Hoita kɨmaj lo Jeju Krist'n Luk ndang 5 - Maktub Ta Kumkajir

Jeju kun nawg sɔɔ

¹ Ndɔ mad Jeju ɗa ta bahbo Jenejaret't. Deg koosɨg ɗa ɓan'na kɨ roat kad kɨ n'oon dɔ ta lo Luwah.

² Jeju oo toog joo ndɨn ta bahbot. Nawg teen kamdt kɨ'n tugon bandg lod.

³ Jeju and kam toot kɨkɨɗa ku toogt kɨ joo'n ndɨn ta baht, toon non i lo Simõ, ndɨjea kad ɔsɨ too kɨ kam mant ngonsĩ.

⁴ Lon nya takelta ye, el Simõ an: Ɔsɨ kɨ dɔɓult, ũn bandbɨrag losɨ nẽbe, i hɔn ne kanj.

⁵ Simõ tura an: Ngeem, jɔr dan kondɔ tube kɨ ndang kari, kanj hɔ nya mad; na kɨgo tat loi m'a m'ũn bandbɨrag.

⁶ Lon ɗan nya 'nten ye, hɔn kanjg ngãibe, mbã bandbɨrag lod ɗa kɨ'n gang.

⁷ Kunɨn namdg'n ndɨn kam toot kɨ nu nõ kɨ jid kad ɗe ɗan sed. Ɗe doosɨn toog kɨ joo'n non kɨkanj, mbã toog ɗa kĩn nduin.

⁸ Na lon Simõ Pierr, oo ye, ɔsɨ gojɨn nõ Jejut, an: Bɨraɓe i ɗa kɨ sãi, kɨta mĩ ngeɗamajal.

⁹ Kɨtɔ yad biw, kɨ tubeg'n in sia nãt, kɨta tir kanj'n hɔɔn.

¹⁰ Titbe tɔ la Jak kɨ Jã ngan Jebede kɨ ĩn madna sed Simõ, nya 'nten yad ngãi ho, kamla Jeju el Simõ an: Ot ɓool nẽbe kɨnõt a i naw hɔ deg.

¹¹ Lon ɗen kɨ toog lod kɨ ta gɔsɨ baht ye, nyan nyag lod, na ndulon go Jeju.

Jeju yoot ngebanj

¹² Lon Jeju ndɨ kam ɓet mad ye, de mad kɨ banj ganga i nõ. Lon oo Jeju ye, so ber kɨ takumɨn ningt nõ Jejut, kɔa an: Bɨraɓe, ĩla i ndig a ne, asɨ karɨm.

¹³ Jeju la jin ɔda'n an: M'ndig kɨ ar. Tentenbe banj goto roat.

¹⁴ Kamla Jeju ndaa mber kɨ ot kel de mad, na ela an: Aw, i da roi ngéjamosɨ kadkarig ad kadkari kɨ Moij eltaa kɨtakad deg gerɨn ne banj goto roit.

¹⁵ Na hoia ɔrr go log kɨ tɔi, ad deg koosɨg kawɨn na kɨroat kad oon dɔ ta loa, na kad yootd dɔ rotogt lod ho.

¹⁶ Na Jeju tɔ ron aw kam dɨlalot, elta kɨ Luwah nu.

Jeju yoot ngerokoinjɔr

¹⁷ Ndɔ mad Jeju ndɨ ndoo deg, Parisɨ madg kɨ ngéndoo mberkɨnda lo Moij ndɨn roat, ĩgɨn hã ɓain ɗen ko kam ngon ɓet kɨ ɗen kam dɔning Galilet, kɨ kam dɔning Judet, kɨ kam ɓebo Jerusalemt. Na tɔg Bɨraɓe i nat sia kad yootɨn deg.

¹⁸ Deg unɨn de mad kɨ ngerokoinjɔr kɨ nyatoa, a sahn kɨ n'andɨn sia, kɨ'n lana nõ Jejut.

¹⁹ Na lon ngahn ɗob kand sia al kɨta koosɨdeg ye, alɨn sia dɔ kujt, ɗan bulo dɔkujt, tuin nyato kɨ ngerokoinjɔr tot dan degt kɨ nõ Jejut.

²⁰ Lon Jeju oo kadkam lod kad i kadkam kɨ jeje ye, el an: Dekɨdɨngã, majalg loi ĩn kɨ nyàgo kɔ.

²¹ Ngéndoo maktubg kɨ Parisɨg mban girr gah ta kamdt anan: De kɨ ngekelta kɨmal dɔ Luwaht kɨ titbe i nõ a? Nõ asɨ nyàgo majalg kɔ a? Luwah kɨɗabe tã.

²² Jeju ger tagahd ɓet, turd an: Kɨtɔɗi i gaan ne taag 'nten kamsɨt a?

²³ Oon ye kɨ ɗah i soot a? Kad de el ngerokoinjɔr an: Majalg loi ĩn kɨ nyàgo kɔ, a ke kad ela an i ɓai dõ i ɓaning?

²⁴ Na kɨtakad i gerɨn Ngon de ndɨ kɨ tɔg dɔningt ne kad nyan go majalg lo de kɔ ye, Jeju el ngerokoinjɔr an: M'eli m'an i ɓai dõ, un nya toi, na aw ɓe loi.

²⁵ Tentenbe ɓai ɗa nõdt, un nyaton, na aw ɓe lon, a ɔsɨgon Luwah.

²⁶ Ta ya deg tube biw, ad ɓool tɔld sɔkɨr. Ɔsɨn gon Luwah anan: J'oo nyag kɨdang ɓone.

Jeju kun Lebi

²⁷ Gog go nyagt 'nten, Jeju tee aw, oo de mad kɨ ngetirrdɔnya, tɔa i Lebi, ndɨ lo tirr dɔ nyat, ela an: I ndulo gom.

²⁸ Lebi ɓai ndulo goa.

²⁹ Lebi ɗa mburr nam kɨbobe kam ɓet lon kɨta Jeju. Koosɨ ngétirrdɔnyag kɨ deg madg ndɨn sed ta nyasat.

³⁰ Na Parisɨ madg kɨ ngéndoo Maktub lod nyurɨn ta dɔ ngéndoogt lo Jeju, anan: Kɨtɔɗi i ndɨ san ne, i ndɨ ãin ne sed ngétirrdɔnyag kɨ ngéɗamajalg a?

³¹ Jeju turd an: Ngérongang a geen dɔktor al, na ngémõig tã.

³² M'ɗe kɨta deg kɨdenesew al, na kɨta ngéɗamajalg kad tɔrrɨn ndid tã.

Ta ndɨje dɔ kɔgro nyasat

³³ Deg madg elɨn Jeju anan: Ngéndoog lo Jã ɔgɨn rod nyasa kɨ nja natnatbe, ndɨ elɨn ta kɨ Luwah, titbe ngéndoog lo Parisɨg ndɨ ɗan ne ho, na ngéndoog loi ndɨ san ho ndɨ ãin ho.

³⁴ Jeju eld an: Lon de kɨ ngeɗa lo ta dekɨdẽ kij i nat kɨ namɨng ɓai tɔ ye, oo kad asɨn hɔ rod dɔ nyasat e? Be al.

³⁵ Na kaglo a ɗee nõ lon a unɨn de kɨ ngeɗa lo ta dekɨdẽ kij rodt kɔ la, a hɔn rod dɔ nyasat ye?

³⁶ Jeju el terrta 'nten tɔ an: De kɨ til ta gaj kub kɨ kij la'n lew kɔn kub goto. Ĩla i ɗa titbe a ne, a til kub kɨ kij, tagahj kub kɨ kij'n non a ɓona kɨ kon kub al.

³⁷ De kɨ a ut kasɨnduu kɨ kij kam kõn galgt goto kɨta ĩla i titbe a ne, kasɨnduu a ndu galg ad kasɨnduu ũ kɔ, galg tɔ a tujɨn.

³⁸ Na kari na a utɨn kasɨnduu kɨ kij kam galgt kɨ kij.

³⁹ De kɨ ãi kon kasɨnduu kete woi, kɨ ndig kãi kɨ kij goto, kɨta a el an: kõna maj tɔi kɨ kij.