Oje 2 - Maktub Ta Kumkajir

¹ Ke titbe kaa ne, kɔr Israelag a i tit ngár kɨ ta bahbot kɨ de a asɨ mbɔj ke da kɔra al. Kam lot'n kete deg elɨnd anan: ĩn deg lom al ye, deg a elɨnd tɔ anan: ĩn ngan Luwah kɨ kumkajir.

² Ngan kɨ Juda kɨ Israela a kawɨn na kɨnat, a ndan kɨbo kɨɗa dɔdt, na a teen kam dɔning ɓert, kad taan kamɓe kɨta ndɔ lo Jijrel a i ndɔ kɨbobe.

³ Elɨn ngankõsɨg kɨdɨngã anan: Ami ad i: Ĩn deg lom. Elɨn kõnansɨg anan: Ruhama ad i ngahn kookumtondo.

Israel i dekɨdẽ kɨ ngom ron al

⁴ I lan ta dɔ kõsɨt, i teen kɨ girr majal lo kõsɨ. I teen kɨ ta loa kɨ tɨga kɨta i nẽm al, na mĩ ngawa al tɔ. Ela kad ɔrr kaya kɨ ɗa takumt kɔ. Ela kad ɔrr ngaw kɨ ɗa mbɨna mbaant tɔ.

⁵ Titbe al a ne, m'a m'ngĩ kub roat mad roa i kari tit kɨ ndɔ koojat be, M'a m'ada tel tit kɨ dɨlalo be,

⁶ m'a m'ada ndɨ kam dɔningt kɨ tut kurum, m'a mad kɨndah tɔla. M'a m'ookumtondo lo ngana al kɨta ĩn ngan kɨ kooj lo ɗakayat.

⁷ Kɨtɔ kõd ɗakaya kõd kɨ ngekoojd ɗa nya kɨrosɔl. El an: M'a m'aw go ngéngawgt lom, ĩgɨn ndɨ admɨn nyasam kɨ man kɨ ngekadɨm kub bĩ bat kɨ kub lẽ lom kɨ yib kɨ nyakãi.

⁸ Kɨtɔ 'nten mĩ Bɨraɓe m'a m'ut ta ɗob loi kɨ kong, m'a m'ɗa ndogbɔrr kad i ngah lo tee kɨ tɨga al.

⁹ A tuɓa go ngéngawg lon, na a ngahd al. A sahd, na a ngahd al. Kamla a el an: M'a m'tel m'aw ro ngawɨmt kɨdasa, kɨta maɗi i soomt tɔi kɨ tajigla.

¹⁰ Ger kad i mĩ Bɨraɓe hã m'ada nyako, kɨ kasɨnduu kɨ kij kɨ yib al Ger kad i mĩ hã m'ada larjã kɨ lɔr ngãi kɨ tɔi al, Na ɔin kad n'ɗan ne yo, kɨ n'adɨn yo Baal.

¹¹ Kɨtɔ 'nten m'a m'taan nyako lom gog kaglo tetat, m'a m'taa kasɨnduu lom gog kaglo ja kand nduut. M'a m'tɔrr kub bĩ bat lom kɨ kub lẽ lom roat kad ĩ kɨ ron kari.

¹² Na tajigla m'a m'la rosɔl 'nten dɔat takum ngéngawgt loa. De kɨ a ug ɔrra jimt goto.

¹³ M'a mad ronel loa, tube goto kɨ ɗa nahg loa kɨ ɗa ronel kij nahg loa, kɨ ɗa ronel kɨ ndɔ taakòg loa kɨ nah kɨ ɗa kɨ dang dang kɨ ɗa kɨ kagloa m'a m'ad'd goton.

¹⁴ M'a m'tuj ndɔɔ nduug loa kɨ kag mbaiɓoodg loa ĩn elta lod an: Oon nyangah'n ngéngawg lom admɨn Mĩ Bɨraɓe m'a m'ad'd telɨn kú, na dãg kɨmut a san tube kɔ.

¹⁵ M'a m'nda m'ɔja kɨta kaglo tube'n ɗa hilen yo Baalg, lon lahor mbikam kɨkootmbĩ nõdt, na pare ron kɨ ninga kɨ medkɔsɨg lon, kad ãi ngɔd go ngéngawt lon, na kama oi dɔm. Takel Bɨraɓe.

¹⁶ Kɨtɔ 'nten, Oo, m'a m'goola m'aw sia kam dɨlalot, m'a m'ela ta kɨ sɔl kama.

¹⁷ Nu la m'a m'ada ndɔɔ nduug loa kɨ maɗi, na m'a mad hollo kamkɔl teltabit nya ndahkamdɔt. Nu la a ɔsɨ pat tit, kɨ kam ndɔgt'n ĩn ngomand, tit ndɔ teea kɨtɨga kɔ Ejipt't be.

¹⁸ Ndɔt'n non, kel Bɨraɓe, a i kunɨm ngawi, na a i kunɨm Baal lom ad i ngeem al.

¹⁹ M'a m'ɔrr tɔ yo Baalg taat kɔ, kam a oi dɔd ad a kun tɔd gog al.

²⁰ Ndɔt'n non m'a mad kunkɔ to mbɨnasɨt kɨ dãg kɨmut, kɨ yelg kɨ dõ, kɨ nyag kɨ kɔr kɔd'd ber. M'a m'tet gãkɨrã kɨ kiyaɗɔɔ, ɗɔɔ a goto, na m'a mad i ndɨn kɨ lapia.

²¹ M'a m'taai nẽmt kɨgo nyaɗat kɨdenesew kɨ kɨgoɗobat kɨ kam kamkẽt kɨ kookumtondo.

²² M'a m'taai nẽmt kɨgo nyaɗat kɨro, na a i ger Bɨraɓe.

²³ Ndɔt'n non, m'a m'oo dɔ kel Bɨraɓe, m'a m'oo dɔ ko lo dɔrãg, dɔrãg tɔ a oon dɔ ko lo dɔning kad ndii ed,

²⁴ dɔning a oo dɔ ko lo nyako kɨ kasɨnduu kɨ yib, ĩn tɔ a oon dɔ ko lo Jijrel.

²⁵ M'a m'duw Israel tit kum nyako be kam dɔningt'n ɗan, kɨta m'a m'ookumtondo lo Lo Ruhama; m'a m'el Lo Ami m'an: Ĩn deg lom, na deg lom a elɨn anan: Mĩ Luwah lod.