Oje 6 - Maktub Ta Kumkajir

¹ Elɨn anan: Ad kɨ telɨn kɨ ro Bɨraɓe kɨta tɔrrji huthut, na a tel yootj; ndaj kɨ do, na a tel ndom do loj.

² Go ndɔt kɨjoo a telj kumkajirt gog, na ndɔt kɨkõmɨta a ɓai sej kad kɨ ndɨ kɨ dɔj dõ nõat.

³ Ad kɨ gerɨn. Ad kɨ sahn ger Bɨraɓe. Rota, a tee tit kɨ bijalo kɨ ɓai wɔ, a ɗe rojt tit man ndii kɨ ed be, tit man ndii kɨ ta ɓalndɔt kɨ nyom dɔning.

⁴ Na Bɨraɓe turj an: A. Epraim, m'a m'ɗa sei ɗi a? A. Juda, m'a m'ɗa sei ɗi a? Kɨta ɗamaj losɨ i tit buu kɨ la kɨsĩ, ke tit tal kɨ a ur kɔ tentenbe nõ.

⁵ Kɨtɔ 'nten la m'ndadɨn mbukɨmbukɨ kɨtakul ngékelta kɨ ta Luwaht, m'tɔld kɨ ta kɨ tee tamt, na takɨgang lom ndɨ tee tit kunj be.

⁶ Kɨtɔ m'ndig nyaɗa kɨdenesew, na kadkari kɨjakɔ al m'ndig ger Luwah tɔi kadkarig kɨlahorrt kɨɗaibe.

⁷ Na mbelɨn kɔd tit Adam be, ĩn ngéɗasem denesew.

⁸ Galaad i ɓebo lo ngéɗamajalg, mosɨ deg tuso dɔ ɗobgt loa.

⁹ Ngéjamosɨ kadkarig ndan rod nat, tɔlɨn ngétɔi ɗobo kaw ɓebo Sikemt. Ã, tube ĩn ngékumɗobg.

¹⁰ M'oo nya kɨmajal ngãi ku girrdegt kɨ Israel. Epraim ɗakaya. Israel yerr kɨ ron.

¹¹ Ĩ tɔ Juda, m'gang ndɔ gangta dɔit tit'n hã ɔrrɨn ne ndɔ ja nyakõɓe. Lon m'a m'ndig kad m'tel kɨ deg lom ɓeɓert.