Nehemi 1 - Maktub Ta Kumkajir

Nehemi el ta kɨ Luwah kɨta Jerusalem

¹ Ta lo Nehemi ngon Hakalia. Kam naht kɨ tɔa i Kisle, kam ɓal kɨ kõdɔjoo, mĩ kam Suset, ɓebo lo ngar.

² Hanani, kɨkɨɗa ku ngankomgt, ɗe nat kɨ deg madg kɨ ko dɔning Judat, na m'ndɨjed ta dɔ Judagt 'nten ta hɔt, na nãin gog. M'ndɨjed ta dɔ ɓebo Jerusalemt ho.

³ Turmɨn anan: Ndeg deg kɨ nãin kɨ teen ta hɔt kɨ'n kam nusɨ dɔningt nõ, in dan kamkɔlt kɨ rosɔl. Ndogbɔrr kɨ ɓebo Jerusalem nuj, horr õ tabitag tɔ.

Nehemi kɔ kɨta Juipg

⁴ Lon m'oo dɔ tag 'nten ye, m'ndɨ ber, m'nõ, m'ɗa kamkil ndɔg ngãibe. M'ɔg rom nyasa, na m'elta kɨ Luwah kɨ dɔrãt dõ,

⁵ m'an: Bɨraɓe Luwah kɨ dɔrãt dõ, Luwah kɨbo kɨkootɓool, Ngengom go kunkɔ loi, Ngekɔj kamkẽ deg, kɨ Ngetari, Ngegomgo mberkɨndag loi,

⁶ m'kɔi kɨ i nel mbii, i tee kumi. Oo dɔ takelɨm mĩ ɓer loi'n m'ndɨ m'el kɨnõit tajigla, ndɔ ho kàda ho, kɨta ɓerg loi Israelag. M'ndɨ m'tɔ tam dɔ majalgt loj jĩ Israelg'n kɨ ɗa kɨ ndoorɨn. Ã, mĩ kɨ ngékɨɓe lo bɔwɨm kɨ ɗa majal.

⁷ Jĩ kɨ ɗa nya kɨmajal ngãi kɨ ndoorɨn, jĩ kɨ ngomgo ndikung al, ke mberkɨndag kɨ tagkɨgang kɨ i ad ɓer loi Moij.

⁸ M'kɔi kɨ i ga kami dɔ tat kɨ i nda mbera ber loi Moij, an: Lon a i tɔin dɔ taa ne, m'a m'tɨnda m'tĩsɨ kɔ ku girrdegt kɨ dang dang,

⁹ na ĩla a i telɨn kɨromt, i ngomɨn go mberkɨndag lom, na i telɨn rosɨt goot tɔ a ne, ke neni m'tɨnda m'tĩsɨ kɔ mbã kɨgir dɔrãt kɨsãi kɨ tɔi kaa nu la m'a m'kawsɨ kɨnat, m'a m'tel sesɨ kam lot kɨ m'kɔt kad i londɨm.

¹⁰ Ĩn ɓerg loi kɨ deg loi kɨ i badɔd kɨ tɔgi kɨbobe kɨtakul jii kɨngang.

¹¹ Bɨraɓe, m'kɔi kɨ i nel mbii kɨdɔ takelɨmt, mĩ ɓer loi, kɨ takel ɓerg loi ngeɗa ronel dɔ ɓool tɔit. Ɓone ad maj urrɨm mĩ ɓer loi, ad m'ngaa majkurr ta kum det'n ndɨn. Kɨtɔ kaglot'n non mĩ ngeɗakɨla kɨbo kam ndogt lo ngar, mĩ la mĩ ngekad nyakãi ngar ye.