Ngelamberta 10 - Maktub Ta Kumkajir

Terrtag kɨ dang dang

¹ Nin kõgg ɗan yib kɨ kootmbĩ lo ngeɗa yib ad ot majal, titbe tɔ nyaɗa kɨ lo ɓoodt kɨtẽbe nuj de ngeterr kɨ ngetɔko.

² Ngarkam ngeterr ɔrra ta ɗob kokõt na ngarkam ɓood de ɔrra ta ɗob kogelt.

³ Lon ɓood de a ndia dɔ ɗobt ka a ger nya al, na dekɨɗen el an: Oo ɓood de la aw nõ.

⁴ Ĩla ngekõɓe dɔit ɓa sei wong a ne, i ndɨ londit kɨta sɔldɔlom ad wong tel sɔl.

⁵ Majal mad in m'oo girr kàdt i nyaɗa kɨgoot al lo ngekõɓe.

⁶ Ndan ɓood de kam londɨt kɨbo na ngemajg ndɨ kam lot kɨdu.

⁷ M'oo ɓerg ndin dɔ sɨndagt, ngan ngarg ndian dɔningt tit ɓerg be.

⁸ Ngekurɓe ĩ kɨɓe a so tit na de'n to ndogbɔrr ningt a ne, li a dona.

⁹ Ngetɔsɨmbal a ngah dó na de'n ria kag a ngah nya kɨto.

¹⁰ Ĩla ta hand at al na de ɔl taa al to a ne, kari na a ga nya kɨ tɔgɨn kɨ toi. Terr a ɔrra ta ɗob.

¹¹ Ĩla li dõ de lon ngekula kuna al ɓaitɔ a ne, goosɨ lo ngekula kara i ɗi a.

¹² Ta kɨ tee ta ngeterrt ada ngah maj ro degt, na ta kɨ tee ta ɓood det laa yalɨm.

¹³ Lagɨr ta kɨ taat i ɓood, na dɔboia i ta kɨ tel dɔ de wãri kɨmajal.

¹⁴ Ɓood de elta kɨdɔtdɔt, ke de ger nya in a ɗa nya al. Nõ a ela ta dɔ nyat kɨ a ɗe goat a?

¹⁵ Kɨlaɗa ɓood de ndaa kɔrt mbã ger ɗob kaw kam ɓet al.

¹⁶ Beto loi in dɔning'n ngar loi i ngon ɓaitɔ na ngan ngarg san nya kɨsĩ ritit.

¹⁷ Majkurr i dɔit ĩ dɔning'n ngar loi i ngon mbaiɓe, na ngan ngarg a san nya kaglot kɨsumba kɨtakad rod ngang na kasɨ ɗad al.

¹⁸ Lon de i ngengẽ a ne, dɔ kuj loa a teet. Lon i ngedaw a ne, kuj loa ndeh man tɔ.

¹⁹ Ɗan mburnam kɨta yo, na kasɨnduu kɨta ronel. Nar ɗa nyag tube.

²⁰ Ot ndɔl ngar, ke kam tagahit, na ot ndɔl de kɨ ngenya ke kam kuj ɓiit kɨtɔ yel kɨ dõ, a un ta kɨtait awɨn, na yel kɨ ngekɔrrbɔgɨn a la mbera.