Pilemõ 1 - Maktub Ta Kumkajir

Lapia

¹ Mĩ Pol, mĩ dedangãi kɨta ta lo Krist Jeju nat kɨ ngonkõ Timote, m'ndang maktub 'nten mad Pilemõ ngetar loj ho, madkɨlaj ho,

² nat kɨ ngonkõj kɨdẽ Apia, kɨ Arsip ɗan mad na sej dɔ ɗɔɔt kɨmaj, kɨ ngékawna'n ndɨ kawɨn na kam kujt loi tɔ.

³ Kɨ Luwah kɨ bɔwj kɨ Bɨraɓe Jeju Krist adsɨn majkurr kɨ lapia.

Pol ɗa mersi Luwah

⁴ Pilemõ, kaglog tube'n m'ndɨ m'elta kɨ Luwah ye, m'ga kam dɔit kɨndɔgndɔg, na m'ɗa mersi Luwah kɨta ta loi.

⁵ M'ɗa mersi kɨta m'oo hoi tarɨn i ndɨ i tar deg kɨjaɓat lo Luwah tube kɨ kadkam'n ad Bɨraɓe Jeju Krist.

⁶ M'ndɨ m'kɔ Luwah kad namɨn jĩn sei dɔ kadkam Luwaht ye, i ngeɗakɨla kɨ tɔg mbã kad i gerɨn nya kɨmaj kɨɗen kɨ i kam ndɨjt kɨ dɔ dõ nat kɨ Krist.

⁷ Ngonkom, tarɨn i tar deg lo Luwah ye, adɨm ronel ngãibe, ɗa sem ad kamm misɨmisɨ, kɨta kam deg kɨjaɓat lo Luwah sokɨber kɨtakuli.

Pol kɔ Pilemõ kad ɗa maj kɨ Onesim

⁸ Kɨtɔ 'nten, Krist adɨm kam kɨmisɨmisɨ kad m'ndain mber kad i ɗa nya'n sumba kad i ɗa.

⁹ Titbe kaa ne, m'oo maj tɔi kad m'kɔi kɨta tarɨn m'ndɨ m'tari; mĩ Pol, mĩ ngahtɔg, kɨ tɔi 'nten, mĩ dangait kɨta ta lo Krist kɨ dɔt be tɔ.

¹⁰ M'ndɨ m'kɔi kɨta ngonɨm kam Krist't, Onesim'n m'ooja kɨgo ndilt kam dangait.

¹¹ Maɗi ɗa sei majal, na tajigla asɨ ɗa sei maj ho, ɗa sem maj ho.

¹² Tajigla m'ndɨ m'laa kɨgog roit, ĩ kɨɓe kɨdɔn tɔ i tit gaj rom mĩ kɨɓe la m'ndɨ m'laan kɨroit ye.

¹³ M'ndig kad'm ngoma romt ne, kɨtakad ɗa kɨla adɨm gan gooti lon mĩn dangait kɨta hoita kɨmaj.

¹⁴ Na m'ndig kad m'ɗa nya mad kɨkanj kad m'oo kɔjta loi al. M'ɗa titbe kɨtakad ɗamaj loi i tit kɨ lo ngetɔgt be al, na kɨ lo kam ndigt tã.

¹⁵ Maj a ne, i kɨta 'nten la Onesim ĩn kɨ gang na sei kaglot kɨtẽbe, kɨtakad i ngaha ngah kɨ mbãkɨnõt.

¹⁶ Titbe kaa ne, i ngaha tit ɓer be gog al ta, na maj tɔi ɓer ngãibe. Tajigla i ngonkõ kɨ ngetar kam Krist't. Mĩ kɨɓe m'tara ngãi, na kɨ tɔi 'nten sumba kad i tara ngãi tit kan i ɓer loi ho, i ngonkõi kam Bɨraɓet ho tɔ.

¹⁷ Kɨtɔ 'nten, ĩla oom kad mĩ nami a ne, i hɔa kɨroit tit'n i hɔmɨn kɨroit ye be.

¹⁸ Ĩla ɗa sei nya mad kɨgoot al, ke girra loi i dɔat a ne, i tɨda girra'n non kɨ dɔmt.

¹⁹ Mĩ Pol, m'ndang ta 'nten kɨ jim mĩ kɨɓe. M'a m'ba girra'n non. M'ndig kad i ga kami dɔt, ad i girra ndɨ kɨ dɔ dõ.

²⁰ Ã ngonkom, m'kɔi kad i ɗa sem nya kɨmaj kɨtakul Bɨraɓe. M'kɔi kad ad kami sokɨber kɨta nam kɨ hɔ loj sei kam Krist't.

²¹ Tajigla, lon m'ndɨ m'ndangɨn maktub 'nten kɨ m'adi ye, m'ger ɓet kad a i ɗa nya'n m'kɔi nõ. M'ger kad a i ɗa tɔi dɔ nya'n m'eli nõ.

²² M'ndɨjei kad i ɗago lo to kɨtɔm, m'nda kamm dɔ Luwaht kad a oo dɔ kɔg losɨ kad ɗa sem kɨtakad tel sem kɨ dãsɨt.

Lapia kɨ dɔboit

²³ Epapras ɗasɨ lapia, i nat sem dangait ne kɨta ta lo Krist Jeju.

²⁴ Madkɨlamg, Mark, Aristark, Demas kɨ Luk ɗasɨn lapia ho.

²⁵ Kɨ majkurr lo Bɨraɓe Jeju Krist i nat sesɨ.