Dakɔr deg 4 - Maktub Ta Kumkajir

Kɨla lo Kehatiag

¹ Bɨraɓe elta kɨ Moij kɨ Aarõ an:

² I tɨdan kɔr Kehatiag ku Lebiagt kɨgo girrnoojdgt kɨ kɨgo girrkoojdgt,

³ i lan girra dɔ degt kɨ ɓal dɔmɨta mbã ɓal dɔmi, tube'n asɨn ta kɨlaɓer'n non kam kujkub ndɔdnat.

⁴ Oo, kɨlaɓer lo Kehatiag kam kujkub ndɔdnat laten: Kɨla koogo nyag kɨ kam lot kɨjaɓat kɨtɔitɔi.

⁵ Lon ndɔ asɨ kad ɓain lot'n non ye, Aarõ kɨ nganɨn a and ɔrrɨn kubganglo utɨn ne dɔ sund najkɨma.

⁶ Goot gog a lan ndar hang utɨn ne dɔa, na a lan palkub kɨkil musɨmusɨ dɔt, na lan kagg kɨ ngal kad sundt.

⁷ Kɨtɔ 'nten a lan palkub kɨ kil musɨmusɨ dɔ tabɨl nda bɨnat na a ndahn tasag dɔt kɨ nganbaig kɨ galg kɨ kopg kɨta kadkari nyakãi, kɨkũ kɔ na bɨna kɨndanõt a i dɔt kɨndɔgndɔg.

⁸ A lan palkub kɨkɨre pirɨr dɔ nyagt 'nten na a dɔn kɨ ndar hang kamla lan kagg kɨ ngal kad tabɨlt.

⁹ A unɨn palkub kɨkil musɨmusɨ utɨn ne dɔ kag nda lambag loa kɨ dɔgorag, kɨ bai kɔi buhoorag, kɨ ku yiba, kɨ nyag tube kɨta ɗan go lambag.

¹⁰ A ndahna nat kɨ nya ɗakɨlag tube kam ndar hangt na a ndahn dɔ nyatonyat.

¹¹ A utɨn dɔ dɨngɨr nar ɔrr kɨ palkub kɨkil musɨmusɨ, a dulon kɨ ndar hang kamla lan kagg kɨ ngal kad dɨngɨrt.

¹² A oin nyaɗakɨlag tube'n ndɨ ɗan ne kɨla kam lot kɨjaɓat, a ũnd kam pal kubt kɨkil musɨmusɨ, a dulo kɨ ndar hang kamla lan dɔ kagtonyat,

¹³ A ɔin buhoor kɨdɔ dɨngɨrt kɔ, na lan palkub kɨkɨɗe wor wor dɔt.

¹⁴ A ndahn nya ɗakɨlag tube'n ndɨ ɗan ne kɨlaɓer dɔt, ad i ngan jo ndah horrg, kɨ nyakɔsɨ dã, kɨ pelg, kɨ tasag, kɨ nyaɗakɨlag tube lo dɨngɨr, na a lan ndar hang dɔt na lan kagg kɨ ngal kad dɨngɨrt.

¹⁵ Lon Aarõ kɨ nganɨn tɨgan kɨla kutdɔ lo kɨjaɓat kɨ nyaɗakɨlag tube kɨ kam lot kɨjaɓat, na dɔkàd asɨ kad awɨn, got Kehatiag a ɗen kad unɨn, na a ɔdɨn nyag kɨja ɓat nõ al, na ɓeta oin. 'Nten la i kɨla lo Kehatiag kam kujkub ndɔdnat.

Kɨla lo Eleajar

¹⁶ Eleajar ngon Aarõ ngejanyamosɨ a oo go yib kɨta lamba kɨ nõkag kɨkootmbĩ kɨ kadkari nduj kɨndɔgndɔg kɨ yib kurdɔt. A oo go kujkub londɨ kɨ nyag tube kɨ kamt kɨ lo kɨjaɓat kɨ nyaɗakɨlag tube.

¹⁷ Bɨraɓe elta kɨ Moij kɨ Aarõ an:

¹⁸ Ot nyan kad tɔlɨn girrkooj Kehatiag kɔ ku Lebiagt,

¹⁹ na i ɗan sed titbe kɨtɔkad ndɨn kɨ dɔd dõ na oin al lon a ndɔt'n kɨ ro nyagt kɨjaɓat kɨtɔitɔi. Ad Aarõ kɨ ngana ɗen, ɔjɨnd kɨla lod kɨɗa kɨɗa tube kɨ nya'n a ton,

²⁰ na Kehatiag a andɨn kad oon nyag kɨjaɓat nõ al, ke kad oon pit, na ɓeta oin.

Kɨla lo Gersoniag

²¹ Bɨraɓe elta kɨ Moij an:

²² I tɨda kɔr Gersoniag tɔ kɨgo girrkoojdt kɨ kɨgo girrnoojdt.

²³ I tɨda kɔrd, i la girra dɔ degt kɨ ɓal dɔmɨta mbã ɓal dɔmi, tube'n asɨn ta kɨlaɓer kam kujkub ndɔdnat.

²⁴ 'Nten la kɨlaɓer lo girrkooj Gersoniag, kɨlaɓer lod kɨ nyag'n a ton.

²⁵ A ton palkubg lo kujkub londɨ kɨ kujkub ndɔdna, nyakutdɔa kɨ nyakutdɔ kɨ ndar hang'n a lan dɔt kɨ kubganglo kɨ tabit kujkub ndɔdnat,

²⁶ palkubg kɨ natlot kɨ kubganglo kɨ tabit natlot'n gug dɔ kujkub londɨ kɨ dɨngɨr kɨ kɨlag lod kɨ nyaɗakɨlag tube.

²⁷ Kɨlaɓer tube lo Gersoniag a i girr tɔgt lo Aarõ kɨ ngana kɨ nyag tube'n a ton, kɨ kɨlaɓer tube'n a ɗan. A i nya nyag tube'n a ton jidt.

²⁸ 'Nten la i kɨlaɓer lo girrkooj Gersoniag kam kujkub ndɔdnat na kɨlaɓer lod ta, ngekoogoa i Itamar ngon Aarõ ngejanyamosɨ.

Kɨla lo Merariag

²⁹ A i tɨda kɔr Merariag kɨgo girrnoojdt kɨ kɨgo girrkoojdt.

³⁰ A i tɨda kɔrd, i la girra dɔ degt kɨ ɓal dɔmɨta mbã ɓal dɔmi, tube'n asɨn ta kɨlaɓer kam kujkub ndɔdnat.

³¹ Ĩgɨn ten la ĩn nyag'n a lan jidt kad ɗan kɨla lod i kad ton kɨta kɨlaɓer lod tube kam kujkub ndɔdnat. Barkagg lo kujkub londɨ kɨ kagg kɨ ngal, kɨ pilieg loa kɨ nya hɔag.

³² Pilieg kɨ gugɨn dɔ natlo kɨ nyahɔdg kɨ kagg kɨta dɔ kɨla tit kɨ kɨlag lod kɨ nyaɗakɨlag tube kɨ nyag kɨta kɨlaɓer'n non tube. A i tɨdan tɔ nyag tube kɨ i lan jidt kad ton.

³³ 'Nten la i kɨlaɓer lo girrkooj Merariag, kɨlaɓer lod tube kam kujkub ndɔdnat, ngekoogoa i Itamar ngon Aarõ ngejanyamosɨ.

Kɨlag'n sumba kad Lebiag ɗan

³⁴ Moij kɨ Aarõ kɨ kɨbog lo ngékawna tɨdan kɔr Kehatiag kɨgo girrnoojdt kɨ kɨgo girrkoojdt.

³⁵ Deg tube'n ɓald i dɔmɨta mbã ɓal dɔmi, tube'n asɨn ta kɨlaɓer kam kujkub ndɔdnat.

³⁶ Ĩgɨn tɨdand kɨgo girrkoojdt i 2 750.

³⁷ Ĩgɨn non la ĩn girrkooj lo Kehatiag'n tɨdand, tube'n ɗan kɨlaɓer kam kujkub ndɔdnat. Moij kɨ Aarõ tɨdan kɔrd kɨgo tat lo Bɨraɓe'n nda mbera Moij.

³⁸ Gersoniag'n tɨdan kɔrd kɨgo girrkoojdt kɨ kɨgo girrnoojdt,

³⁹ lan girra dɔ ĩgɨtɨn ɓald i dɔmɨta mbã ɓal dɔmi, tube'n asɨn ta kɨlaɓer kam kujkub ndɔdnat.

⁴⁰ Deg'n tɨdan kɔrd kɨgo girrkoojdt kɨ kɨgo girrnoojdt ĩn 2 630.

⁴¹ Ĩgɨn non la ĩn girrkooj Gersoniag'n tɨdand, tube'n asɨn ta kɨlaɓer kam kujkub ndɔdnat. Moij kɨ Aarõ tɨda ndɨ kɨgo mberkɨnda lo Bɨraɓe.

⁴² Deg kɨ girrkooj Merariag'n tɨdand kɨgo girrnoojdt kɨ kɨgo girrkoojdt,

⁴³ lan girra dɔ ĩgɨtɨn ɓald i dɔmɨta mbã ɓal dɔmi tube'n asɨn ta kɨlaɓer kam kujkub ndɔdnat,

⁴⁴ ĩgɨn tɨdan kɔrd kɨgo girrkoojdt ĩn 3 200

⁴⁵ Ĩgɨn non la ĩn girrkooj Merariag'n tɨdan kɔrd. Moij kɨ Aarõ tɨdand kɨgo tat lo Bɨraɓe'n nda mbera Moij.

⁴⁶ Lebiag tube'n Moij kɨ Aarõ kɨ kɨbog lo Israel tɨdan kɔrd kɨgo girrkoojdt kɨ kɨgo girrnoojdt,

⁴⁷ lan girra dɔ ĩgɨtɨn ɓald i dɔmɨta mbã dɔmi, tube'n asɨn ta kɨlaɓer kam kujkub ndɔdnat kɨ kad ĩn ngétonyag.

⁴⁸ Tubeg'n tɨdand kɔrd ĩn 8 580.

⁴⁹ Tɨdand kɨgo tat lo Bɨraɓe'n nda mbera Moij, na ɔj dekɨɗen kɨlaɓer loa kad ɗa kɨ nya kɨ kad tɔ. Tɨdand kɨgo tat lo Bɨraɓe'n nda mbera Moij.