Mika 4 - Maktub Ta Kumkajir

Bɨraɓe a õɓe dɔ dɔningt kɨtaagbe kɨ lapia

¹ Kaglot kɨdɔboit mbalbo'n kuj lo Bɨraɓe ɗa dɔt a i kɨ nda dõ tasom mbalbogt, a i kɨ tɔi kɨ dõ tɔi doorlog. Girrdeg kɨ dang dang tube a awɨn kɨdɔat tit man kɨ nũ be.

² Girrdeg koosɨg a awɨn, a elɨn an: I ɗen, ad j'awɨn dɔmbalbot lo Bɨraɓe, j'awɨn kuju lo Luwah lo Jakob, kɨtakad ndooj goɗobg lon, kad kɨ ndia dɔ ɗobgt loa. Kɨtɔ ta nyandoo a tee ko ɓebot kɨ Siõ, ta lo Bɨraɓe a tee ko Jerusalemt.

³ A gangta ku girrdegt kɨ dang dang, a i ngekoogo ta lo girrdeg ngãibe. A ɔin kiyaɗɔɔg lod, a oon kɔsɨ ndɔɔgt, ningag lod tɔ a ɗand ngorongt, girrdeg madg a unɨn kiyaɗɔɔg ndoorɨn ne girrdeg madg al, nẽbe kɨnõt a ndoon ɗɔɔ al.

⁴ Na dekɨɗen a ndɨ girr dĩndut lon, kɨ girr kag mbaiɓoodt lon, de mad kɨ a ndad ɓoolt goto kɨta ta Bɨraɓe Ngekoosɨg elta.

⁵ Girrdeg kɨ dang dang ndɨ ndian kam tɔ yogt lod kɨɗa kɨɗa tube, na jĩ j'a kɨ ndia kam tɔ Bɨraɓe Luwaht loj kɨndɔgndɔg mbãkɨnõt.

Bɨraɓe a ug ɔrr deg lon kam ɓe ɓert

⁶ Bɨraɓe el an: Ndɔt'n non m'a m'kaw mootg kɨnat, m'a m'kaw ĩgɨn ĩn kɨ tuɓa kɔ kɨ ĩgɨn m'da kumd ndo

⁷ na Ĩgɨn tuson moot m'a m'ad'd telɨn girrdeg kɨ nãin, ĩgɨn ĩn kɨ tuɓa kɔ a ĩn girrdeg kɨngang, na Bɨraɓe a õɓe dɔdt dɔ mbalbo Siõt, ndɔt'n non mbãkɨnõt.

⁸ Ĩ doorlo kɨ ɓebo Siõ i dɔt, ĩ tit kuj ngomlo lo ɓut batg be. A i tel õɓe gog, a i tel õɓe tit kɨmaɗi, ad i kõɓe lo ɓebo Jerusalem.

⁹ Tajigla, kɨtɔɗi i ndɨ kon kɨ ndi kɨbobe a? Ngar goto dãsɨt a? Ngekɔjta oi a? Nya kɨ to ɗai tit'n tokooj ɗan dekɨdẽ be.

¹⁰ Ĩ ɓebo Siõ kɨ ĩ tit ngomand be, i ndur yoi, i tõ ɗusɨɗusɨ tit dekɨdẽ kɨ tõ kooj. Kɨtɔ tajigla a i tee kam ɓebot kɔ, a i hɔlondɨ kam mut, a aw mbã ɓebo Babilont. Nu la a ug ɔrri, nu la Bɨraɓe a badɔi ji madngétaigt ye.

¹¹ Tajigla girrdeg kɨ dang dang ngãibe kawɨn na, na ndoorɨn ndɨ anan: Ad Siõ tel kɨyerr, ad kumj ooa ndã.

¹² Na girrdeg'n non gerɨn tagah Bɨraɓe al, gerɨn takɔjg loa al tɔ, kɨta Bɨraɓe kawd kɨnat tit sɨnga ko dɔ gar ndah nyakot,

¹³ Ĩ ɓebo Siõ, i ɓai dõ, i nda sĩga nyako'n non. M'a m'teli tit bɔw mang be, m'a mad gaj hand kɨ kɨngoti nja ningakasɨ, kad i rigɨjɨn girrdeg koosɨg; a ndah nyatetɗɔɔ lod kɔtko kɨɗa kɨta Bɨraɓe, a ad nyamajg lod Bɨraɓe ngedɔning kɨtaagbe.

¹⁴ Tajigla ĩn deg kɨ Jerusalemt, i kawɨn ngéɗɔɔg losɨ kɨnat. Madngétag lan na gugɨn dɔ ɓe losɨ, A ndan kɔt ngegangta lo Israel kɨ gɔlkɔp.