Oje 8 - Maktub Ta Kumkajir

Bɨraɓe ndang Israelag kɨta yo kɨ ɗa

¹ I kunɨn tow, na i kɔrɨn nya elɨn ne deg, tit'n yel kuro ndɨ ɗisɨn ye titbe la tuj ndɨ son dɔ girrdegt lo Bɨraɓe.

² Ndɨ kon kɨdɔmt, anan: Ĩ Luwah loj, jĩ Israelag kɨ geri.

³ Israelag mbetɨn nya kɨmaj ye, madngétadg tuɓan god.

⁴ Ndan ngarg dɔdt kɨkanj mberkɨnda lom, kɔtɨn kɨbog kɨkanj kad m'gerd. Ɗan yog kɨ larjã kɨ lɔr lod, kɨta 'nten a nujɨn kɔ.

⁵ Ĩn deg kɨ Samari, m'mbet yo ngon mang lɔr losɨ; m'ɓa sesɨ wong kɨtɨngabil; a i teen kɨkar nyangt ndɔ ɗit a?

⁶ Yo ngon mang lɔr lo Samarig ye, i luwah al, na i kɔd mad ku Israelagt la ɗaa ye, Kɨtɔ 'nten ɓet a tɔɔna kɔsɨkɔsɨ.

⁷ Kɨtɔ Israelag duwɨn nél, a tetɨn nélbarwãi. A ngahn dɔ nyako al, nduj a goto, na ĩla and a ne, mbahg la a san mugɨj ye

⁸ Tajigla girrdeg kɨ dang dang lan Israelag yalɨm, i tit joo kɨ ndaa goto be.

⁹ Lon Epraim aw Asirit tit korro kɨ mut, kɨ aw kɨ kɨɗanbe, ad kadkari ndugon ngéɗan ngaw.

¹⁰ Ke neni adɨn kadkarig girrdeg madg kad ɗan ne sed kaa ne, m'a m'kawd kɨnat tajigla, kamla a nyan ta nda ngarg kɨ mbaiɓeg tit'n ndan ne kaglot 'nten.

¹¹ Kɨtɔ Epraim ɗa dɨngɨr kadkarig kɨjakɔ ad bɨlan kɨdɔtdɔt kɨta ɗa majal, na dɨngɨrg'n non telɨn lo ɗa majal loa.

¹² Ke neni m'ndang mberkɨndag lom asɨ dub kɨlah kaa ne, Epraim a ood tit ta kɨmbah be.

¹³ Neld ngãi kad lan horr kadkarig kɨjakɔ admɨn, kɨta a san dã, na Bɨraɓe ngah ronel kam nyagt'n non al. Tajigla Bɨraɓe a gah dɔ majalt lod, a nda ɔjd kɨta ɗagootalg lod, a telɨn kɨ dɔning Ejipt't gog.

¹⁴ Kam Israel oi dɔ Ngeɗan, na ɗa kuj kõɓeg kɨtan. Juda kaa ne, ɗa ɓebog kɨngang kɨdɔtdɔt, na m'a m'lahorr dɔ ɓebogt loa, a õ kuj kõɓeg loa mugɨj.