Ngelamberta 11 - Maktub Ta Kumkajir

Kɔjta kɨta ndɨ kɨ dɔ dõ lo de

¹ La nyasa loi dɔ mant kɨta a i ngah gog go ndɔgt kɨngãi

² I keg nya gaj tanãimɨta ke jijoo kɨta i ger tuj kɨ a ɗe dɔningt al.

³ Ĩla ndii il ngãi a ne, a ed dɔningt. Ĩla kag so kɨko jikõ ke kɨko jigel a ne, loat'n non la a tot ye.

⁴ De'n ndɨ gah dɔ nélt a ne, a duw nya al, na de'n ndɨ oo kilndii a ne, a ja nyako al tɔ.

⁵ Tit'n i ger al ke ɗob kɨɗah nél bait ke ɗob kɨ titbãi kɨnya a kaw ron kam dekɨdẽt kɨ ngendan ngon a, titbe tɔ i ger go kɨlaɗa Luwah kɨ Ngeɗa nyag tube al.

⁶ Kɨsĩ ritit i dub kum nyako loi na lokɨsɔle ot nya taa kɨta i ger al ke kɨla kɨsĩ ke kɨ lokɨsɔle a ɗe maj adi, ke tujoo majd a asɨna a?

⁷ Kunj i nya kɨmaj na maj takum det kad oo kàd.

⁸ Ĩla de mad ndɨ kɨ dɔn dõ ɓal ngãi ad ɗa ronel kam ɓalgt'n non tube na ada ga kamɨn dɔ ndɔgt kɨdiwtil'n in ngãibe. Nyag tube'n ndɨ ɗen ye i nya kɨkari pãbe. Kɔjta kɨta de kɨdɔdug

⁹ Basa i ɗa ronel kaglo kĩĩ basat, ad kami ɗa ronel kɨ ndɔig tube lo kaglo basat loi. I ndia kɨgo kɔjta ɗa kɨ kamit kɨ nyurkõ kɨ kumit. Na maj kad i ger. Kɨtɔ nyag'n non tube Luwah a kuni kɨ logangtat.

¹⁰ Kɨtɔ 'nten ɔr kamkil kamit na ɔr nyakɨto kam dãroit ko kɨta kaglo basa kɨ kaglo kɨ dɔi du ɓaitɔ i kari pãbe.