Mika 7 - Maktub Ta Kumkajir

Israel ɗoosɨ kɨ ɗagootal

¹ Beto lom, mĩ Mika. Kɨta mĩ tit de'n ɗe kam ndɔɔt kad ja nja kand nduu na ngah nya mad al, kɨta deg ɓurɨn goot nya kɨ nãi kam ndɔɔt ad nya kɨ sa goto. Bɨra nduu kɨɗa kɨ nãi kɨ asɨ sa goto, kand mbaiɓood kɨdasa kɨ kamm ge goto tɔ

² De kɨro goto dɔningt, de kɨdenesew nõ Luwaht goto ku degt, ĩn tube ndɨ sahn kɨ'n ũ mosɨ kɔ koon, ndɨ yan gum kad'n hɔn ne ngankõdg.

³ A lan jid ɗan ne majal kɨ rotĩd Mbaiɓeg ndɨ ndɨjen kadkari, ngégangta ndɨ ndɨjen nyabaji, lon ndɨ gangɨn ne ta Kɨbog ndɨ elɨn ta dɔ nart kad deg adɨnd kɨ tɨga wakɨsɨ. Titbe la kɨlaɗa kɨ takeld i kɨɗabe.

⁴ De kɨmajtɔi kudt i nya kɨpãbe tit kon, de'n denesew loa tɔid tube ye, i nya kɨpãbe tɔi kɨnga kõn. Ndɔ kɔjkum'n ngéngomlog loi ad i ngékelta kɨ ta Luwaht elɨn ta dɔt kete ye ɗe woi, Na tajigla deg'n kam ɓoolt kɨta kamd dad ta paa.

⁵ Ot kad kami madɓeit. Ot ɓakul nami. I ndom tai nõ dekɨdẽt kɨ to kadit.

⁶ Kɨtɔ ngon kɨdɨngã kid bɔwɨn, ngon kɨdẽ ɓai ndoor kõn, mum kɨdẽ ndɨ ndoor mumɨn kɨdẽ, madngéta de, ĩn deg kɨ kam kujat,

⁷ Na mĩ taa, m'a m'ur kumm kɨdɔ Bɨraɓet, m'a m'nda kamm dɔ Luwaht kɨ ngekajɨm, Luwah lom a oo dɔ kɔ lom.

M'nda kam dɔ Bɨraɓe kɨ ngekajɨm

⁸ Ĩ madngétam, ot go dɔmt. Ĩla m'so kaa ne, m'a m'ɓai. Lon m'ndɨn kam tilt kɨ diw kirir, Bɨraɓe a i kunj lom,

⁹ M'a m'hɔ tɔgɨm bá dɔ wongt lo Bɨraɓe. Kɨtɔ m'ɗa majal m'ndooran Na kaglo a ɗe nõ Bɨraɓe a ɔrr ta dɔmt, na a ɗa sem A ɔrrɨm ta ɗob kɨ kam kunjt, kɨtakad m'oon kɨlaɗaa kɨdenesew.

¹⁰ Kamla madngétam ad i Babilon a oo nya'n non, rosɔl a ɗa ngekelɨm ta kan: Bɨraɓe Luwah loi i ɗah a? Kumm a oo rosɔl loa kɨ ronel. A ɓana mbujmbuj kɨber tit bɔr kɨdɔ ɗobt be. Na mĩ m'a m'ooa kɨ kumm

¹¹ Ndɔat'n a ɗan ndogbɔrrg kɨ ngang lo ɓebo Jerusalem gog, Ndɔt'n non a ndɔt'n kɨ ɗobning kɨkete.

¹² Ndɔt'n non deg a ɗen roit a ɓain ko dɔning Asirit mbã dɔning Ejipt't, ko kɨ dɔning Ejipt't mbã Bahbo Eprat't, ko bahbot kɔtkokɨ mad mbã teen bahbot mad, ɓai dɔ mbalbot mad mbã teen mbalbot mad.

¹³ Na dɔning lo madngétag a tel gootlo kɨta kɨlaɗa ngendɨt kɨta kand nyaɗad kɨmajal.

Ta õn kam Bɨraɓe kɨta Israel

¹⁴ Bɨraɓe, i ɔrr deg loi ta ɗob kɨ gɔlkɔp loi. Ĩn ɓut bat nyakagɓe loi, tajigla ndɨn kɨ kɨɗadbe kam kút ngawden dɔning ndɔɔ kɨ Karmel. Ad'd san nya dɔning Basan kɨ dɔning Galaad tit kɨ ndɔg kɨmaɗi be.

¹⁵ Bɨraɓe tur an: M'a m'adsɨ oon nyakɔj kɨyaya tit kɨ ndɔ'n deg lom teen ne kam dɔning Ejipt't kɨtɨga.

¹⁶ Girrdeg kɨ dang dang a oon nya 'nten, na rod a sɔld ke tɔgd i ngãi kaa ne, A oon ta kɨ kad elɨn al ho A utɨn mbid, na ɓet'n oon dɔ nya mad.

¹⁷ A san buning tit li tit kɨ nyag kɨ kɔrr kɔd'd ber dɔningt, a teen kam longomrodt kɨtɨga kɨ rondad, kɨngasa a gad ad telɨn kɨ ro Bɨraɓe Luwaht loj, a ɓoolɨn tɔgi kɨ ngãi.

¹⁸ Luwah, nõ i tit sei a? I ndɨ i nyàgo ɗagootal lo deg loi kɔ, ad kami ɔi dɔ tɔidɔta lo ndeg deg'n ĩn nyakagɓe loi. Luwah a hɔ ɗa wong mbãkɨnõt al kɨtaɗa ronel dɔ kɔj kamkẽt.

¹⁹ Ta a õ, kama gog kɨtaj, a ɓa ɗagootal loj girr njant. A la majalg loj tube ɓul bahbot kɨwo kɨɓing.

²⁰ A ɔj ngaka Jakob nyaɗai kɨro, a ɔj kamkẽ loi ngaka Abraham tit'n i ndan yo ad bɔwjg kam ndɔgt kɨmaɗi nu.