Oje 13 - Maktub Ta Kumkajir

Oje elta tujɨn ɓet a so dɔ Epraimt kete

¹ Lon Epraim elta ye, deg ɓoolɨn kɨ rondad. Epraim i kɨ tɔi kɨ dõ kam Israelt, na ta hɔa ad oi kɨta ɗa yo Baal.

² Tajigla ndɨ ɗan majal kɨdɔtdɔt, nyẽ larjã ɗan ne ɓakumta nyag kɨta rod, ɗan kɨgo goosɨt lod, yog'n non deg ɗand kɨgo kɔjtaɗagt lo ngégoosɨ pel nya. Elɨn anan: Ad deg lan kadkarig kɨjakɔ adɨnd. Ad deg njun ta yo mangg'n non.

³ Kɨtɔ 'nten a ĩn, tit buu kɨ la kɨsĩ ritit, ke tit tal kɨ a urr kɔ tentenbe, ke tit tisa kɨ nél ndɨ ɔia kɔ dɔ gart, ke tit sahorr kɨ ɓa buro kujt be.

⁴ Mĩ Bɨraɓe Luwah loi maɗi nu dɔning Ejipt't mbã tajigla. I ger Luwah mad kɨɗang al, na mĩ tã, Ngekaj mad kɨɗang goto, na mĩ tã.

⁵ Mĩ la m'geri kam dɨlalot, kam dɔningt kɨ tut kurum ye.

⁶ Na lon san nya ye, ndenɨn; kamd nden, kamla dɔd sir. Kɨtɔ 'nten la kamd oin dɔm ye.

⁷ Kɨtɔ 'nten m'a mĩ tit tubo be rodt m'a m'um ɗobd tit kag be.

⁸ M'a m'so dɔdt tit kõ dã oursɨn deg ɔin ngana be, m'a m'tɔrr dãd huthut, m'a m'lad yalɨm tit kõ tubo be, tit'n hã, dãg kɨmut a tɔrrɨnd huthut.

⁹ Ĩ Israel, nya'n nuji kɔ laten: i taam ɗɔɔ mĩ'n m'asɨ ɗaa sei.

¹⁰ Ngar loi i ɗah a? Kad aji kam ɓebogt loi tube. Ngégangtag loi kan hã elɨn ta an: Adj ngar kɨ mbaiɓeg ye, ĩn ɗah a?

¹¹ Lon wong ɗam ye, m'adi ngar; kamla lon wong tɔlmɨn sɔkɨr dɔit ye, m'ɔrra kɔ.

¹² Ɗagootal lo Epraim i kɨndang kam maktubt kamla dõ maktub'n non majal loa i kɨ ngomd ta dang tɔ.

¹³ Kamkil a ɗaa tit'n tokooj a ɗan dekɨdẽ be. Epraim i ngon kɨ terr loa goto, kɨta kaglo koojat ndig tee kam kõnt al.

¹⁴ M'a m'badɔd kam tɔgt lo lo kɨ koo a? M'a m'ug m'ɔrrd ji koit a? Ĩ koi, tɔg yog loi kɨ tɔl deg i ɗah a? Ĩ lo kɨ koo, tɔg nuj nya loi i ɗah a? Kõkam kɨtɔsɨ goto romt.

¹⁵ Ke neni Epraim ngah majkurr ku ngankõnt kaa ne, nél kɨ la ko loɓakàdt a ɗe, ko kɨ ta Bɨraɓet a ɓai kam dɨlalot, a ad mang loa kɨɓa yin ndã, a ad man goto kam bulomangt loa tɔ. Madngéta a ɔi nyamaj loa kɨɗen kɨ gata i ngãi kam kuj ngom nyamajgt loa ad goto.