Romag 10 - Maktub Ta Kumkajir

¹ Ngankom, nya'n kamm ndig ngãi la ten: I kad Juipg ngahn kaj. M'kɔ Luwah kad ajd.

² Kɨtɔ m'ndɨ m'mand naj, ndɨ ɗan kɨla lo Luwah kɨkanj ger ɗoba jeje.

³ Kɨtɔ gerɨn ɗob'n Luwah ndɨ telɨn deg denesew nont al, na ndɨ sahn ɗob kɔrrta dɔt kɨ kɔsɨ dɔd, titbe mbetɨn ɗob'n Luwah ɔrrɨn ta dɔ degt.

⁴ Kɨtɔ Krist tɔlta mberkɨnda, ndɨ ɔrrta dɔ degt tube'n adɨna kamd.

Kaj kɨta dekɨɗen'n ndɨ adkamɨn Krist

⁵ Moij ndang ta 'nten dan dɔ tel de denesew nõ Luwaht kɨ ɗob ngomgo mberkɨnda an: De'n hɔ nyaɗa kɨgo mberkɨndat kɨtaagbe a ne, a ndɨ kɨ dɔn dõ kɨtakula.

⁶ Na ta dɔ tel de denesew nõ Luwaht kɨ ɗob kadkam ye, i dang, elɨn anan: Ot kel kamit kan: Nõ a aw dõ kam dɔrãt a? Ad i kad Krist ɗisɨ ber.

⁷ Ot kel kamit tɔ kan: Nõ a aw tee koo? Krist ɓai ku ngékoit.

⁸ Ta lo Luwah el an: Ta i roit nderbe, i tait, na i kamit tɔ. Ta'n non i ta kadkam Krist'n kɨ ndɨ kɨ la mbera deg j'an:

⁹ Ĩla i tɔ tait kɨ tɨga wakɨsɨ an: Jeju i Bɨraɓe, na i ger ngarkamit Luwah ada ɓai ku ngékoit a ne, a aj.

¹⁰ Kɨtɔ ĩla Jada kamj jeje a ne, Luwah a ɔrr ta dɔjt, lon kɨ tɔ tajt kɨ tɨga wakɨsɨ j'an Jeju i Bɨraɓe a ne, Luwah a aj'j.

¹¹ Kɨtɔ ndangɨn kam maktubt lo Luwah anan: Deg tube'n adɨna kamd ye, rod a sɔld al.

¹² Kɨtɔ dang dang goto mbɨna juipgt kɨ Grekg, ĩn tube Bɨraɓed i kɨda, ĩn ad maj urr deg tube'n ndɨ koon kɨ dɔat.

¹³ Kɨtɔ maktub kɨkunjɗang lo Luwah el an: Dekɨɗen a ko kɨ dɔ Bɨraɓet a ne, a aj.

¹⁴ Na titbãi a kon kɨ dɔ ĩtɨn adɨna kamd al a? Titbãi a adɨna kamd ĩla oon ta loa al a? Ĩla de mad lad mber ta loa al a ne, titbãi a oon dɔ a?

¹⁵ Titbãi a lan mberta loa ĩla lan ngélambera al a? Kɨgo tat'n ndangɨn kam Maktubt lo Luwah an: Oon deg ndɨ ɗan ronel kɨdum dɔ ngéɗe kɔrrd hoitat kɨmaj.

¹⁶ Na deg tube hã telɨn rod go hoitat kɨmaj al. Ngekelta kɨ ta Luwaht Ejai el an: Nõ taa ta'n kɨ la mbera nõ a?

¹⁷ Titbe la kadkam ndɨ ɗe kokɨro koo dɔ hoitat kɨmaj'n i mber ta lo Krist.

¹⁸ Lon i titbe ye, m'ndɨjesɨ ta 'nten: Juipg ye oon dɔ Hoita kɨmaj ale? Ãã oon dɔ ɓet. Tit'n ndangɨn ne kam maktubt lo Luwah anan: Ndi ta lod tee aw go dɔningt kɨtaagbe ad deg oon dɔ. Tag lod aw mbã tee dɔngoi dɔningt.

¹⁹ Ye m'ndɨje ta mad kɨɗang ɓaitɔ. Juipg gerɨn girr hoita kɨmaj ale? Ãã gerɨn ɓet. Dasabang Moij el an: M'am sɔkɨsɨ kad i jangɨn kɨ deg'n ĩn girrdeg kɨ je al takumsɨt. M'am sɔkɨ wong losɨ kɨ dɔ girrdegt'n oond kad goosɨ lod goto.

²⁰ Ngekelta kɨ ta Luwaht Ejai ire kamɨn ndang, na elta kɨ tɨga wakɨsɨ an: Deg'n sahmɨn al ye, m'ad'd ngahmɨn, deg'n ndɨjen kɨ n'oomɨn al ye, m'tee kɨ rom hɔi kɨ rodt.

²¹ Na kɨ ɔj dɔ girrdeg kɨ Israelt taa ne, ngekelta kɨ ta Luwaht Ejai el an: M'la jim kɨ dɔdt kɨ ndɔg tube m'kunɨn girrdeg kɨ ngételrod go tat al kɨ ngédɔngang.