Oje 4 - Maktub Ta Kumkajir

Bɨraɓe aw kɨ ta kɨ deg kɨ Israel

¹ Ĩn Israelag, oon dɔ ta lo Bɨraɓe. Kɨta Bɨraɓe aw kɨ ta dɔ ngendɨ dɔningt'n ɗan. Nyaɗa kɨro goto ke kamkẽ goto ke ger Luwah goto dɔningt'n ɗan.

² Na nda yo dɔ degt, kɨ takɨbal kɨ tɔl deg, kɨ ɓoog, kɨ sah dekɨdẽg kɨ ɗa ngaw. Deg dan kumna ndo, na tɔlɨn deg kɨdɔtdɔt.

³ Kɨtɔ 'nten la dɔning'n ɗan hɔndo, ngendɨt tɔ rod tut kurum nat kɨ dãg kɨmut kɨ yelg kɨ dõ. Ke kanjg kɨ kam bahbot goton.

⁴ Na ot kad de mad kɔl kɨ madɓen. Kɨ de mad un dɔ madɓen al tɔ. Kɨta ĩ ngejanyamosɨkadkari la m'ndɨ m'kɔl sei ye.

⁵ A i ga njai gigt dan kàda. Ngekelta kɨ ta Luwaht a gan njan gigt nat sei kondɔ. M'a m'tɔl kõi tɔ.

⁶ Deg lom nujɨn, kɨta nyager duud. Kɨtɔ i mbet nyager lom ye, mĩ kaa m'mbet kad i ngejanyamosɨkadkari lom gog ta, na tit'n hã kami oin dɔ ta lo Luwah loi ye, mĩ tɔ kamm a oi dɔ nganit ho.

⁷ Lon deg bɨlan kɨdɔtdɔt ye, ɗan majal kɨdɔtdɔt ndoormɨm ne tɔ. M'a mad kɔsɨgon lod tel rosɔl.

⁸ Ngahn nyasad kam majalt'n deg lom ɗan, nyur õd kɨta ɗagootal lod.

⁹ Na tit'n hã deg ɗan ne nya ye, titbe tɔ la ngéjamosɨ kadkarig ɗan ne nya ho. M'a m'nda m'ɔjd kɨgo ɗob nyaɗadt m'a m'ɓad asɨ ta kɨlaɗad.

¹⁰ A san nya, na a ndanɨn al; a sahn dekɨdẽg ho ɗan ngaw kɨkanj kooj na, kɨta nyan Bɨraɓe kɔ nõ sahn go kaya.

¹¹ Nyur kasɨnduu kɨ kasɨnduu kɨkij tuj hangald.

¹² Deg lom ndɨ ndɨjen takɔj ro kag yogt lod na kag tɔsɨ lod la ndɨ eld ta, kɨta ndil ɗakaya ud mut, ad nyan Luwah lod kɔ na ɗan kaya.

¹³ Deg jan kɔ kadkarig tasom mbalbogt na lan horr mbikam kɨkootmbĩ dɔ doorlogt, girr kag dilg kɨ kag ɓitag kɨ kag kɨrãg kɨta ndil kag'n non maj, Kɨtɔ 'nten ngansɨg kɨdẽ ɗan kaya, na ngan kɨmandg kɨ taan ngaw kij sahn ngawg kɨɗang.

¹⁴ Na lon ngansɨg kɨdẽ ɗan kaya, lon ngan kɨmandg kɨ taan ngaw kij sahn ngaw a ne, m'a m'nda m'ɔjd al, kɨta dekɨdɨngã kɨdɔd tɔn rod go kaya dekɨdẽgt, jan kɔ kadkarig nat kɨ kaya dekɨdẽg. Deg'n ɗan kur dɔd woi, ndɨ awɨn kɨ lo nujkɔt.

¹⁵ A. Ĩla Israel ndɨ ɗakaya a ne, ot kad Juda ɗa titbe kad ta so dɔat. Ot kawɨn gilgalt. Ot kal kawɨn Bet Ayent. Ot ndan yo, Kana: tit'n hã Bɨraɓe ndɨn kɨ dõ.

¹⁶ Kɨtɔ Israel dɔa ngang tit ngon mand mang kɨ ngedɔ ngang be. Tajigla Bɨraɓe a uld tit kõ bat lot kɨtat a?

¹⁷ Epraim tĩnyan na kɨ yog, i nyana titbe.

¹⁸ Ãin kasɨ, kamla ɓain kɨ ta kayat kɨ ɗa tentenbe. Mbaiɓeg lod ndigɨn rosɔl tɔi kɔsɨgon.

¹⁹ Nélbarwãi a ɔid girr bɔgɨnt tube kɔ. Rod a sɔld kɨta dɨngɨr kadkarig kɨjakɔ lod.