Ngelamberta 1 - Maktub Ta Kumkajir

Nyag tube ĩn kari pãbe

¹ Tag lo Ngelamberta, ngon Dabid, ngar kɨ Jerusalem.

² Kari pãbe, kel Ngelamberta, kari pãbe, nyag tube ĩn kari pãbe.

³ Ɗi de a ngah dɔ kɨlat in ɗa girr kàdt a?

⁴ Girrka mad tɔi, girrka mad kɨɗang ɗe gootat na dɔning to lotont.

⁵ Kàd ɓa, kàd ud, na aw kanangbe lot'n ɓa tit dasa.

⁶ Nél la kokõ kamla tel la kogel, kɨndɔgbe nél a tur ron, na a tel ɗe gootɨnt kɨkete.

⁷ Bahg tube nũn kɨ bahbot, na bahbo ɗoosɨ al. Bahg awɨn ɓaitɔ kɨ lot'n ndɨ nũ kɨtit.

⁸ Nyag tube awɨn kɨ kɨla kɨkɔr rɔkɨ kɨdum kɔrr girra. Koo lo kɨ kum a ndan kum de al, koo dɔ ta a ɗoosɨ mbi de al tɔ.

⁹ Nya'n i nõ maɗi, nya'n non la a tel tee gog, na nya'n ɗa nya maɗi, nya'n non la a tel ɗa nya gog tɔ ye. Nya mad kɨkij goto girr kàdt.

¹⁰ Ĩla nya mad i nõ kɨ deg elɨn taa anan: Oo, nya 'nten i kɨkij ye. Nya'n non ndɨ nõ maɗi kam kohgt kɨ tɔin kete nõjt.

¹¹ Ga kam dɔ nyagt kɨmaɗi goto. Titbe deg kɨ oojɨnd al ɓaitɔ ye, a gan kamd dɔ nyagt'n ɗan nya woi kete nõdt al tɔ.

Terr lo de i kari pãbe

¹² Mĩ Ngelamberta, mĩ ngar dɔ Israelag Jerusalemt.

¹³ M'nda kammt kɨ m'sah go terr na m'nder girr nyag tube ĩn deg ɗan girr dɔrãt. I kɨla kɨ ngang ngãi la Luwah ndah dɔ degt kad ɔrɨn rɔkɨ.

¹⁴ Mĩ tɔ, m'oo nyag tube kɨ ɗan nya girr kàdt, na m'oo nyag tube ĩn nyag kɨkari pãbe, tit sah hɔ nél be.

¹⁵ Nya kɨ ɗug woi ye, de asɨ mbaja al, nya'n goto ye de asɨ tɨda al tɔ.

¹⁶ M'ɔj kammt m'an: Oo, m'ngaa terr ngãi tɔi ĩgɨn õnɓe Jerusalemt kete nomt. M'ngaa terr ngãibe kamt, na m'ger girr nyag kɨ ɔj dɔ ndɨ kɨ dɔ dõ lo de.

¹⁷ M'nda kamt kɨ m'ger terr kɨ nya kɨ tel dɔ wãri kɨ nya kɨ tel de ɓoodt, na m'oo m'an: Nya 'nten i nya kɨ kari pãbe.

¹⁸ Terr kɨngãi a ad de kɨ ngãi tɔ, na de'n nyager loa ɗe kɨdɔtdɔt a ne, kamkil loa ɗe kɨdɔtdɔt tɔ ho. Koomajro kɨ nyamajg ĩn nya kɨ kari pãbe.