Hoita kɨmaj lo Jeju Krist'n Luk ndang 6 - Maktub Ta Kumkajir

Ngéndoog lo Jeju tetɨn dɔ nyako ndɔ taakòt

¹ Go ndɔ taakòt mad lo Juipg, Jeju a gang dɔ ndɔɔ nyakot, ngéndoog loa mbã girr tet dɔ nyako, a dudɨn kɨ kam jidt, a san.

² Na kɨmadg ku Parisɨgt anan: Kɨtɔɗi a ɗan ne nya kɨgoɗobat al kɨ ndɔ taakò a?

³ Jeju turd an: Ĩ oon nya'n Dabid ɗa lon ɓo õa kɨ deg kɨ ĩn nat sia,

⁴ and kuju lo Luwah, sa bɨna kɨnda nõ Luwaht, mbã deg'n ĩn nat sia kaa ne, ad'd san ho. Nya'n hã i goɗobat al kad de kɨ kari sa, na ngéjamosɨ kadkarig kɨɗabe tã.

⁵ Eld an: Ngon de i Bɨraɓe dɔ ndɔ taakòt.

Ta lo de'n jia oi njɔrr

⁶ Ndɔ taakòt kɨɗang, Jeju and kam kuj kawnat lo Juipg, ndɨ ndoo deg tit. De mad ndɨ nõ jikõa oi njɔrr.

⁷ Ngéndoo maktubg kɨ Parisɨg ndan kumd kɨ dɔat kɨ'n oon ke ɓet a yoot de ye kɨ ndɔ taakò a?

⁸ Na Jeju ger tagahd ɓet, ad el de'n jia oi njɔrr an: I ɓai dõ, i ɗa ne be, nõ degt tube, de'n non ɓai ɗa dõ.

⁹ Kamla Jeju eld an: M'ndɨjesɨ, i goɗobat kɨ ndɔ taakò kad de ɗa maj a? Ke majal a? Kad de aj ro de e? Ke tɔla a?

¹⁰ Kamla nɔld mbet't tube, na el de'n non an: I sɨra jii. Ɗa titbe, ad jia tel lapia.

¹¹ Wong tɔld sɔkɨr, ɔjɨn na ta dɔ nyat'n ɓet n'a n'ɗan kɨ Jeju.

Jeju mbed ngéndoog lon kɨkɨlah gidaijoo

¹² Kam ndɔgt'n non Jeju tee aw dɔ mbalbot kad kɨ nelta kɨ Luwah. Ndɨ elta kɨ Luwah ndɔ mbã lo tia.

¹³ Lon lo ar ye, kun ngéndoog lon kɨ ront; mbed kɨkɨlah gidaijoo kudt, ndah tɔd ngombangkɨlag.

¹⁴ Tɔd la ten: Simõ'n Jeju ndah tɔa Pierr, kɨ ngonkõa Andre, kɨ Jak, kɨ Jã, kɨ Pilip, kɨ Bartelemi,

¹⁵ kɨ Matie, kɨ Tomas, kɨ Jak ngon Alpe, kɨ Simõ kɨ a kunɨna Jelotes,

¹⁶ kɨ Jud ngon Jak kɨ Judas Iskariot ĩn laa ji madngétaagt.

Jeju ndoo deg ta lon na yootd ho

¹⁷ Jeju ɗisɨ sed dɔ mbalbot kɨber ɗa lot mad kɨ todɨla, koosɨ ngéndoog loa kaa ne, ĩn nõ, kɨ koosɨdeg ngãibe ko kam dɔning Judet tube, kɨ kam ɓebo Jerusalemt, kɨ kam dɔningt kɨ Tir kɨ Sidõ.

¹⁸ Deg'n non ɗen kad kɨ n'oon dɔ ta loa, kad Jeju yootd dɔ mõigt lod. Deg'n ndil kɨyerrg dan rod ndo ye yootd ho.

¹⁹ Koosɨdeg tube sahn kɨ n'ɔdɨna kɨta tɔg ndɨ tee roat yootd tube.

Ta dɔ ronelt kɨ kamkil

²⁰ Kamla Jeju un kumɨn kɨdɔ ngéndoogt lon, an: Ronel i losɨ ĩn ngéndog kɨta kõɓe lo Luwah i losɨ.

²¹ Ngéronelg la i ĩgɨn ɓo ndɨ õsɨ tajigla ye, kɨta Luwah a ad i ndanɨn,

²² ngéronelg la i ĩgɨn deg ndɨ ɔsɨsɨnta, ndɨ mbetsɨn, ndɨ tajsɨn, ndɨ telɨn tɔsɨ nya kɨmajalt kɨta Ngon de.

²³ I ɗan ronel lon nyag'n non ɗan nya, na i ɓain kɨ ditalg kɨ ronel kɨ dumbit kɨta nyabajisɨ i ngãibe kam dɔrãt dõ. Titbe la bɔwdg maɗi ɗan ne kɨ ngékelta kɨ ta Luwaht.

²⁴ Na be to losɨ, ĩn ngémajg, kɨta i ngahn sɔlkam tajigla.

²⁵ Beto losɨ ĩn deg'n i ndenɨn tajigla i ndɨn kɨ nyamajg, na ndɔ madt ɓo a õsɨ.

²⁶ Beto losɨ, lon deg tube elɨn ta losɨ kɨmaj kɨta titbe la bɔwdg ɗan ne kɨ deg kɨ ngom, ĩn ɗan rod ngékelta kɨ ta Luwaht ye.

Ta nyandoo lo Jeju dɔ tar madngétajgt

²⁷ Na ĩn, kɨ ngékoo dɔ ta lom, m'ndɨ m'elsɨ; i tarɨn madngétasɨg, i ɗan maj kɨ ngékɔsɨsɨ ta.

²⁸ I njangɨn dɔ ngéndɔlsɨ. Elɨn ta kɨ Luwah kɨta ngéɗa kumsɨ ndo.

²⁹ Ĩla de nda kɔti ko kɨɗa a ne, i tel ko mad ada ho. Ĩla de mad taai kubkul a ne, ot kɔga ngamaj loi.

³⁰ Ad nya dekɨɗen kɨ ngekɔi nya. Ĩla de taai nyamajg loi a ne, ot tel ndɨjea.

³¹ Tit'n i ndigɨn kad deg ɗan ne sesɨ ye, i ɗan sed titbe ho.

³² Ĩla i tarɨn ngétarsɨ koon a ne, kɨta ɗi i ndigɨn kad deg ɗasɨn mersi a? Ngéɗamajalg kaa ne, ndɨ tarɨn ngétardg ho.

³³ Ĩla i ndɨ i ɗan maj kɨ ngéɗasɨ maj a ne, ke ɗi i losɨ a? Ngéɗamajalg ndɨ ɗan titbe ho.

³⁴ Ĩla i ndɨ adɨn girra ĩgɨn i ndɨ ndan kamsɨ dɔdt kɨ i ngahn rodt a ne, mersi kɨ ɗi i losɨ a? Ngéɗamajalg ndɨ adɨn girra ngéɗamajalg kɨtakad ngahn titbe ho.

³⁵ Be al, maj kad i tarɨn madngétasɨg. I ɗand maj. Adɨn gira deg, na ot ndan kumsɨ got. Nyabajisɨ a i ngãibe, a ĩn ngan Ngetɔitɔi kɨrota, kɨta Ngetɔitɔi i ngeɗa maj kɨ deg ngeɗaa mersi al kɨ ngeɗaa majal tu.

³⁶ Kɨtɔ 'nten kɨ ĩn ngékookumtondo lo deg tit'n bɔwsɨ ĩn ngekookumtondo lo deg.

Ta nyandoo lo Jeju dɔ takɨgangt'n deg ndɨ gangɨn dɔnat

³⁷ Ot gangɨn ta dɔ degt. Kamla Luwah a gangta dɔsɨt al. Ot lan ta dɔ degt. Luwah a hɔsɨ kɨ ta al ho. I nyan go majal lo deg kɔ. Luwah a nyàgo majal losɨ kɔ ho.

³⁸ Adɨn kamla Luwah a adsɨ ho ye, kɨ ngotɔrrnya kɨbo kɨ kɨre nda ndek ndek mbã ũ kɔ; a adsɨn ne kɨ gusit. Kɨ ngotɔrrnya'n i ndɨ tɔrrɨn ne la Luwah a tɔrrɨn adsɨ ho ye.

³⁹ Jeju eld terrta 'nten tɔ: Mundo a asɨ kɔrrta ɗob mundo oo? Ĩla i be a ne, ĩn tujoo a son holɓet ale?

⁴⁰ Ngendoo nya ro det a tɔi de kɨ ngendoon nya al, na lon ndoo nya ad asɨnatap ye, a i tit ngendooa nyat be ho.

⁴¹ Kɨtɔɗi i ndɨ nulɨn bul mũ kɨ kum ngonkõit, na kagdaw'n to kumit ye, oo al a?

⁴² Titbãi asɨ kel ngonkõi kan ngonkom ad m'ɔrr yel'n hã i kumit, na i kɨɓe kɨ dɔi ye, oo kagdaw'n hã to kumit ye al a? Ĩ ngendokumdeg, ɔrr kagdaw'n hã to kumit nõ kete kamtã; kamla a oo lo ar nyang kad ɔrrɨn yel'n hã i kum ngonkõit ye.

Ta nyandoo lo Jeju dɔ kagt kɨ kanda

⁴³ Kag kɨmaj kɨ tee kɨ kandɨn kɨmajal goto. Na kag kɨmajal kɨ a tee kɨ kandɨn kɨmaj goto ho.

⁴⁴ Deg gerɨn kag kɨɗen kɨta kanda. A jan kand mbaiɓood ro kongt al, a jan kand nduu dɔ ngargt al ho.

⁴⁵ De kɨmaj ndɨ tee kɨ nyamajg ko kam nyaɓɔt lon kɨmaj kɨ kamat; na de kɨmajal ndɨ tee kɨ nyag kɨmajal ko kam nya kɨɓɔt lon kɨmajal, kɨta ta de ndɨ elta nya'n hã to ngarkamat mbuj.

Terrta dɔ kujgt kɨjoo

⁴⁶ Kɨtɔɗi i ndɨ kunmɨn ne Bɨraɓe, Bɨraɓe; na i ɗan nyag'n hã m'el ye al a?

⁴⁷ Dekɨɗen'n hã ndɨ ɗe romt, ndɨ oo dɔ tag lom, ndɨ ɗa got a ne, m'a m'dasɨ kɨ ĩn hã taan na sia.

⁴⁸ I tit de'n ɗa kuj, urr ɓe mbã ad wo, ndah girra dɔ mbangt, na lon man la ye õ nda kuj'n non, na asɨ yeea al, kɨta ɗana maj.

⁴⁹ Na de'n hã oo dɔ, na ɗagoot al a ne, taan na kɨ de'n hã ɗa kuj dɔningt kari kanj kurr ɓe; na lon man õ ndaa ye, tentenbe tee so tet kuj'n non i kɨbobe.