Ngelamberta 2 - Maktub Ta Kumkajir

¹ M'elta kamt m'an: I ɗe kɨ nán ronel, i oo majroi, na oo i nya kɨkari pãbe ɓaitɔ.

² M'elta dɔ got m'an: I nya kɨɓod na ronel ta, kara i ɗi a?

³ M'ɔj kammt kad m'nda dãrom ta kasɨnduut kɨkãi na kamm ndɨ ɔjɨm ta kɨlo terrt ɓaitɔ. M'nda kammt kad m'hɔ nyaɗa kɨgo lo ɓoodt kɨ m'oo ke ɗi maj kɨta deg kad ɗan girr dɔrãt kaglo ndid kɨdɔ dõ tube a.

⁴ M'ɗa kɨlag kɨbobo m'ɗa kujg ngãibe, m'hɔ ndɔɔ nduug kɨta rom.

⁵ M'hɔ ndɔɔg, m'gang log kɨtat m'hɔ kag tit, m'hɔ kag kɨ teen kɨ kand'd kɨ dang dang.

⁶ M'nder hollog kɨtakad man ɗat, m'nyom nja kagg kɨ kam ndɔɔt lom kad tɔgɨn.

⁷ M'ndugo ɓerg kɨdɨngã kɨ kɨdẽ na oojɨn ngang kam kujt lom. M'ngaa ɓut mangg kɨ batg tɔi deg tube kɨ ndɨn kete nomt Jerusalem.

⁸ M'kaw nar arjã kɨ ɔr kɨ nyamajg lo ngarg kɨ dɔninggt kɨ dang dang kɨta rom. M'ɔi ngekɔsɨpag kɨdɨngã kɨ kɨdẽg kɨɓerg ngãibe, nya kad de ronel ngãi.

⁹ M'tel de kɨbotɔi deg tube kɨ ndɨn kete nomt Jerusalem. Na terr lom i nat sem.

¹⁰ Nyag tube kɨ kum oo, na nyura õm ye, m'ɔg rom nya mad al. M'ɔg rom ronel al kɨta m'oo majrom kam nyagt tube kɨ m'ɗa na i nyabaji kɨta kɨlag lom tube.

¹¹ Goot gog m'oo kɨlag tube kɨ jim ɗa kɨ daiyog'n m'dai kɨta kɨlag na oo, nyag tube in kari pãbe, i tit sah ho nel be, kara goto girr kàdt.

Terr maj tɔi ɓood na ĩn tujoo a goton

¹² Kamla m'tel m'ga dɔ nyat'n i terr nõ, kurdɔkoi kɨ ɓood in ɗi a? M'ndɨje rom ta m'an de'n a ga kɨlam kad ɗa ngar ye, A ɗa nya'n ngar kɨkete ɗa.

¹³ Kamla m'oo terr i kɨbo tɔi ɓood tit'n kunj i kɨbo tɔi til.

¹⁴ Kum ngeterr i dɔat na ɓood de ndia kam tilt na m'oo nya kɨ kɨɗabe la tee dɔdt ye,

¹⁵ ad m'el rom m'an: nya'n tee dɔ ɓood det ye a tee dɔmt titbe tɔ ho. Kɨtɔɗi mĩ kɨ terr ngãi a? Na m'el rom m'an: 'Nten i nya kɨ kari pãbe ɓaitɔ.

¹⁶ Ga kamdɔt kɨ tokɨnõt goto, ke kɨlo ngeterr, ke kɨlo ɓood de, kɨta kam ndɔgt kɨ a ɗe nõ kam deg a oi dɔdt tube. Ngeterr a oi tit'n ɓood de a oin be ho.

¹⁷ Kɨtɔ 'nten m'mbet ndi kɨdɔ dõ kɨta kɨlag tube'n deg ɗan girr kàdt nelɨm al kɨto tube in nyag kɨkari pãbe, i tit sah ho nel be koon.

¹⁸ M'mbet kɨlag tube kɨ m'ɗa girr kàdt kɨta kari na kɨ m'nya nyag'n non mad de'n a õɓe gootɨmt.

¹⁹ Nõ ger de'n non a i ngeterr ke ɓood de a? Titbe kaa a õɓe dɔ kɨlagt tube'n m'ɗa kɨ kon. Kɨla 'nten ɔj go terr lom girr kàdt. 'Nten tɔ i nya kɨkari pãbe.

²⁰ Kɨtɔ 'nten m'tel m'ɔrr kamm balang kɔ dɔ kɨlagt kɨ kɔr rɔkɨ ĩgɨn m'ɗad girr kàdt.

²¹ De kɨtitbe ɗa kɨla kɨkɔr rɔkɨ kɨ terr kɨ nya ger kɨ goosɨ na nya nyag lon ad de kɨ rang in ɗa kɨlaa al. 'Nten i nya kɨkari pãbe na i majal kɨngãibe.

²² Ɗi de ngah kɨta kɨlag kɨkɔr rɔkɨ tube ĩn ɗa kɨ kamkil kɨ ngar kamɨnt girr kàdt a?

²³ Ndɔag tube i ndo kamkil, kɨla kɨ kɔr rɔkɨ loa tel kamkil, ke kondɔ kaa tagah ad kama so kɨber al. 'Nten to i nya kɨkari pãbe.

²⁴ Nya mad kɨ majtɔi kɨta de goto na sa ho ãi ho kad ngah ronel kam kɨlaɗangt kɨɗabe. M'oo nya 'nten tɔ tee ji Luwaht.

²⁵ Kɨtɔ nõ asɨ sanya na ɗa ronel, i kɨtakul Luwah koon al e?

²⁶ Kɨtɔ de'n nel Luwah ye, Luwah ada terr kɨ nyager kɨ ronel na ngeɗa majal taa ne Luwah ada kɨla kaw nyag kɨnat, kɨ mbõ nyag kɨdɔnat kamla tel ad de'n nel Luwah. 'Nten i nya kɨkari pãbe, i tit sah ho nel be.