Mika 2 - Maktub Ta Kumkajir

Beto lo ngeɗa ta kõ kɨ ngendog

¹ Beto lo deg kɨ ngekɔjta ɗagootal kɨ ngeɗa majal ndɔ dɔ tɨra todt. Lon loti a ne, a tɔlɨn kon na kɨta tɔg ɗa i jidt.

² Deg'n non ɗan kumndà ndɔɔg, na taan kɨ lo ngetɔgt, ɗan kumndà kujg, na taan kɨta rod, ɗan ta kõ kɨ deg kɨ ngékɨɓe lod tu, ɗan titbe kɨ de kɨ nyakagɓe loa tɔ.

³ Kɨtɔ 'nten kel Bɨraɓe el an: Oon m'ndɨ m'ɔj ta kad tuj so dɔ degt'n ɗan: a asɨn kɔrr kɔsɨ girrt kɔ al, a i ndian kɨ tasɨ kɨ ɓa kɨ dõ al kɨta a i kaglo kɨmajal.

⁴ Kam ndɔt'n non a gangɨn ta dɔsɨt deg a udɨn wi, a nõn mbiting, anan: Jĩ kɨ nuj kɔ kɨtaagbe. Bɨraɓe ta dɔning lo deg losɨ jid ad deg kɨɗang, ãã taa jisɨt. Keg ndɔɔg losɨ ad madngétasɨg.

⁵ Kɨtɔ 'nten a i ngah de kɨkad mbɔj dɔning kɨ kɨla kɨgo yukt kɨ ya ku ngékawnagt lo Bɨraɓe al.

Ta kɨgang dɔ ngékelta kɨ balt

⁶ Deg ndɨ elɨn anan: Ot kelɨn ta kɨ ta Luwaht. Ot kelɨn tag titbe. Rosɔl a tee dɔjt al.

⁷ Ĩn ngékɨɓe lo Jakob, tag kɨtitbe ĩn tag kɨ sumba kel a? Ndɨ dɔt lo Ndil Bɨraɓe goto oo? Kɨlaɗaa i titbe ale? Tag lom a ɗan maj kɨ de kɨ ngenda goɗobat ale?

⁸ Na ĩn, i ɓai i ndoorɨn deg lom, i ndɨ i ngĩn kub ro degt ngenda ɗobo kɨ lapia, ĩgɨn gan kamd dɔ ɗɔɔt al.

⁹ I ndɨ i tuɓan dekɨdẽg lo deg lom kam kujgt lod kɨmaj koo, i ndɨ ɔrrɨn tɔko lom kɔ dɔ ngandgt kɨdu kɔ mbãkɨnõt.

¹⁰ I ɓai awɨn, kɨta nẽbe i lo taakò al, kɨta nya kɨyerr ndɨ tuj deg kɨ tuj kɨbobe.

¹¹ Ĩla de a lago log, a el takɨbal tit nél kɨ a tɔi be, an: n'a nelsɨ ta dɔ kasɨnduut kɨ kasɨ kɨngang a ne, de'n non a i ngekelta kɨ sumba deg'n ɗan.

¹² In ngaka Jakob, rota m'a m'kawsɨ kɨnat tube, m'a m'kaw ndeg Israelag kɨ nãin m'a m'ɔid kɨnat tit batg kam kɨngat, tit ɓut batg lokuldt be, Koosɨdeg ɗa kɨsen yekɨtyekɨt.

¹³ De'n ɔsɨ ndogbɔrr tet a ne, a aw nõdt; a mbutɨn lo, a tɔin tabit't, a teen kɨtɨga, ngar lod a ndia nõdt, na Bɨraɓe a i bɨradɔd.