõg loa.