Oje 10 - Maktub Ta Kumkajir

Kõɓe lo Israel tuj

¹ Israel i dĩndu kɨ dɔjia ɓa, al ngãi tee kɨ kand ngãi tɔ. Lon and kɨdɔtdɔt ye, ɗa dɨngɨr kadkarig kɨjakɔ kɨdɔtdɔt tɔ. Lon maj urr dɔning loa ye, ɗa kagyog lon ad majɨn ngãi tɔ ho.

² Kamd i joo, tajigla awɨn kɨ ta dɔdt. Bɨraɓe a tɔsɨ dɨngɨr kadkarig kɨjakɔ lod tɨla kɨber, a nuj kagyog lod tɔ

³ Na tajigla ndɨ elɨn anan: Ngar loj goto kɨta kɨ ɓool Bɨraɓe al, na ngar a ɗa ɗi kɨtaj a?

⁴ Ndɨ elɨn tag kɨkari, ndɨ unɨn kɔd kɨ yokɨnda kɨngom, Deg awɨn kɨ na kɨ ta lo gangtat nya 'nten ɓai kudt tit turo kɨ ɓa mbɨna ɓaigt kɨ kam ndɔɔt be,

⁵ Ngéndɨ Samari ndɨ ɓoolɨn kɨta tujɨn a tee dɔ yo ngon mang lɔr kɨ Bet-Aben, ngéjamosɨ kadkarig a nõna, a nõn kɨta kɔsɨgon loa kɨtɔi kɔ.

⁶ A awɨn sia dɔning Asirit, adɨn ngar kɨbo kadkarit. Rosɔl a tee dɔ Epraimt na rosɔl a ɗa Israel dɔ yot loa.

⁷ Na Samari taa, ngar loa a nuj tit ngon gind kag kɨ to dɔ mant.

⁸ Doorlog kɨ Bet Aben, log kɨ Israel ɗa majalt ye, a tujɨn. Kong kɨ ngarg a ɓan dɔ dɨngɨr kadkarigt kɨjakɔ lod. Kamla a elɨn mbalbog anan: Utɨn dɔj. A elɨn doorg tɔ anan: I son dɔjt.

⁹ A. Israel, i hɔ ɗa majal, mba girra i ndɔgt'n i ɗan majal Gibeat. I hɔ tɔgi bá kamt. Ɗɔɔ a tee rodt Gibeat ale?

¹⁰ Lon kamm ndig a ne, m'a m'nda m'ɔjd. Girr deg kɨ dang dang a kawɨn na ndoorɨnd kaglot'n m'a m'nda m'ɔjd kɨta ɗagootal lod kɨjoo nõ.

¹¹ Epraim i tit ngon mand mang kɨ ndoona kɨla loa woi, Kɨla ɓa nyako nela, m'nya kɔa kɨmaj mad to kari. Na tajigla m'a m'la jug kɔ Epraimt. Juda a ndɔɔ dɔning, Jakob a ɔrr herse ad i pusɨ ganing.

¹² I duwɨn nyaɗa kɨdenesew kɨta rosɨ. I tetɨn kand nyaɗa kɨgo lo kamkẽt. I gan ning ndɔɔ losɨ kɨ to kari. Kɨta kaglo asɨ kad i sahn Bɨraɓe, kad ɗe rosɨt kɨ nyaɗa kɨdenesew tit man ndii be.

¹³ I duwɨn majal, i tetɨn ɗagootal, i san kand takɨbal, i ɓan kul tɔgsɨ i ndan kamsɨ dɔ kɨrãɗɔɔgt losɨ.

¹⁴ Kɨtɔ 'nten la kah ɗɔɔ a ko dan degt loi, kuj ngomdɔɓeg loi tube a nujɨn kɔ, tit'n hã Salman nujɨn Bet Arbel, ndɔ ɗɔɔt rigɨjɨn kõ ngang nat kɨ ngandg tu,

¹⁵ Ĩ Betel oo, a ɗan sei titbe tɔ kɨtɔ majal loi kɨngãi. Lon bijalo a ɓai wɔ a ne, ngar kɨ Israel a goto kɔ.