Nahum 1 - Maktub Ta Kumkajir

Kunjɗang lo Bɨraɓe kɨ takɨgang dɔ Ninibt

¹ Ta'n tee ta Bɨraɓe dɔ ɓebo Ninibt. Maktub koonyakamndilt lo Nahum, de kɨ Elkos.

Bɨraɓe i Luwah kɨkootɓool ho i ngeɗamaj ho

² Bɨraɓe i Luwah kɨ Ngejang kɨ Ngendangɨrra, Bɨraɓe i Ngendangɨrra kɨ ɓakot kɨ wong kɨtɔlsɔkɨr, Bɨraɓe nda ngɨra dɔ madngétant na ngom wong lon kɨta ngéndoorɨn.

³ Bɨraɓe i ngendɨ bá dɔ wongt, tɔg loa i ngãi, na a ɔrr ta dɔ ngeɗamajalt al bat. Bɨraɓe ndia kam nélmalt kɨ nélbarwãi, kilndii i bu kɨ njaat.

⁴ Bɨraɓe ndáng bahbo ad yii ndã, ad bahg tube tutɨn. Dɔning kɨ Basan kɨ Karmel tutɨn kãrɨm, hutkam kɨ Libãt ndulo mbaw.

⁵ Mbalbog yeen yɨkɨtyɨkɨt nõat, doorg dudɨn kɨber, dɔning ɓai ɓirɓir nõat, dɔning kɨ ngendɨt tube.

⁶ Nõ asɨ taaɗɔ wongt loa a? Nõ asɨ ɗa loɗant nõ wongt loa kɨtɔlsɔkɨr a? Ũ wong lon kɨtɨngabil tit horr be, na riya mbalg kɨ ningt.

⁷ Bɨraɓe i ngeɗamaj, i loyaro lo de ndɔ kamkɔlt, ndɨ nda kumɨn go degt'n ndɨ ɓan kulɨn.

⁸ Kɨtakul mankõ kɨ ta lo pilpil a nujɨn ɓebo, a tuɓa go madngétan mbã, kɨ kam lo kɨdiwt.

Ta'n Bɨraɓe elta deg kɨ Juda kɨ ngendɨ ɓebot kɨ Ninib

⁹ Ɗi ɔjɨn kamsɨt kɨ i ndoorɨn ne Bɨraɓe a? I ĩ la a nuj madngétang, na madngétag a nujsɨn nja joo al.

¹⁰ A titɨn kɨ kõng kɨ lan na wur, ke titɨn kɨ deg kɨ ngékasɨɗag, a õ horr mugɨj kɨtaagbe tit mũ kɨtut be.

¹¹ I kokɨroit ĩ Ninib la de'n ɔj ta ɗa majal ndoorɨn Bɨraɓe teet ye, ɔj ta kɨkari pãbe.

Bɨraɓe a nuj ɓe Ninib kɔ

¹² Bɨraɓe el deg kɨ Judat an: Ke neni madngétasɨg tɔgd i tɔg ngãi, ke koosɨn ngãi kaa ne, a gangɨnd kɔ ad goton. Ke neni m'ɗa sesɨ nyakɨto kaa, m'a m'ɗa sesɨ nyakɨto gog al ta.

¹³ Tajigla m'a m'tet jug lo madngétai kɔit kɔ, m'a m'gang jinjir'n dɔin ne na m'a m'taa M'nyai dõ.

Bɨraɓe elta ngar kɨ Ninibt

¹⁴ Oo nya'n hã Bɨraɓe nda mbera kɨtɔi, laten: A i ngah de mad ku ngakait kad un tɔi dɔnt al, m'a m'tɔrr ɓakumta yog kɨ kɨtɔsɨ kɨ ɗa kɨ hand nyẽ kɨ i ndan kam kujt ndubgt m'tɨlad kɔ, m'a m'ɗago dɔɓad kɨta ĩ nya kɨ kari pãbe. Kɨta tɔga goto.