Ngelamberta 9 - Maktub Ta Kumkajir

Tag terr goto ro koit

¹ Ã m'ga kamm dɔ nyagt'n non tube, m'sah girra tɔ. M'oo deg kɨ denesew kɨ ngeterrg, kɨlaɗad i ji Luwaht. De kɨ ger goto ke i tar, ke i kɔsɨta nyag tube ĩn nõdt ɓaitɔ.

² Nyag tube teen dɔ degt ta kɨɗabe, deg kɨdenesew kɨ ngeɗagootal, ngeɗamaj kɨ ngéɗamajalt deg kɨkarnyang kɨ deg kɨyerr, ngela kadkari kɨ ngela kadkari al. Ngeɗamaj i tit ngeɗamajal be, na ngendayo i tit de kɨ ngeɓool kunkɔ'n kɨ yo kɨ nda.

³ 'Nten i majal kɨ kam nyagt tube kɨ ɗan nya girr kàdt, nya kɨɗabe tee dɔdt tube. Ngarkam deg ɗoosɨ kɨ majal, na ɓood i kamdt lon ndɨn ne kɨ dɔd dõ, got oi awɨn kam lot kɨ Koo.

⁴ Kaglog tube kɨ de ndi'n dan ngékumkajɨrgt ye nya ndahkamdɔt loa i nõ kɨta bisɨ kɨ kumkajir majtɔi tubo kɨkɔi.

⁵ Kɨtɔ ĩgɨn ndɨn kɨ dɔd dõ gerɨn kad n'a n'oin, na ngékoig gerɨn nya mad al, nyabajid goto, kɨtɔ deg gan kamd dɔ ngékoigt al.

⁶ Tar lod, kɨ kɔsɨta lod, kɨ mina lod, ĩn kɨnuj tube. Nẽbekɨnõt gaj lod mad goto kam nyagt tube kɨ ɗan nya girr kàdt.

⁷ Aw, i sanya loi kɨ ronel na ãi kasɨnduu loi kɨ kamnda kɨta Luwah ɗa ronel dɔ kɨlagt loi woi.

⁸ I la kub kɨndà roit kɨ ndɔgndɔg na ad yib nal dɔi al.

⁹ I ɗa ronel kɨ dekɨdẽ kɨ i tara ndog tube lo ndii kɨdɔ dõ kɨkari pãbe in Luwah adi girr kàdt. 'Nten la i nya baji loi kam ndiit kɨ dɔi dõ, 'nten kɨ kam kɨlagt kɨkɔr rɔkɨ loi kɨ i ɗa girr kàdt.

¹⁰ Kɨla kɨɗen in jii ɔd a ne, i ɗa kɨ tɔgi tube kɨta kam lot kɨ Koo nõ. Lo kɨ i ndɨ awt ye kɨla gotot, kɔjtaɗa gotot, nyager gotot, terr gotot tɔ ho.

¹¹ M'tel m'oo girr kàdt ngekãingɔd ngãi tee kete al, gõɗɔɔ tetɗɔɔ al, ngeterr ngah nyasa al, ngegergirr nya ngah nyamajg al, ngegoosɨɗanya ngah maj ta kum degt al tɔ. Kaglo kɨ nõkar tujoo teen dɔdt tube.

¹² De ger kaglo lon al, tit'n bandbɨra kɨmajal a hɔn kanj ke gum a ɓan yel, titbe tɔ la hɔn ne deg kam kaglo kamkɔlt ye lon hurdɨn ne yedeng.

¹³ Terr 'nten m'oo girr kadt to na i nya kɨbo takum'mt.

¹⁴ Ɓe mad kɨ du i nõ, na deg kɨtit in ngãi al. Ngar kɨbo ɗe ɗɔɔ dɔat, ngéɗɔɔg lo ngar gugɨn dɔa, ndahn gong gugɨn dɔa tɔ.

¹⁵ Kam ɓeat nõ ngendo mad ndɨt, i ngeterr tɔ. De'n non aj ɓe kɨtakul terr lon, na de kɨɗa gaa kamɨn dɔ ngendot nõ goto.

¹⁶ Na m'el m'an: Terr majtɔi tɔg, be kaa kidɨn terr lo ngendo, na oon dɔ ta loa al tɔ.

¹⁷ Takel ngeterr in oon dɔ lon lo to jijij majtɔi ko kɨ ndi kɨbo lo de'n õɓe dan ɓoodgt.

¹⁸ Terr maj tɔi nyaɗɔɔg na de kɨ ngeɗamajal kɨɗabe tuj nyaɗa kɨmaj ngãibe.