Ngelamberta 7 - Maktub Ta Kumkajir

Nyaɗa kɨter kɨ nyaɗa ɓood

¹ Tɔko kɨmaj majtɔi yib kɨkootmbĩ, na ndɔ koi majtɔi ndɔ kooj.

² Kaw kam kuj hɔndot majtɔi kaw kam kuj mburnamt kɨta lon non la i dɔboi deg tube, na ngéndɨ kɨdɔ dõ a gaan kamd dɔt.

³ Kamkil majtɔi go kɨta de asɨ hɔ ndo takumɨnt na kama so kɨber.

⁴ Ngarkam ngéterrg i kam kujt lo ngéhɔndo, na ngarkam ɓoodg i kam kujt lo ngéɗaronel.

⁵ Koo dɔ ndang lo de kɨ ngeterr majtɔi kɔ dɔ pa lo ɓoodg

⁶ Tit'n kõn kɨ la horro girr jot a ndɔwɨn ye, titbe tɔ la go lo ɓoodg in nya kɨkari pãbe.

⁷ Rota, tɔg ɗa nya kɨ lo ngetɔg dɔ det ad de kɨ ngeterr tel ɓood, na kadkari kad de utɨn dɔta tuj kam de.

⁸ Dɔboi nya majtɔi mbagɨr nya. Hal ndɨdɔt majtɔi hal gaburo.

⁹ Ot kad hal kɔsɨ wong ruk to kamit kɨta wong i kam ɓoodgt.

¹⁰ Ot kel kan: Titbãi ndɔg kɨ tɔin woi majɨn tɔi ngen ten a? Kɨtɔ ndɨje ta 'nten kɨgo lo terrt al.

¹¹ Terr kɨ nyanduba nat majtɔi kɨta ĩgɨn oon kum kad.

¹² Terr a ngom de tit'n nar a ngomɨn de ye be, na nyager maj tɔi. Terr a ngom ngeen kɨ dɔa dõ.

¹³ I nɔl kɨla lo Luwah oo, kɨta nya'n Luwah ɗug ye, nõ asɨ mbaja a?

¹⁴ Ndɔ ngah nya a ne, i ɗa ronel na ndɔ kɨmajal i gah dɔt. Rota, Luwah ndah kɨkɨɗa kɨ kɨmad kɨtakad de ger nya kɨɗa kɨ a ɗa nya gont al.

¹⁵ Ndim kɨ dɔm dõ kɨkari pãbe 'nten m'oo nyag tube. De kɨdenesew kaa nuj kam denesewt lon, na ngeɗamajal ndɨ kɔk kam majalt lon.

¹⁶ Ot koo roi det kɨ denesew kɨtɔi ke oo roi ngeterrt kɨ tɔi; kɨtɔɗi ɓai i ndig tujɨn roi a?

¹⁷ Ot ɗa majal kɨtɔi ke ɗa nya kɨɓod; kɨtɔɗi kɨ oin lon ndɔig nãin ɓaitɔ a?

¹⁸ Maj kad i hɔ nya 'nten ba na ot kɔr jii girr nyat'n non ko kɨta ngeɓool Luwah a tee ta nyagt'n non tube.

¹⁹ Terr ad de ngang ngɨring tɔi ngarg kɨlah kɨ ndɨn kam ɓebot.

²⁰ Rota, de kɨɗa kɨ denesew kɨ ngeɗamaj na ɗa majal nja kɨɗa al goto dɔningt ne.

²¹ Ot ko dɔ tag tube'n deg ɗa elɨn na ɓeta a ne, oo dɔ ɓer loi ndɨ elta kɨ majal dɔit.

²² Kɨtɔ i ger kamit ɓet njanatnat ĩ kɨ dɔi i elta kɨ majal dɔ degt tɔ.

²³ M'nã nyag'n non tube m'oo kɨgo teert na m'el m'an: M'ndig terr na terr i sãi sem.

²⁴ Nya kɨ i sãi, nya kɨwo na wo kɨɓing ye de kɨɗah a ngah a?

²⁵ M'ga kamm dɔt kad m'ger na kɨ m'nder girra kɨ m'sah go terr kɨ ger girrnya na kɨ m'ger majal lo nyaɗa kɨpãbe kɨ nya kɨɓod in kɨ dɔ kɨ kɨtel wãri.

²⁶ M'ngaa nya mad kɨkat bang tɔi koi; i dekɨdẽ kɨ kama i gum kɨ band na jia i jinjir. De'n nel Luwah a ne, a ãi dekɨdẽ'n non na ngeɗamaj al ye dekɨdẽ nõ a hɔa.

²⁷ Oo nya'n m'ngaa kel Ngelamberta. Lon m'nɔl nyag kɨɗa kɨɗa tube kad m'ger girrd.

²⁸ Rom ndɨ sah go nya mad kɨkanj nya ta na m'ngaa tɔ. M'ngaa de kɨdɨngã kɨɗa ku degt kɨdub kɨɗa na kudt nõ tube m'ngaa dekɨdẽ kɨɗa al.

²⁹ Na oo nya kɨɗa'n m'ngaa la ten: Luwah ndah de goɗobat na deg tube ndɨ sahn ɗob lod kɨkɔsɨdɔd.