Romag 12 - Maktub Ta Kumkajir

Ɗob ɗa kɨlaɓer lo Luwah

¹ Kɨtɔ 'nten ngankom, m'ndɨ kɔsɨ kɨgo kõkamt lo Luwah, kad adɨn Luwah dãrosɨ kɨtaagbe kadkarit kɨ kumkajir, 'nten i nya kɨ nel Luwah dum, i kɨla ndub Luwah kɨ jeje'n sumba kad i ɗan.

² Ot telɨn rosɨ go nyaɗat lo deg kɨkaglot kɨ tajigla, na adɨn Luwah telsɨ kɨ kijt kɨtaagbe kɨtakul mbeltagahsɨ kɨ kijt. Kamla a asɨn ger ndig lo Luwah: Ad i nya kɨmaj, kɨ nela, kɨ nya kɨ asɨnatap.

³ Luwah adɨm kadkari kɨgo majkurrt lon, kɨta 'nten m'ndɨ m'elsɨn tube ta 'nten: Ot kad i ndɨn kɨ tagah kɨbo tɔi ĩgɨn sumba kad i gaan, i soot kad i gaan dɔ ɗobt kɨ rota'n Luwah adsɨ kɨtakad i gerɨn lon int.

⁴ Tit kan jĩn kɨ ngan roj ngãibe kam dãrojt kɨkɨɗa, na ngon ro kɨɗen aw kɨ kɨla lon kɨ kɔsɨdɔn ye,

⁵ titbe tɔ, ke jĩ deg ngãibe kaa ne, jĩ dãro kɨkɨɗa nat kɨ Krist, na jĩ tube jĩ nganro na.

⁶ Luwah adj kadkarig dang dang tit'n ge kadjɨn kɨgo majkurrt lon, ye kɨ de'n ta kadkari kelta kɨ ta Luwaht a ne, kɨ elta kɨgo kadkamt'n ad Krist.

⁷ De'n taa kadkari ɗa kɨlaɓer lo Luwah a ne, kɨ ɗa kɨlaɓer'n non; de'n taa kadkari ndoo deg a ne, kɨ ndaron degɨr ta ndoo degt.

⁸ De'n ndɨ ɔj deg a ne, maj kad ɔj deg; de'n ndɨ ɗa kɨ ngéndog kɨ nyamajg lon a ne, kɨ ɗa sed kɨ nõbe; de'n i bɨradɔdeg a ne, kɨ ɗa kɨla lon kɨ rotĩn; de'n ndɨ oo kumtondo lo deg a ne, kɨ ɗa kɨ ronel.

⁹ Kɨ tar losɨ i kɨkanj ndokum. I mbetɨn majal kɨ ɗa, na i hɔn ɗa maj.

¹⁰ Ta kɨ dɔ tar ngankõt taa kɨ adɨn kamsɨ hɔna; ta kɨ dɔ kɔsɨgont taa ne, kɨ dekɨɗen oo namɨn ad i kɨ nont.

¹¹ I lan rosɨ kɨnat i ɗan kɨla, na ot ɗan ngẽ. I ɗan kɨlaɓer lo Bɨraɓe kɨ rotĩsɨ.

¹² I ɗan ronel kɨta i ndɨ i ndan kamsɨ dɔ nyat'n Luwah unɨn kɔ'n adsɨ. I hɔn tɔgsɨbá dan kamkɔlt. Elɨn ta kɨ Luwah kɨkanj nya ta.

¹³ Adɨn nyag losɨ i ɗan ne kɨ deg kɨjaɓat lo Luwah kɨgo get lod. I hɔn mbahg maj kɨ rosɨt.

¹⁴ I kɔ'n Luwah kad njang dɔ ngéɗa rosɨ ndo, i kɔ'n Luwah kad njang dɔd tã na kɨ ndɔld al.

¹⁵ I ɗan ronel kɨ deg'n ndɨ ɗan ronel. I non kɨ deg'n ndɨ non.

¹⁶ Adɨn tagahsɨ so go nat, ot ndan kamsɨ dɔ nyagt kɨbo tɔi, na i ɗan ngan kɨlag kɨ dudu kɨ rotĩsɨ. Ot koon rosɨ ngéterrgt.

¹⁷ Ĩla de mad ɗai majal a ne, ot ɗaa majal nyaita, i la roi kɨ nat kad i ɗa nya kɨmaj nõ degt tube.

¹⁸ Ĩla i root a ne, i ɗa toot be kɨgo tɔgit kad i ndɨ kɨ lapia kɨ deg tube.

¹⁹ Ngétar lom, ot ndan ngɨra dɔ rosɨt, na i nyan lo adɨn wong lo Luwah. Kɨtɔ maktub lo Luwah el an: Nda ngɨra i lom, m'a m'ga girra kel Bɨraɓe.

²⁰ Na ĩla ɓoo õ mad ngetai a ne, ada nyasa; ĩla kɨnda õa a ne, ada man ãi. Lo ɗaat titbe a i tit yalhorr hã i ɗa ɔi kɨ dɔat be.

²¹ Ot kadɨn majal dum dɔsɨ, na kɨ i tetɨnɗɔɔ majal kɨtakul maj kɨ ɗa.