Matie 28 - Maktub Ta Kumkajir

Jeju ɓai lo koit

¹ Go ndɔ taakòt, ndɔt kɨ dasabang lo ndɔg kɨtanãimɨta, kɨ sĩ ritit, Mari kɨ Magdalat kɨ Maɗi kɨmad awɨn koo dɔɓadt.

² Na oon, dɔning yee yɨkɨtyɨkɨt: Malaika lo Bɨraɓe ɗisɨ ko dɔrãt, ɗe nduɓɨr mbal kɨ ta ɓenint kɔ, na ndɨ ber dɔt.

³ Roa tit tel ndii be, kub loa nda ngũng tit ndàbul be.

⁴ Ɓool tɔl ngéngomlog sɔkɨr, ndadɨn yatɨt, tuson tit dekɨkoig be.

⁵ Na Malaika elta dekɨdẽg an: Ot ɓoolɨn. M'ger kad i ndɨ i sahn Jeju'n gana kagdosɨt.

⁶ Goto labe, kɨta ɓai lo koit tit'n elɨn nõ; i ɗe oon lon tot.

⁷ Na awɨn kanangbe elɨn ngéndoog loa anan: Ɓai ku ngékoigt, na oon ndɨ aw nõsɨt Galilet, nu la a oona tit ye. Ĩla m'elsɨ nõ.

⁸ Telɨn kɔ dɔɓadt kanangbe kɨ ɓool kɨ ronel ngãi, ãin ngɔd ɔrrɨn hoia ngéndoog loa.

⁹ Na oon Jeju a ɗe kɨ rodt na eld an: M'ɗasɨ lapia. Dekɨdẽg awɨn kɨ roat, hɔn nja, na ɔsɨn dɔd ber nõat.

¹⁰ Kamla Jeju eld an: Ot ɓoolɨn. Aw elɨn ngankomg kad awɨn Galilet. Nu la a oomɨnt ye.

¹¹ Lon ĩn ɗobo ɓaitɔ ye, deg madg ku ngéngom dɔɓadt awɨn kam ɓebot elɨn ngéjanyamosɨkadkari kɨbog ta nyag tube'n ɗa nya nõ.

¹² Lon ngéjanyamosɨkadkari kɨbog kawɨn na kɨnat sed kɨ kɨbog lo Juipg, na ɔjɨn na ta woi ye, adɨn nar kɨ kɔra asɨ tatbe ngéɗɔɔg, na anan:

¹³ Ka ta 'nten la ka elɨn ye: Ngéndoog loa ɗe ɓoogɨna ndɔ lon kɨ to kɨ ɓin.

¹⁴ Na ĩla ta'n non so mbi ngekõɓet a ne, jĩ la j'a kɨ gɔra, na j'a kɨ ɗa kad ɓool ɗasɨ al.

¹⁵ Ngéɗɔɔg taan nar, na ɗan kɨgo tat'n elɨnd. Ta 'nten tɨnda tĩn kɨ ro juipgt mbã ɓone.

Jeju tee hɔi kɨ ro ngéndoogt lon

¹⁶ Na ngéndoog loa kɨkɨlah gidaikɨɗa awɨn Galilet, dɔ mbalt'n Jeju dad.

¹⁷ Lon oona ye, ɔsɨn dɔd ber nõat, na kɨmadg ɓadɨn.

¹⁸ Jeju ɗe rodt, na eld tag 'nten: Tɔg tube kɨ kam dɔrãt kɨ kɨ dɔningt admɨn.

¹⁹ Kɨtɔ 'nten awɨn, i telɨn girrdeg tube ngéndoogt lom, i ɗand baptem kam tɔ Bɔwt, kɨ kɨlo Ngon, kɨ Ndil Kɨkunjɗang.

²⁰ I ndoond kad ngomɨn go nyag tube'n m'ndasɨ mberd, na oon, m'a mĩ nat sesɨ kɨndɔgbe mbã dɔngoi kohn ɗan.