Pilipiag 1 - Maktub Ta Kumkajir

Lapia

¹ Mĩ Pol, nat kɨ Timote, jĩ ɓerg lo Krist Jeju; kɨ ndang maktub 'nten jad deg kɨjaɓat lo Luwah, ĩgɨn adɨn kamd Krist Jeju, nat kɨ ngékoogo ngékawna kɨ ngékɨlaɓerg tube kɨ kam ɓebot kɨ Pilip.

² Kɨ Bɔwj Luwah kɨ Bɨraɓe Jeju Krist adsɨn majkurr kɨ kam kɨsokɨber.

Pol ɗa mersi Luwah

³ Kaglog tube'n kam gah dɔsɨt ye, m'ɗa mersi Luwah.

⁴ Kaglog tube'n m'ndɨ m'elta kɨ Luwah kɨtatɔsɨ ye, m'ela kɨ ronel,

⁵ kɨta ɗa'n i ɗan sem dɔ kɨla lamber hoitat kɨmaj, ndɔt kɨ dasabang mbã tajigla.

⁶ M'ger kammt maj, Luwah'n mba girr kɨla kɨmaj'n non kamsɨt ye, a hɔ ɗa kɨla'n non mbã tɔl kona ndɔ ɗe Jeju Krist't.

⁷ I goot kad m'gaa nya kɨ titbe kɨ dɔsɨt tube, tit kan hã ĩn ne ngarkamt, kɨta ĩn tube ĩn ngégana sem dɔ majt'n Luwah ɗa sem, ke lon mĩn dangait, ke lon mĩn dangait al ɓaitɔ, ad m'ngaa ɗob kɔrr girr hoita kɨmaj, na m'ndɨ mad deg gerɨn kad i ta kɨɗubag.

⁸ Luwah i ngemam naj, m'tarsɨ tube kɨrotag kɨgo kõkamt'n i kam Krist't kɨta deg. Kõkam'n i kam Krist Jejut kɨta deg ye, kõkam'n non i kammt ad m'tarsɨ tube ho. Luwah i ngemam naj dɔ tat 'nten.

⁹ Nya'n m'kɔ kam keltat kɨ Luwah la ten; m'kɔ kad tar losɨ to mbuj mbuj, kam nyagert kɨ kam goosɨ kɔrr girr tat tube.

¹⁰ Kɨtɔkad i gerɨn ne nyag kɨmaj tɔi. Titbe la a ĩn ne kɨjanjoi, kɨkanj ta mad dɔsɨt ndɔt'n Jeju Krist a ɗe.

¹¹ Jeju Krist la i nge tee kɨ kand ɗa denesew kamsɨt; kɨ i ɓankot kɨ kandɨn non kɨtakad Luwah ngahn tɔko kɨ ndub.

Ndɨ kɨ dɔ dõ kɨ jeje, i dɔ Krist't

¹² M'ndig kad i gerɨn ngankõ, nyag 'nten dɔmt ye, ɔgɨn Hoita kɨmaj kad tee kɨ ro degt al, na bela ndɨ ɗa sia, ad aw kɨ ketekete ye.

¹³ Kɨtɔ i nya kɨ to kɨtɨga wakɨsɨ ro ngéngom dɔ ngekõɓet tube, kɨ ndeg deg tube, ad gerɨn maj i kɨta Krist la mĩn kam dangait ye,

¹⁴ na koon ngankom oomɨn dangait, mĩ kɨ dɔ kɨ jinjir la, koosɨ ngankõ madg ngãibe ngangɨn ne kokɨro kam Bɨraɓet, mbã iren kamd ndang kad elɨn ne ta lo Luwah kɨkanj ɓool.

¹⁵ Rota deg madg ndɨ lan mber ta lo Krist kɨ lo minat kɨ gakɨ, kɨmadg tɔ ndɨ lan mber ta lo Krist kɨgo kamndigt kɨmaj.

¹⁶ Ĩgɨn non ndɨ lan mber Krist kɨ lo tart ho, gerɨn kad Luwah ndah kammt kad m'la mber hoita kɨmaj ho.

¹⁷ Na ĩgɨn ndɨ lan mber ta lo Krist kɨ tagah kɨ karnyang al, na kɨ jangkɨna kɨta ɓut nyandoo lod kɨ kɔsɨ dɔd, ndɨ oon anan ndɨ n'admɨn kamkɔl kɨ dɔt dɔt, lon mĩn dangait kam jinjirgt.

¹⁸ Ta goto. Kɨ ɗob kɨɗen deg ndɨ lan ne mber Krist, ke kɨ lo ndokumt, ke kɨgo rotat, m'a m'nya ta ɗa ronel dɔt al bat.

¹⁹ Kɨtɔ m'ger maj, nya 'nten a ɗa kɨla kajɨm kɨtakul kɔ'n i kɔn kɨtatɔm, kɨtakul ɗa'n Ndil Jeju Krist a ɗa sem.

²⁰ M'ngoo keɗeng, na m'nda kamm dɔt kad rom a sɔlɨm dɔ nya madt kɨɗa al, na kɨ kam kɨmisɨmisɨ kɨ rotagt la Krist a ngahn kɔsɨgon kam dãromt tajigla, ke mbãkɨnõt, ke m'ndɨ kɨ dɔm dõ, ke m'oi.

²¹ Kɨtɔ mĩ, ndim kɨ dɔ dõ i Krist, koi tɔ i nya lom kɨ ngahdɔt.

²² Na ĩla m'ndɨ kɨ dɔm dõ kam dãrot, m'asɨ ɗa kɨla kɨ tee kɨ kandɨn a ne, m'oo nya'n m'a m'kɔt nõ al.

²³ Nyag kɨ joo'n non ndɨ ɔrrmɨn yo ngɨra, nyur ndɨ õm kad m'ɔrr dõ m'aw m'ndɨ nat kɨ Krist, kɨta i nya kɨmaj.

²⁴ Na kɨ tɔi 'nten, sumba kad m'ndɨ kɨ dɔm dõ kɨtatɔsɨ.

²⁵ Kɨtɔ 'nten, m'ger kammt ɓet, m'oo tit m'a m'ndɨ kɨ dɔm dõ, m'a m'ndɨ nat sesɨ tube tɔ kɨtakad m'ɗa sesɨ kad awɨn kɨ ketekete, kad i ɗan ronel kam kadkam Krist't.

²⁶ Kɨtɔ lon m'a m'aw rosɨt gog a ne, a i ɗan ronel ngãibe kam Krist Jejut kɨtatɔm.

²⁷ Na kɨ nyaɗasɨ asɨ ta Hoita kɨmaj lo Krist. Kɨtɔkad ke m'aw m'oosɨ, ke m'goto kaa ne, kɨ m'oo hoi ɗasɨ bijir kam ndilt kɨkɨɗa, kɨ hoi ɗɔɔn i ɗɔɔn nat kad i ngomɨn ne Hoita kɨmaj'n i taan kɨ kam kɨkɨɗa.

²⁸ Ot kadɨn ngénɗoorsɨg ndasɨn ɓoolt dɔ nyat mad. I nya kɨ to tɨga wakɨsɨ rodt; ĩn deg kɨ nuj kɔ. Na kɨ rosɨt taa to kɨ tɨga wakɨsɨ ĩn deg'n Luwah ajisɨ.

²⁹ Kɨtɔ Luwah ɗa sesɨ maj titbe; adsɨ kad adɨn kamsɨ Krist hã kɨɗabe al, na kɨ i dain yosɨ kɨ kõ kɨtatɔa ho.

³⁰ Kɨtɔ i ndɨ i ɗɔɔn ɗɔɔ kɨkɨɗa 'nten ho, ad i ɗɔɔn oon m'ndɨ m'ɗɔɔ maɗi, m'ndɨ m'ɗɔɔ tajigla ɓaitɔ tit'n oon ne hoia.