Oje 12 - Maktub Ta Kumkajir

Luwah ndáng Epraimag kɨta ndokum kɨ ɗa ta kõ.

¹ Epraim gug dɔm kɨ takɨbalg, ngékɨɓe lo Israel gugɨn dɔm kɨ ndokum, na Luwah ger Juda ɓaitɔ, i ngeɗa nya kɨro nõ Ngekunjɗangt.

² Nyasa lo Epraim i nél, ndɨ tuɓa go nél kɨ loɓakàdt, kɨ ndɔ kɨɗen ndɨ el takɨbalg kɨdɔtdɔt, ɗa ta kõ ngãi tɔ. Epraim la kɔn nat kɨ Asiri, ndɨ aw kɨ yib Ejipt't.

³ Bɨraɓe aw kɨ ta kɨ Juda, a nda ɔj Jakob kɨta ɗob nyaɗaa, a baa kɨgo kɨlaɗaat.

⁴ Jakob i kam kõnt ɓaitɔ la hɔ gid ngonkõn ye; na lon tel dekɨdɨngã, ɗɔɔ kɨ Luwah.

⁵ Rota, Jakob ɗɔɔ mɨlla kɨ malaika na tetaɗɔɔ nõ na kɔa kɨ ɔjɨn kamkẽ. Ndɔd Luwah Betelt, nõbe la Luwah elj ta tit.

⁶ Bɨraɓe Luwah Ngekoosɨg, ĩla tɔa i Bɨraɓe ye.

⁷ Ĩ, i tel kɨro Luwaht loi. I hɔ nyaɗakɨro loi kɨ nyaɗa kɨdenesew. I nda kami dɔ Luwaht loi kɨndɔgndɔg.

⁸ Epraim i tit ngéɗagat kɨ nya mbɔj kɔinya kɨngom i jiat. Ndokum nela ngãi.

⁹ Epraim el an: rota, mĩ ngemaj, m'ngaa nyamajg ngãi. Na nyangahg'n non kɨɗa kɨ a nãi jiat goto kɨta ɗagootal loa

¹⁰ Mĩ Bɨraɓe Luwah loi maɗi nu dɔning Ejipt't mbã tajigla. M'a mad i ndɨ kam kujkubgt gog ɓaitɔ tit kɨ kam ndɔ ɗa nahgt kɨmaɗi kɨ m'gang ndɔd.

¹¹ M'a m'elta kɨ ngékelta kɨ ta Luwaht, m'a m'ad'd oon nya kam ndilgt kɨ nja natnatbe na kɨtakul ngékelta kɨ ta Luwaht m'a m'elɨn terrtag.

¹² Ĩla ɗagootal i dɔning Galaadt a ne, rota ngendɨt a ĩn deg kɨpãbe. Ĩla lan bɔw mangg kadkarigt kɨjakɔ Gilgalt a ne, dɨngɨr kadkarig lod a telɨn duw mbalg mbɨna ɓaigt kam ndɔɔgt.

¹³ Jakob ãi aw dɔning Aramt, nu la Israel ɗa kɨlaɓert kɨta taan dekɨdẽ, ngom batg kɨta taan nẽn.

¹⁴ Kɨtakul ngekelta kɨ ta Luwaht la Bɨraɓe teen kɨ Israel dɔning Ejipt't kɨtɨga, kɨtakul ngekelta kɨ ta Luwaht la Bɨraɓe ngomɨn tɔ ye.

¹⁵ Epraim sɔkɨ Bɨraɓe ad wong tɔla sɔkɨr. Bɨraɓe loa a ad mosɨn ũ kɔ i dɔat na a ad rosɔl loa tel so dɔat gog.