Ngelamberta 3 - Maktub Ta Kumkajir

Nya kɨɗen aw kɨ kaglo lon na dɔboia i nõ

¹ Kam duniat 'nten kaglo i nõ kɨta nyag tube. Kaglo mad i nõ kɨta kɔjtaɗa kɨɗen kɨ girr dɔrãt.

² Kaglo kooj kɨ kaglo koi, kaglo duw nya kɨ kaglo ret nya dub kɔ.

³ Kaglo tɔl kɨ kaglo yoot kaglo tɔ kɨ ningt kɨ kaglo ɗa kɨ dõ.

⁴ Kaglo nõn kɨ kaglo go, kaglo hɔndo kɨ kaglo ndam.

⁵ Kaglo tɨla mbal kɔ kɨ kaglo kaw mbalg kɨnat, kaglo hɔna kɨrot kɨ kaglo hɔna kɨrot al.

⁶ Kaglo sa nya kɨ kaglo nya kɔ,

⁷ Kaglo ngom nya kɨ kaglo la kɔ. Kaglo til nya kɨ kaglo kur nya, kaglo ndɨ ta mbo kɨ kaglo kelta.

⁸ Kaglo tar kɨ kaglo kɔsɨ ta, kaglo ɗɔɔ kɨ kaglo lapia.

⁹ Nyangahdɔt lo de'n ɔr rɔkɨ kam kɨlat lon i ɗi a?

¹⁰ M'oo kɨlag kɨkɔr'n Luwah ndah dɔ degt kad ɗan.

¹¹ Luwah ɗa nya kɨɗen kɨ majkoo kɨ kaglo loa. Nda ga ta dɔkaglot kɨ mbãkɨnõt kam degt na de asɨ ger kɨla'n Luwah ɗa al lo lagɨrat nu mbã dɔboia.

¹² M'ger, nya mad kɨmajtɔi kɨtɔd goto na kɨ ɗan ronel kɨ kamnda kaglo kĩĩ kɨdɔdõ tube.

¹³ Na kad de sa ho ãi ho kad ɗa ronel kam kɨlat lon tube. Ĩ non i kadkari kokɨro Luwaht.

¹⁴ M'ger, nya kɨɗen in Luwah ɗa a ne, i kɨtakad ndɨ mbãkɨnõt. Ɗob la nya mad dɔt ke kor nya mad kamt goto. Luwah ɗa titbe kɨtakad deg ɓoolɨn ne nõat.

¹⁵ Nya kɨ tajigla i nya kɨ to nõ kete, na nya kɨ a ɗe i nya kɨ to nõ kete tɔ. Nya kɨ tɔi woi maɗi Luwah ndɨ sah tel sia gog ɓaitɔ.

¹⁶ M'oo girr kàdt ɓaitɔ kam logangtat ye, majal tot nõ na kam lot'n denesew i tit nya kɨgoɗobat al tot tɔ ho.

¹⁷ M'el rom m'an: Luwah a gangta dɔ det kɨdenesew kɨ de kɨ ngeɗamajal kɨta ndah kaglo gangta kɨtɔ nyag tube kɨ kɨta kɨlag tube tɔ.

¹⁸ M'el rom m'an: Ta kɨdɔ degt ta Luwah ndɨ nád oo ad ɔjd ĩn kɨdɔd ĩn dãg koon.

¹⁹ Kɨtɔ nya'n ɗa deg ye ɗa dãg titbe tɔ ho. Nya kɨ tee dɔdt tujoo i kɨɗabe, tit'n kɨkɨɗa woi titbe tɔ kɨmad oin ho ye. Ĩn tube taankò kɨɗabe na de tɔi dan al kɨtɔ nyag tube ĩn nyag kɨkari pãbe.

²⁰ In tube ndɨ awɨn lot kɨ kɨɗabe, in tube teen ko kam buningt na a telɨn buning gog.

²¹ Nõ ger kad ndil de aw dõ na ndil dã aw ber kɨningt a?

²² Titbe m'oo nya mad kɨmajtɔi kɨta de goto na kɨ ngah ronel kam kɨlagt lon tã. 'Nten la i gaj loa. Nõ a tel sia gog kada oo nyag kɨ a ɗan nya goat a?