Oje 11 - Maktub Ta Kumkajir

Ta õ kam Luwah ngãibe kɨta deg lon

¹ Lon Israel i ngon kɨdu ɓaitɔ ye, m'tara m'kun ngonɨm kɨdɨngã kad tee kam dɔning Ejipt't kɨtɨga.

² Na lon m'kund kɨ nja natnatbe, ɔrrɨn rod kɔ sãi sem kɨ nja natnatbe tɔ. Lan kadkarig kɨjakɔ adɨn yo Baal lan horr mbikam kɨkootmbĩ adɨn yog tɔ.

³ Na mĩ la m'ndoo Epraim ndia ye, m'ɔid jimt, na gerɨn ta kad mĩ ngeyootd al,

⁴ Kɨtakul kõkam kɨ tar la m'ɔrrdɨn gomt, tit'n de a ɔrrɨn nyakul gont kɨ kɨla ye be, Mĩ rodt tit de'n ad jug lod to soot, m'ned kɨber m'ad'd nyasa,

⁵ A telɨn kɨ dɔning Ejipt't, na Asiri a ɗa ngar dɔdt, kɨta mbet telɨn kɨromt.

⁶ Kɨyaɗɔɔ a so dɔ ɓebogt lod, a tet hand tabitg lod, a tɔld kam kuj ngomd dɔ ɓegt lod,

⁷ Kɨtɔ kɔjtaɗag lod kɨmajal Deg lom ndig tɔrrɨn rod romt kɔ; kunɨnd kad ɗen ro Ngetɔitɔit, na kɨkɨɗa kudt kɨ tɔia kɨ dõ goto.

⁸ Epraim, to rom ngãi kad M'nyai kɔ. Israel, to rom ngãi kad m'lai ji madngétaigt. To rom ngãi kad m'teli tit ɓe kɨ Adma. To rom ngãi kad m'ɗa sei tit'n m'ɗan kɨ ɓe kɨ Seboim. M'ndɨnga ndo, ta õ kamm ngãibe kɨtɔi.

⁹ M'a m'ɗa sed kɨgo wongt lom kɨtɨngabil al, m'a m'nuj Epraim gog al ta, kɨta mĩ Luwah na mĩ de al, mĩ Ngekunjɗang dãsɨt, m'a m'ɗe rosɨt kɨ wong al.

¹⁰ Bɨraɓe a ko tit tubo be, na nganag a awɨn goat, ã, Bɨraɓe a ko, na nganag a ɓain ko lo kudkàdt, a ɗen kɨ rondad.

¹¹ A ɓain dɔning Ejipt't, a ɗen kɨ rotĩd tit yelg be, ke tit derrg ko dɔning Asirit, na m'a m'ad'd telɨn kɨ ɓeg lod gog, kel Bɨraɓe.