Mika 6 - Maktub Ta Kumkajir

Bɨraɓe aw kɨ ta kɨ deg lon, Israel

¹ Oon dɔ ta'n Bɨraɓe. Elɨn an: I ɓai dõ, elta lom nõ mbalbogt, kad i ɔrrɨn ta dɔmt ad doorlog oon dɔ ndii.

² Ĩn mbalbog, oon dɔ ta'n Bɨraɓe awɨn sesɨ. Na ĩ bagirr dɔning kɨ ɗa bijirbijir, oo dɔ. Kɨta Bɨraɓe aw kɨ ta kɨ deg lon, aw kɨ ta kɨ Israel.

³ Ĩn deg lom, m'ɗa sesɨ ɗi a? Nya kɨ majal'n m'ɗa sesɨ ye, I elmɨm ad m'oo.

⁴ Kɨtɔ tee m'tee sesɨ kɨtɨga kam dɔning Ejipt't yo, ke ba'n m'badɔsɨ ɓe ɓert yo, ke la'n m'la Moij kɨ Aarõ kɨ Maɗi kɨ dɔsɨt.

⁵ Ĩn deg lom, maj kad i gah dɔ nyat'n ĩ Balak, i gan dɔ nyat'n ngar kɨ Moab, ɔj kɨ'n ɗa sesɨ kɨ taan Balam, ngon Beor, tura kɨ nyag tube'n ɗan nya ko Sitimt mbã kɨ Gilgal, kad i gerɨn ne kɨla kaj in Bɨraɓe ɗa.

Nya'n Bɨraɓe ndɨ sah kokɨro degt

⁶ Nya kɨ ɗi m'a m'ɗen kɨnõ Bɨraɓet kad m'ɔsɨn dɔm ber nõ Luwaht Ngetɔitɔi a? Ke m'a m'ɗe nõat kɨ kadkarig kɨlahorrt kɨɗaibe a? Nat kɨ ngan mangg kɨ ɓal kɨɗa a?

⁷ Bɨraɓe a ɗa ronel dɔ bal batgt kɨ bɨla ngãi dum tɨda A ɗa ronel dɔ yibt kɨngãi kɨtit man kɨ kam baht nja dub kɨlah a? M'a mad ngonderɨm kɨta tɔidɔta lom, a ke m'a mad ngon kamm kɨtɔ majal kɨ m'ɗa a?

⁸ Ĩ de, Bɨraɓe ɔj ad i ger nya'n i kɨmaj, kɨ nya'n ndɨ sah roit. I hɔ ɗa denesew, i ndig kɔj kamkẽ deg, i ndia kɨ dɔ kɨsɔl nat kɨ Luwah loi.

Bɨraɓe elta ndoorɨn ngéɗanya kɨgoot al

⁹ Ndi Bɨraɓe ndɨ ko kɨdɔ ngendɨ ɓebot, A aj deg'n ndɨ ɓoolɨna (ngeterr a ɓool tɔi) an: Oon dɔ ĩn deg kɨ Juda ĩn tube i kawɨn na kɨ kam ɓebot.

¹⁰ M'a m'ndɨ dɔ nyangah kɨgoɗobat al M'a m'ndɨ dɔ nya mbɔj nya epa kɨgoot al kɨ ndɔl i dɔt i kam kujt lo ngeɗamajal ɓaitɔ a?

¹¹ De'n aw kɨ nya mbɔj nya kɔjkɔinya kɨgoot al kɨ nyakɔj kɨlo kɨdu kɨ asɨ al kam sakɨt, de'n non i de kɨkar nyang a?

¹² Jerusalem i ɓebo, ngémajg loi awɨn kɨ ɗa ta kõ kamdt, ngendɨ kam ɓebot ndɨ elɨn tag kɨbal, ndõd ɗoosɨ kɨ ta kɨta gooldeg.

¹³ Kɨtɔ 'nten m'a m'ndasɨn m'a ndasɨ kɨ a tee koi, na m'nujsɨ kɨta majalg losɨ.

¹⁴ A i san nya ngãi, na a i ndanɨn al, kamsɨ a to kari ad ɓo ɗasɨ. A i ndan nyag kɔtko kɨɗa, na a asɨn ngomd al, na nya'n i ngomɨn a ne, m'a mad nuj ta kiyaɗɔɔt,

¹⁵ A i duwɨn nya, na a i jan al; a i kasɨn kand ɓir, na a i wurɨn rosɨ kɨ yiba al; a i ɓan kand nduu na a ãin kasɨnduu al.

¹⁶ Kɨtɔ i ngomɨn go mberkɨndag kɨgoot al lo Omri, kɨ nyaɗa kɨ majal lo ngan Akab tube. I ndian kɨgo takɔjgt lod, kɨta 'nten m'a m'adsɨ i telɨn gootɓe, m'a mad ngendɨ kam ɓebot losɨ telɨn nya go kidɨn kidɨn deg lom a tel kɨ dɔsɨt.