Ngelamberta 6 - Maktub Ta Kumkajir

Ndɨkɨdɔdõ i kari kɨndang

¹ M'oo nya kɨmajal girr kàdt na i nya kamkɔl kɨbo dɔ degt.

² De'n Luwah ada nyamajg kɨ nyangahg kɨ tɔko mbã nya mad nala al kam nyagt tube kɨ kama ndig, na Luwah ada tɔg kad sa nya nõ al. Na mbah la sa ye. 'Nten i nya kɨkari pãbe i daiyo kɨ kõ.

³ Ĩla de mad ooj ngang ɓu, na ndɨ kɨ dɔn dõ ɓal ngãi ad ndɔag bɨlan ngãi, na ĩla ngah ronel kam nyamajgt lon al ho, na duwɨn nina al tɔ ye. M'el m'an: Ngon kɨ kõa ɔrra i soot tɔia,

⁴ kɨta ngon kɨkɔr ɗe kɨndang pãbe, na aw kam tilt ad til ut dɔ tɔa.

⁵ Kuma oo kàd al, ger nya mad al tɔ na ngon'n non ngah taakò gotɨn.

⁶ Rota, ke neni de'n non ndɨ kɨ dɔn dõ ɓal dub nja joo, ka ngah ronel kamt al, deg tube awɨn kam lot kɨkɨɗa ale?

⁷ Kɨla tube'n de a ɗa i kɨta taa kon na tɔl ɓoa al.

⁸ Ngeterr ngah nya ɗi tɔin ɓood a? Ke nyangahdɔt kɨ ɗi lo ngendo in ger ndia nõ ngekumkajɨrt a?

⁹ Koo nya kɨ kum majtɔi nyur nyag kɨ dang dang. 'Nten tɔ i nya kɨkari pãbe, i tit sah ho nel be.

Takɔj kɨ lo terrt

¹⁰ Nyag tube'n ndɨ j'oo in nyag kɨ ndɨn maɗi nu. Na kɨ ger jikĩn de ɓet, de asɨ majta kɨ de'n tɔga tɔia al.

¹¹ Kam tagt kɨngãibe nyag kɨkari pãbe ĩn tit ngãibe ho. Nya'n de ngah kamt i ɗi a?

¹² Nõ ger nya kɨmaj kɨta de ndo ndia kɨdɔ dõ kɨ tẽbe kɨ kɨkari pãbe ĩn tɔin tit ndil kag be a? Nõ asɨ kel de ta dɔ nyat'n a ɗa nya goat girr kàdt a?