Oje 5 - Maktub Ta Kumkajir

Luwah a nda ɔj Israelag kɨta kaya lod kɨ ɗa

¹ Ĩn ngéjamosɨ kadkarig, oon dɔ ta 'nten. Ĩn ngékɨɓe lo Israel, i nelɨn mbisɨ. Ĩn ngékɨɓe lo ngar, oon dɔ ta. Takɨgang i dɔsɨt kɨta ĩn gum kɨya kam ɓet kɨ Mispa ĩn band kɨ dɔ mbalbo Tabort.

² Kɨtakul kadkarig lod kɨjakɔ ngétaɗɔɔg udɨn yudum kam tɔidɔtat, na m'a m'nda m'ɔjd tube.

³ M'ger Epraim, na Israel asɨ yaron romt al kɨta tajigla ĩ Epraim, i ɗakaya, na Israel yerr kɨ ron.

⁴ Kɨlaɗad ɔgd tel kɨ ro Luwaht lod kɨta ndil ɗakaya i kamdt, na gerɨn Bɨraɓe al.

⁵ Dɔngang lo Israel manaj dɔat takumat. Israel kɨ Epraim a tuson kam ɗagootalt lod. Juda tɔ a so nat sed.

⁶ A awɨn kɨ batg lod kɨ mangg lod sahn Bɨraɓe, na a ngahna al; Bɨraɓe ɔrr ron rodt kɔ.

⁷ Ĩn ngéɗadenesew al kɨ Bɨraɓe kɨta oojɨn ngang'n ĩn loa al. Tajigla Bɨraɓe a nujd kɨ nyamajg lod tube kam naht kɨ kɨɗabe.

⁸ I kunɨn towɗɔɔ kam ɓet kɨ Gibea. I kunɨn brunj kam ɓebot kɨ Rama. I udɨn ɓi kɨ kamɓet kɨ Bet Ayent. Benjami, madngétaig ndɨ ɗen gidt nõ.

⁹ Epraim a tel gootɓe ndɔ ndakɔjt. M'la mber ta nya kɨje'n a ɗe dɔ girr Israelagt.

¹⁰ Mbaiɓeg kɨ Juda'n ĩn tit deg ngéndɔɔt kɨ ɗob nin ndɔɔg lod be. M'a mad wong lom ũ dɔdt tit man be.

¹¹ Epraim i kam darondot, roa oi yelel girr takɨgangt, kɨta ndig kaw go nyagt kɨpãbe.

¹² Na mĩ tit kɨɗukɨsɨ kɨta Epraim, m'a mĩ tit do kɨɗa ɓi be kɨta deg kɨ dɔningt kɨ Juda be.

¹³ Epraim oo mõi lon, na Juda oo dɔ lon tɔ. Kamla Epraim aw Asiri, la kɨla ro ngar Yaredt, na ngar'n non a asɨ yootsɨ al, a asɨ kad do losɨ ed al tɔ.

¹⁴ Kɨtɔ mĩ Bɨraɓe mĩ tit tubo be kɨta Epraim, mĩ tit ngon tubo kɨta deg kɨ Juda. Mĩ m'a m'tɔrrd huthut, na m'aw, m'a m'ɔid, na de mad kɨ a tad jimt goto.

Israelag ndig telɨn kɨro Bɨraɓet kɨ kamd kɨjoo

¹⁵ M'a m'tel m'aw londɨmt gog mbã kad gerɨn ɗagootal lod, na a sahn takum'm; a sahmɨn dan kamkɔlt lod, anan: I ɗen, ad kɨ telɨn kɨro Bɨraɓet.