Ngelamberta 5 - Maktub Ta Kumkajir

Oo go roi dɔ yokɨndat

¹ Ot tee tai kelta kanangbe. Ot kelta kɨ kamit kanangbe nõ Luwaht kɨta Luwah i dõ dɔrãt na in dɔningt ne. Kɨ tag loi ĩn tẽbe.

² Ni ɗe kɨta soolg kɨ dang dang na gerɨn ndita lo ɓood de kɨta takela.

³ Lon i un kɔi kɨ yokɨnda ad Luwah a ne, i ɗa na ot ndɨ kɔk dɔt kɨta Luwah ngah ronel ro ɓoodgt al. I tɔlkon nya kɨ i unɨn kɔi kɨta ɗa.

⁴ Un kɔi al majtɔi kunkɔi na i tɔl kona al.

⁵ Ot nya kad tai ɔrri, lai kam majalt. Ot kel nõ ngombangkɨlat kan: M'ɗagootal, na ɓeta Luwah ɓawong dɔ tagt loi na tuj kɨla kɨ jiit.

⁶ Nyag kɨkari pãbe ĩn ngãi kam nigt kɨ kam tagt kɨkel to na i ɓool Luwah.

⁷ Ĩla i oo kam lot mad a dan kum dekɨdangt ndo na ɔrrɨn nyaɗa kɨdenesew kɨ takɨgang kɨgoɗobat ko ye ot kad taa yai kɨta de kɨbo tɔi i girr tɔgt lo de kɨbo tɔia ɓaitɔ na kɨbo tɔid tujoo i nõ.

Nyamajg, kard goto

⁸ Nyangah i kam ɓet ne kɨtɔ deg tube na ngar kɨ dɔn ngah nya lon kam ndɔɔt.

⁹ De'n ndɨ tar nar a ne, nar a asa al, na de'n tar nyangah a ne, mana kɨ ngah dɔt a asa al. 'Nten i nya kɨkari pãbe ɓaitɔ.

¹⁰ Lon nyamaj tot mbuj a ne, ngésaa in ngãibe tɔ. Nya'n non a ɗa maj kɨ kɨɓe ngenya titbãi i kɨtakad oo kɨ kumɨn ta ko ale?

¹¹ De kɨ ngeɗakɨla to ɓi maj lon sa nya sĩ ke ngãi. Nyangah kɨngãi lo ngemaj ɔga dɔ ɓi.

¹² M'oo majal mad kɨ ad kamkil ngãi girr kàdt. I nya maj in ngea ngom na tel nya kɨ tuja.

¹³ Nyamaj'n non nuj kɨta tuj kɨ tee dɔat. De'n non ooj ngon kɨdɨngã na nya goto jiat.

¹⁴ Tit'n teen kam kõnt kɨ ron kari ye titbe tɔ a aw kɨ ron kɨ kari ho. A un nya kɨɗa kam kɨlat lon ho jint al.

¹⁵ 'Nten tɔ i nya kad kamkil ngãibe. De a aw tit'n ɗen na ɗa kɨla kɨta nel ye a ngah ɗi dɔt a?

¹⁶ Kaglo kawa kɨdɔ dõ tube sanya kam lo kɨdiwt, aw kɨ kamkil ngãi, mõi ɗaa na wong tɔla sɔkɨr.

¹⁷ Oo, nya kɨmaj kɨ sumba in m'oo kɨta de laten: Kad sa ho, ãi ho na kɨ oo maj ron kam kɨlagt lon tube ĩn ɗad girr kàdt kɨ ndɔag tube kɨ Luwah ada kad ndi'n kɨ dɔn dõ. 'Nten i gaj loa.

¹⁸ Lon Luwah ad de mad nyangahg kɨ nyamajg na ada tɔg kad sanya'n non na kɨ ta gaj lon kɨ ngah ronel kam kɨlat lon. 'Nten i kadkari kɨ Luwah ada.

¹⁹ A gah dɔ ndɔ ndɨnt kɨdɔ dõ ngãi al kɨta Luwah ɓa ngarkama kot kɨ ronel.