Oje 1 - Maktub Ta Kumkajir

Oje taa dekɨdẽ kɨ ngeɗakaya, na ooj sia ngang

¹ Ta lo Bɨraɓe'n el Oje ngon Beeri kaglot lo ngar Ojias kɨ Jotam kɨ ngar Akaj kɨ Ejekias ngar kɨ Juda. Kaglot'n non Jeroboam ngon Joas i ngar kɨ Israel.

² Kete kad Bɨraɓe elta Oje kad el girrdeg lon ye, ta'n Bɨraɓe el Oje laten: Aw i taa kaya dekɨdẽ; ooj ngang kɨ kaya kɨ dekɨdẽ'n non, kɨta deg kɨ dɔningt ɗa ɗan kaya kɨdɔtdɔt, ad nyan Bɨraɓe kɔ.

³ Taa ne, Oje aw taa Gomer ngon Diblayim. Gomer nden ngon, na ooj kɨdɨngã ada.

⁴ Bɨraɓe el an: I ndah tɔa Jijrel ad i: Luwah a tɨnda deg tĩ kɔ, kɨta kaglo nãi tẽbe kad m'nda ngɨra mosɨ kɨ kũ kɔ kam hollot kɨ Jijrel dɔ ngékɨɓet lo Jehu, m'a mad kõɓe lo ngékɨɓe lo Israel tɨga.

⁵ Ndɔt'n non ɓet m'a m'tet gãkɨrãg lo Israelag kam hollot kɨ Jijrel.

⁶ Gomer nden ngon kɨɗang ɓaitɔ, na ooj ngon kɨdẽ. Bɨraɓe el Oje an: I ndah tɔa Lo Ruhama, ad i: Kookumtondo goto, kɨta m'a ɗa ta kookumtondot lo girrdeg kɨ Israelt gog al, m'a m'nyago majal lod kɔ al.

⁷ M'a m'ookumtondo lo girrdeg kɨ Juda, m'a majd kɨtakul Bɨraɓe Luwah lod. Na m'a majd kɨtakul gãkɨrã ke kɨ kiyaɗɔɔ ke kɨ ɗɔɔ ke kɨ sɨndag ke kɨ ngékal sɨndag al.

⁸ Lon Gomer ɔg mba Lo Ruhama a ne, Gomer nden ngon ɓaitɔ, na ooj kɨdɨngã.

⁹ Bɨraɓe el Oje an: I ndah tɔa Lo Ami, kɨta ĩn deg lom al, na mĩ Luwah losɨ al ho.