Ngelamberta 12 - Maktub Ta Kumkajir

Kɔj de kɨdɔdug

¹ Na i gah dɔ Ngendahit kaglo basa loi kete nõ ndɔt kɨmajal'n a ɗe ɓeta el an: M'ngaa ronel kammt al,

² kete lon kàd kɨ kunj kɨ nah kɨ kɨmẽg diwɨn til al, na kilndii ɗe ut go man ndii.

³ Kaglo'n ngéngomkujg ndadɨn. Lon deg kɨngang gɔkɨn gɔkɨ. Lon nge kurnyag duban kɨta kɔrd i ngãi al, na ngékoolo burrolot diwɨn til.

⁴ Utɨn tabitg kɨjoo kɨ ta ɗobgt lon oon dɔ kah ngekurnya ngãi al. Lon de ɓai kɨ ndi ko yel na ngan kɨdẽ ngekɔsɨpa tɔgd goto.

⁵ Ɓoolɨn lo kɨkal kɨ dõ kɨ nyag kɨkootɓool dɔ ɗobt kag amand ɓa hut, kɨɓetg telɨn nya kɨkoi na nyurkõ goto kɨta de ndɨ aw kɨ londɨt kɨ mbãkɨnõt, na ngehɔndo ndia dɔ ɗobt.

⁶ Kete lon kɨla nar arjã ngangɨn al ɓaitɔ ke jo nar ɔr tɔɔ, lon jo man tɔɔ ta mant kɨ ɓa al ɓaitɔ ke gã tet ta bulo mant,

⁷ na bu tel kɨ dɔningt lot'n tot maɗi na ndil tel kɨ ro Luwaht kɨ Ngeɗaa.

⁸ Kari pãbe, kel Ngelamberta, nyag tube ĩn kari pãbe.

Kɨla kɨtaagbe kɨ dɔ det

⁹ Ngelamberta i ngeterr hã kɨɗabe al, na ndoo deg nyager tɔ. Mbɔj nya, nder girra, ɗago terrtag kɨgoagoa.

¹⁰ Ngelamberta sah ɗob ngah ta kɨmbẽ na ndang tag kɨgoɗobat kɨ kɨ rota.

¹¹ Tag lo ngéterrg tan'na kɨ kag sɔkg, tit ngawg ĩn hɔnd ngang ye titbe tɔ terrtag kɨkaw kɨnat lo ngengombatg kɨ kɨɗabe.

¹² Dɔ tat 'nten ngonɨm oo go roi maj. Ndàng maktub ngãi kaa dɔboia goto, na ndoo nya ngãi nda dãro kɔrt.

¹³ 'Nten i dɔngoi ta. Oon dɔ tag tube woi. I ɓool Luwah. I ngomgo mberkɨndag loa kɨta 'nten i kɨla kɨ taagbe kɨ dɔ det.

¹⁴ Kɨtɔ Luwah a ɗe kɨ kɨlag tube, kɨ nyag tube kɨ deg ɗan gid tilt logangtat, ke kɨmaj ke kɨmajal.