Oje 7 - Maktub Ta Kumkajir

Bɨraɓe la ta dɔ Israelt ɓaitɔ

¹ Bɨraɓe el an; lon m'ndig yoot Israel a ne, ɗagootal lo Epraim kɨ majal lo Samari ĩn kɨ tee dɔ, kɨta ndɨ ɗan nya kɨgo lo ndokumt, ngéɓoogg ndɨ andɨn kam kujgt, ngékumɗobg ĩn dɔ ɗobgt.

² De kɨ gaa kamɨnt an: M'ger kad ĩn ngeɗa nya kɨmajal goto Na tajigla kɨlaɗadg kɨmajal gugɨn dɔd, majalg lod ĩn nomt.

³ Adɨn ronel ngar kɨtakul majal lod kɨ ɗa, takɨbal lod tɔ ad ronel mbaiɓeg.

⁴ Ĩn ngéɗakaya tube, nyurkõ lod tɨngabil tit pur ngeɗa bɨnã kɨ lɔi ɗa ad tɨnga, na nya ta kɔsɨ ta kir horr kɨnat, mbã kad bɨna kɨ lɔi ɓai kamtã.

⁵ Ndɔ ɗa naht lo ngar loj mbaiɓeg ĩn mõi kɨta kasɨnduu kɨ ɗad ngãi. Ngar nda ron nat kɨ ngégo deg.

⁶ Kam ngela ta ber, wong i kamdt ndɔ mbã loti; loti a ne, tɨngabil tit ndõ horr be.

⁷ Ĩn tube tɨngabil tit pur be, ndɨ õn ngégangtag lod mugɨj. Ngarg lod tube son, kɨkɨɗa kudt kɨ ko kɨdɔmt goto.

⁸ Epraim burɨna kɨ girrdeg kɨ dang dang, i tit bɨna kɨ lahoro kɨkanj tel gida be.

⁹ Mbahg taan tɔg Epraim, na ĩ kɨɓe ger al. Bisɨdɔa nda kɨɗakɨɗa, na oo al.

¹⁰ Dɔngang lo Israel ndɨ manaj kɨ majal dɔat; telɨn kɨro Bɨraɓe Luwaht lod al. Ke nyag ɗan nya titbe kaa, sahna al.

¹¹ Epraim i tit derr kɨ kurdɔa oi, gosɨ loa goto tɔ. Kun Ejipt kad ɗa sen, aw Asiri sah ɗa sen.

¹² Na lon ndɨ awɨn a ne, m'a m'la band lom dɔdt m'a m'ad'd tuson tit yelg kɨ dõ, m'a m'nda m'ɔjd kɨgo tat'n ug elɨnd kam kawnagt lod.

¹³ Beto lod kɨta ãimɨn udɨn mut. Tuj a so dɔdt kɨta tamɨn ɗɔɔ. M'ndig badɔd, na elɨn takɨbalg dɔmt.

¹⁴ Kon kɨdɔmt kɨ ngarkamd al, na tõn ɗusɨɗusɨ dɔ tɨratodt. Na jan rod kɨ nya ad tee ndɨna Kad ngahn nyako kɨ kasɨnduu kɨkij, na tamɨn ɗɔɔ, na ɗan nya'n m'ndig al.

¹⁵ Mĩ la m'ndood ye, mad kag jid ngang, na ɔjɨn ta kɨmajal dɔmt.

¹⁶ Telɨn kɨ ro yot, na awɨn kɨ ro Ngetɔitɔit al. Ĩn tit gãkɨrã kɨ ad kɨrã tee kɨɗingg al. Mbaiɓeg lod a son ta kiyaɗɔɔt kɨta gan buro kɨ tad. Nya'n non a tel nyàgod dɔning Ejipt't.