Ngelamberta 8 - Maktub Ta Kumkajir

Tel ro go tat lo ngékõɓe

¹ Nõ ta'na kɨ de kɨ ngeterr a? Nõ ger girr nya a? Terr lo de ad takuma unj, ad takuma kɨ ngah wong mbel.

² M'eli m'an: I ngomgo mberkɨnda lo ngar kɨta kunkɔ kɨ i un ad Luwah.

³ I tee nõ ngart kɨtɨga na ot ndɨ kɔk dɔ ɗa nyat kɨ neli al kɨtɔ ngarkam a ɗa nya kɨ kama ndig,

⁴ kɨtɔ ta kɨ tee ta ngart tɔi tag tube na nõ asɨ ndɨjea an: I ndɨ ɗa ɗi a?

⁵ De'n ngomgo mberkɨnda a ne, a oo nya kɨ majal al na ngarkam de kɨ ngeterr ɔja kaglo kɨ takɨgang.

⁶ Nya kɨɗen aw kɨ kaglo lon kɨ takɨgang lon kɨtɔ majal lo de oi dɔat.

⁷ De ndɨ dai dɔ nyat kɨ ndɨ ɗe dɔat na nõ asɨ kɔja ɗob nya kɨ a ɗe a?

⁸ De kɨ aw kɨ tɔg dɔ ndɨ kɨ dɔ dõt goto, de kɨ aw kɨ tɔg dɔ ndɔ koint goto tɔ. Lon ɗɔɔ ur deg yedeng ɗob kɨ kad de ugɨn ron ɔrr kamt goto, na kamkil lo deg kaa a ajd al tɔ.

⁹ M'nɔl nyag tube'n ɗan nya girr kàdt, na lon de õɓe dɔ det mad na ɗa ad kuma tondo.

¹⁰ Kamla m'oo deg duwɨn ngéɗamajalg. Deg'n non a ɗen ho a teen kam kujt kɨjaɓat, na kam ɓebot'n non kam deg oi dɔ kɨlaɗag lod kɨmajal'n ɗan. 'Nten tɔ i nya kɨkari pãbe.

¹¹ Gangɨn ta dɔ nyaɗat kɨmajal kanangbe al. Kɨtɔ 'nten kam deg tel kongkong dɔ ɗa majalt.

¹² Ke neni de ɗa majal nja ɓu na lan ndɔa dɔ madt kaa ne, rota m'ger ronel to kɨta ngeɓool Luwah kɨtɔ ĩn nõat kɨ ɓool

¹³ na ronel kɨta ngeɗa majal goto. Ndɔa a bɨla ngãi al tit ndil kag be kɨta ɓool Luwah goto roat.

¹⁴ Nya mad kɨkari pãbe i nõ in ɗa nya dɔningt ne. Ngeɗadenesew ĩn nõ na nya kɨ tee dɔdt i kɨgo nyaɗat lo ngéɗamajalg. Ngeɗamajalg'n non tɔ na nya kɨ tee dɔdt i kɨgo nyaɗat lo ngeɗadenesewg. M'el m'an nya 'nten tɔ i nya kɨkari pãbe.

¹⁵ M'ɔsɨgon ronel tit kan hã nya mad kɨsoot kɨta de girr kàdt goto na sa ho, kãi ho kɨ ɗa ronel tan kɨta nya'n non la a nãi sia kam kɨlat loa ndo ndia kɨdɔ dõ tube'n Luwah ada girr kàdt.

¹⁶ Lon m'nda kammt kɨ m'ger terr na kɨ m'oo kɨlag ĩn ɗan dɔningt ne tit'n ɓi hɔ kum de kondɔ ke kàda al,

¹⁷ kamla m'oo kɨlag lo Luwah tube na m'oo de asɨ ger girr kɨlag kɨ girr kàdt al. Ke neni de ɗa kɨla ngãi, sah kɨ rotĩn kaa ngah al, ke neni ngeterr oo an: N'ngah kaa ne ngah al tɔ.