Mika 1 - Maktub Ta Kumkajir

Pa hɔndo kɨta tujɨn a tee dɔ ɓebot kɨ Samari kɨ ɓebo kɨ Jerusalem

¹ Bɨraɓe elta Mika ngekelta kɨ Luwaht i de kɨ ɓe loa i Moreset; kaglo'n Jotam kɨ Akaj kɨ Ejekias, ĩn ne kɨ ngarg kɨ Juda. I nya'n Bɨraɓe tee dɔ ad Mika oo, ɔjɨn dɔ ɓebo kɨ Samarit kɨ ɓebo Jerusalem,

² Ĩn girrdeg tube, oon dɔ. Ĩ dɔning kɨ nyag kɨ kamt tube, i nelɨn mbisɨ. Ad Bɨraɓe Luwah, ndɨ la ta dɔsɨt Londɨnt ngendɨ kam kujt lon kɨjaɓat

³ Kɨtɔ oon. Bɨraɓe tee kam londɨnt, a ɗisɨ, a ndia dɔ logt kɨdɔ dɔningt.

⁴ Mbalbog a nyẽn girrat, hollog a teen tad tit'n hã tiw tej a nyẽn kad horrt, tit'n hã man a ãin dɔ door lot be.

⁵ Nyag 'nten tube ɗan nya kɨta tɔidɔta lo ngakaa Jakob, kɨtɔ majal lo Israel, Tɔidɔta lo ngakaa Jakob i ɗi a? I kɨlaɗa deg kɨ ɓebo Samarit ale? Majal lo ngékɨɓe lo Juda i ɗi a? I kɨlaɗa deg kɨ ɓebo Jerusalem ale?

⁶ Kɨtɔ 'nten m'a mad ɓebo Samari tel duw mbal kam mut, kad tel lo hɔ nduu. M'a m'tɔsɨ mbalg loa m'tɨlad kam hollot, m'a m'tɔ kujg loa kɔ mbã kɨ girrt ber.

⁷ Ɓakumta nyag loa tube, a tɔɔnd kɔsɨkɔsɨ; nyag'n ndugo kɨ nar kaya a land horro. M'a m'nuj yog loa kɔ tube, kɨta kawd kɨnat kɨ nyabaji kaya dekɨdẽ na a telɨn nyabaji kaya dekɨdẽ ho.

Tuj a so dɔ ɓebot kɨ Jerusalem

⁸ Kɨtɔ 'nten m'a m'non, m'a m'ũd m'a m'ndia kanj sanja kɨ rom kari m'a m'nõ tit talbisɨ, m'a m'tõ ɗusɨɗusɨ tit bulum be.

⁹ Kɨtɔ do lo Samari a ed al aw mbã kɨ Juda aw mbã ood tabit lo deg lom, mbã kɨ ɓebo Jerusalemt,

¹⁰ Ot lan mbera kam ɓebot kɨ Gat. Ot nõn kam ɓet kɨ Ako. M'nduwɨr rom kam but kam ɓet kɨ Bet Leapra.

¹¹ Ĩn ngendɨ kam ɓet kɨ Sapir, i tɔin ɗobo kɨ ro kɨ kari kɨ rosɔl. Ĩn ngendɨ kam ɓet kɨ Saanan, ot teen kɨtɨga. Ndo kɨhɔ lo ngendɨ kam ɓet kɨ Bet Haesel ɔgsɨ ngah nya'n i ndan kamsɨ dɔt.

¹² Ngéndɨ kam ɓet kɨ Marot ngoon kaj kɨ rondad, kɨta tuj tee kokɨro Bɨraɓet mbã ɔd tabit kɨ ɓebo Jerusalemt,

¹³ In ngendɨ Lakis, i dɔn sɨndag ngékãi ngɔd ngãi ta pusɨɗɔɔgt. Kɨtɔ ĩn la i lan girr majal lo ɓebo Siõ, na ngahn tɔidɔtag lo Israelag kamsɨt tɔ ho.

¹⁴ Kɨtɔ 'nten a i tɔn rosɨ kad ngendɨ Moreset nderbe kɨ Gat, na ɓebo Akjib a ɗa kɨ ngarg lo deg kɨ Israelt al.

¹⁵ Ĩn ngendɨ Maresa, m'a mad ngetaɓe ɗe roit, ngetɔko, ad i mbaiɓeg lo Israel, a andɨn kam bulombalt kɨ tɔa i Adullam.

¹⁶ I jan bisɨdɔsɨ, i ndan ɔrrɨn dɔsɨ bai. I hɔn ne ndɔ ngansɨg ngetar losɨ. Adɨn dɔsɨ ngɔ tit dɔ mal be. Kɨta a awɨn sed ɓert sãi rosɨt.