Nehemi 13 - Maktub Ta Kumkajir

Nehemi tĩ ron kat tel nyag lo Luwah kɨ kijt

¹ Ndɔt'n non dan kam maktubt lo Moij kɨ mbi degt, na ngahn ta kɨndang kamt titbe: Asɨ kad Amonia ke Moabia kɨɗa and kam ngékawnat lo Luwah al mbãkɨnõt.

² Kɨtɔ deg'n non lan ta Israelag kɨ nyasa kɨ man al, na ban Balam kad nda ndɔl dɔdt. Titbe kaa, Luwah mbel ndɔlɨn non ada tel majkurr.

³ Lon deg oon dɔ Ta lo Luwah ye, tuɓan deg tube'n girrd i Israel al.

⁴ Kete nõ nyagt'n non, Eliasib ngejamosɨkadkari'n ndana ngekoogo kam kujg kɨ kam kujt lo Luwah loj, ĩn i nooj Tobija ye,

⁵ ɗago lo kam kujt mad kɨbo kɨta Tobija, ad i kuj'n mbõn kadkari nduj ko, kɨ mbikam kɨkootmbĩ kɨ jo ɗa kɨlag kɨ gaj kɨkɨɗa ku kɨ kɨlaht lo nyako, kɨ kasɨnduu kɨ yib kɨtit maɗi, in deg adɨn Lebiag kɨ ngékɔsɨpag kɨ ngéngom tabitg kɨgo komãdɨmãt nat kɨ kadkarig kɨta ngéjamosɨ kadkarig.

⁶ Lon nyag'n non ndɨ ɗan nya ye, mĩ Nehemi m'goto Jerusalem kɨta kam ɓalt kɨ kõ dɔmɨta gidaijoo lo Artaserses ngar kɨ Babilon, m'tel kɨ ro ngart gog. Go kaglot kɨ asɨ tat m'kɔ ngar, na nyam adɨm m'aw.

⁷ M'tel m'ɗe Jerusalem gog, na m'tee dɔ nyat kɨmajal'n Eliasib ɗa nõ, tit kan hã ɗan go lo kam kujt mad kam natlogt lo kuj lo Luwah.

⁸ Nya'n non nelɨm al bat, kɨta 'nten la m'ɔin nyag lo Tobija tube, m'ũd kɔ gid kujt.

⁹ Kamla m'nda mber kad arɨn kam kujg'n non, na m'nda jo ɗa kɨlag kam kujt lo Luwah gog nat kɨ kadkari nduj ko kɨ mbikam kɨ kootmbĩ.

¹⁰ M'oo nya mad kɨɗang ɓaitɔ, deg adɨn Lebiag gaj nyag lod al; kɨta 'nten Lebiag kɨ ngékɔsɨpag'n ndɨ ɗan kɨlaɓer ãin na, dekɨɗen kɨ kam ndɔɔt lon.

¹¹ Taa ne, m'ndang ngékõɓeg m'an: Kɨtɔɗi nyan ne kuj lo Luwah kɨnõbe a? Kamla m'kaw Lebiag kɨ ngékɔsɨpag kɨnat, na m'ndad lo kɨlagt lod gog.

¹² Goot gog Judag tube ɗen kɨ gaj kɨkɨɗa ku kɨ kɨlaht nyako kɨ kasɨnduu kɨ yib kam kujgt ngomɨn nyag tit.

¹³ Na m'la kɨla koo go kujg ĩn ngomɨn nyag tit ji Selemiat ngejanyamosɨkadkari, kɨ Sadok ngendoo maktub, kɨ Pedaja kɨkɨɗa ku Lebiagt, na mad Hanan ngon Jakur i ngeɗased kɨta oond ĩn de kɨrog i kɨla lod kad luɓon nya ngankõdg.

¹⁴ Luwah lom, m'kɔi kɨ i ga kami dɔmt kɨta nya 'nten. Ot bɔr nyaɗakɨro kɨmaj lom kɔ, kɨ m'ɗa kɨta kuj lo Luwah lom kɨ kɨlaɓer loi kɔ.

¹⁵ Kaglot'n non la, m'oo dekɨdɨngã madg kɨ Juda ɗa ɓan kand nduu lo ɓa kasɨnduut ndɔ taakò, na andɨn kɨ sĩga nyako'n ton dɔ korrogt. Andɨn kam ɓebot kɨ Jerusalem tɔ kɨ kasɨnduu kɨ kand nduu kɨ kand mbaiɓood kɨ nyato kɨ dang dang tube ndɔ taakòt, na m'ug m'eld ta dɔt, ndɔt, in ndugon ne nyasa.

¹⁶ Dekɨdɨngã madg kɨ ɓebo Tir ĩgɨn ndɨn ɓebo Jerusalemt andɨn kamɓet kɨ nyagat kɨ dang dang tube, na ndugond kɔ kɨ Judag kam Jerusalemt ndɔ taakò.

¹⁷ Taa ne, m'ndang kɨbog kɨ Judat, m'eld m'an: Majal kɨ i ndɨ ɗan nõ, ad i yerr kɨ i ndɨ yerrɨn ndɔ taakòt ye, girra i ɗi a?

¹⁸ Bɔwsɨg ɗan nya 'nten ale? Luwah loj ad nya kɨ to 'nten tube tee dɔjt, kɨ dɔ ɓebot loj kɨta nya 'nten ale? Titbe kaa ne, i ndɨ ɔrrɨn wong loa kɨdɔtdɔt dɔ Israelt kɨyerr'n i ndɨ yerrɨn kɨ ndɔ taakò.

¹⁹ Kamla m'nda mber kad utɨn tabitg kɨ Jerusalemt kete nõ ndɔ taakòt lon kàd ɗa udɨn, na m'eld kad teen tabitg al mbã ndɔ taakò tɨga kamtã.

²⁰ Ngégatg kɨ ngéndugo nyagat kɨ dang dang tube kɔ ye, ɓin kɨtɨga gid ɓebot kɨ Jerusalem ndɔ kɨɗa ke joo.

²¹ M'ug m'eld ta dɔt, m'an: Kɨtɔɗi i ɓin ne ndɔ ta ndogbɔrrt a? Ĩla a i ɗan titbe gog tɔ a ne, m'a m'hɔsɨ. Kaglot'n non ɗen ndɔ taakò gog al ta.

²² M'nda mber Lebiag kad arɨn rod, na kad ɗe ngomɨn tabitg, kɨtakad telɨn ndɔ taakò ndɔ kɨjaɓat. Luwah lom, m'kɔi kɨ i ga kami dɔmt kɨta nya 'nten, na ad maj urrɨm kɨgo nyaɗakɨrot loi kɨngãi.

²³ Kaglot'n non tɔ la, m'oo Juda madg'n taan dekɨdẽ Asdɔdag kɨ Amoniag kɨ Moabiag.

²⁴ Nusɨ ngandg elɨn ta Asdod kɨta asɨ kelɨn ta Juda al, na elɨn ta kɨgo ta ɓe lo girrdeg kɨɗen.

²⁵ Taa ne, m'ndangd, m'ndɔld, m'nda kɨmadg kudt, m'ret bisɨdɔd, na m'ad'd unɨn kɔd kɨ yokɨnda kam tɔ Luwaht titbe: A adɨn ngansɨg kɨdẽ ngandg kɨdɨngã al. A i taan ngandg kɨdẽ kɨta ngansɨg kɨdɨngãg ke kɨtɔsɨ al tɔ.

²⁶ Salomõ ngar kɨ Israel ɗa majal kɨta dekɨdẽg kɨ titbe ale? Na ku girrdegt kɨ dang dang ngãibe, ngar mad kɨtit sia goto, i ngetar lo Luwah lon. Luwah ndaa ngart dɔ Israelagt tube. Titbe kaa ne, dekɨdẽ nyakɔrg ɔrrɨna kɨ kam majalt.

²⁷ Ke jĩ tɔ, j'a kɨ nel mbij kɨrosɨt kad kɨ ɗan majal kɨbo 'nten ndoorɨn Luwah kɨ goɗob ta dekɨdẽ kɨ mbahgt a?

²⁸ Kɨkɨɗa ku ngan Jojada ngon Eliasib bɨra ngejanyamosɨ kadkari i mum Sambala, de kɨ Horon. Kɨtɔ 'nten la m'tuɓan kɔ sãi romt.

²⁹ Luwah lom, m'kɔi kɨ i gah dɔ degt'n non kɨta yerrɨn kɨ kɨla jamosɨkadkari, kɨ kunkɔ'n ngéjamosɨ kadkarig kɨ Lebiag unɨn sei.

³⁰ Titbe la m'ardɨn kɔ dɔ nyat kɨɗen'n tee ko ro mbahgt, na mad ngéjamosɨ kadkarig kɨ Lebiag kɨlaɓer lod, dekɨɗen ndɨ kam kɨlat lon.

³¹ M'ad'd ɔin kadkari kɨ kaglogt kɨ gangɨn kete woi, kɨ kadkari kand kɨdasa. Luwah lom, m'kɔi kɨ i ga kami dɔmt kad maj urrɨm.