Ngelamberta 4 - Maktub Ta Kumkajir

Kɨla lo ngeterr kɨ ɓood de

¹ Kamla m'tel m'oo ngéɗanya kɨgoot al, deg ɗan ngetɔg dɔ degt girr kàdt. Kɨ log tube m'oo nõ lo deg'n ɗand takõ. Na de kɨ ngesɔl kamd goto. Ngédakumd ndo ɗan ngetɔg dɔdt na de kɨ ngesɔl kamd goto.

² Na m'gaa m'oo ĩgɨn oin kete ĩn kɨ ronel tɔi ngéndɨ kɨdɔdõ ɓaitɔ

³ Kɨmaj tɔid tujoo i ta lo de'n oojɨna al ɓaitɔ in oo nyaɗa kɨmajal kɨ ɗan girr kàdt al.

⁴ M'oo kɨla kɨɗen deg ɗan kɨ goosɨ, ndɨ ndigɨn ɗa nya kɨɗen kad maj tɔi kɨ lo madɓedg. Na nyag'n non tube i nya kɨkari pãbe, i tit sah ho nel kɨ ndɨ tɔin be.

⁵ Ɓood de la jin kadɨnt na sa dãron kɨkɔsɨdɔn.

⁶ Ji kɨkɨɗa kɨ ɗoosɨ kɨ lapia majtɔi ji kɨjoo kɨ ɗoosɨ kɨ kɨla kɨkɔr rɔkɨ in i tit sah ho nél kɨ ndɨ tɔin be.

⁷ M'oo nya kɨkari pãbe girr kàdt ɓaitɔ.

⁸ De mad ndɨ nõ kɨ kɨɗanbe, ke ngona kɨdɨngã, ke ngonkõa kaa goto. Be kaa dɔboi kɨla loa kɨkɔr rɔkɨ goto. Ɓo nyangah ndan kuma al ad el an: M'ɗa kɨla na m'ɔg rom koomajro kɨta nõ a? 'Nten to i nya kɨkari pãbe, mersi goto.

⁹ Deg joo i soot tɔi de kɨɗa kɨta a taan nyabaji kɨmajtɔi kɨta kɨla lod.

¹⁰ Kɨtɔ ĩla kɨkɨɗa so a ne, kɨmad a un namɨn kɨ dõ, na beto lo de'n so, na de mad kɨ ngekuna kɨ dõ goto.

¹¹ Titbe tɔ, ĩla deg joo ton nat a ne, rod a tɨnga, na de'n to kɨ kɨɗan ye titbãi roa a tɨnga a?

¹² Ĩla de mad i kɨ kɨɗan a ne õ al kad de tetaɗɔɔ, na deg joo a ɗan bijir lon ɗɔɔ ngahd. Kɨla'n de nda gidnat mɨta ye, a gang kanangbe al.

¹³ Basa kɨ ngendo na i ngeterr ye, maj tɔi ngar kɨɓod kɨ bɨga in ndig koo dɔ takɔj al,

¹⁴ kɨta asɨ tee kam dangait, tel ngar ke neni oojɨna kɨ ndo kam kõɓet lo ngar'n non.

¹⁵ M'oo deg tube kɨ ndian kɨdɔdõ girr kàdt, kamd i kɨdɔ basat in ndɨ goot ngart kɨ tel bɨga.

¹⁶ Koosɨ deg kɨ dum da kɔrd ĩgɨn i bɨradɔd, be kaa nganka ngéɗe goat a ɗan ronel kɨ ngar 'nten al. Rota, nya 'nten i nya kɨkari pãbe ɓaitɔ, i tit sah ho nel be.

I soot kad un kɔi kɨ yo kɨnda nõ Luwaht al

¹⁷ Lon i ndɨ and kam kuj ndub Luwaht a ne, oo go njai maj. I ndɔt nderbe kad oo dɔ ta majtɔi kadkari kɨjakɔ lo ɓoodg kɨtɔ gerɨn kad ndɨ ɗan majal al.