Hoita kɨmaj lo Jeju Krist'n Luk ndang 24 - Maktub Ta Kumkajir

Jeju ɓai lo koit

¹ Dekɨdẽg'n non unɨn nyag kɨ kootmbĩ'n ɗan go, awɨn ne dɔɓadt kɨsĩ ritit ndɔt kɨ dasabang lo ndɔg kɨtanãimɨta.

² Oon ndubɨrɨn mbal ta dɔɓadt kɔ woi kete nõdt.

³ Andɨnt na ngahn dãro Bɨraɓe al.

⁴ Ɗan nõ, kamd ɗa dad ta paa dɔ nyat 'nten ɓaitɔ ye, oon deg joo ɗan kadt kɨ kubg kɨ ndulo ngẽingẽi.

⁵ Ɓool tɔl dekɨdẽg sɔkɨr ad lan dɔd kɨber. Deg'n non elɨnd anan: Kɨtɔɗi i ɗa i sahn ne ngekumkajɨr ku ngékoigt a?

⁶ Goto nẽbe, na ɓai lo koit. I gan kamsɨ dɔtat'n elsɨ lon ndɨn dɔning Galilet ɓaitɔ. El an:

⁷ Kari na a lan Ngon de ji ngéɗamajalgt, a gana kagdosɨt, na ndɔt kɨkõmɨta a ɓai lo koit.

⁸ Dekɨdẽg gan kamd dɔ tagt lo Jeju.

⁹ Ɓain dɔɓadt tel ɗen ɓe, ɔrrɨn hoi nyag 'nten ngéndoog kɨkɨlah gidaikɨɗa kɨ ndegag tube tɔ.

¹⁰ Dekɨdẽg'n elɨn ngombangkɨlag tag'n non ye, i Mari Madelen kɨ Jãn, kɨ Mari kõ Jak kɨ ndeg dekɨdẽ madg'n ĩn sed nat.

¹¹ Na ngombangkɨlag oon tit ta'n non i ta kɨpãbe, taan ta lo dekɨdẽg al.

¹² Na Pierr ɓai, la ɔrr kɨ ngɔd aw dɔɓadt, ud gat oo kub duba tã to kɨɗabe. Kamla ɓai aw ɓe lon, ta yaa dɔ nyat'n ɗa nya.

Jeju ndɔd ngéndoog lon joo dɔ ɗob kaw ɓet kɨ Emawst

¹³ Ndɔt'n non deg joo ku ngéndoogt lo Jeju ndɨ awɨn ngonɓet mad kɨ tɔa i Emaws ɗoba wo kɨ ɓebo Jerusalem asɨ kilometɨr kɨlah gidaikɨɗa.

¹⁴ A dan na ta, dɔ nyagt tube'n ɗa nya.

¹⁵ Lon a dan na ta, na a ndɨjen na ta ɓaitɔ ye, Jeju kɨ dɔn ɗe rodt aw sed nat.

¹⁶ Na tɔg mad ut kumd ad gerɨn takĩa Jeju al.

¹⁷ Jeju eld an: Ta ɗi a elɨn na, a i lan nat i ndɨ aw ne a? Duban, ɗa ndɨngan ndo.

¹⁸ Kɨ kɨɗa'n tɔa i Kleopas tura an: I kɨ kɨɗaibe la ĩ mbah kam Jerusalemt la ĩ ger nyag'n ɗan nya kamt kam ndɔgt'n non al yo?

¹⁹ Jeju eld an: Nya ɗig a? Elɨna anan: Nyag kɨ dɔ Jeju kɨ Najaret'n i Ngekelta kɨ ta Luwaht, kɨ ngétɔg kam kɨlat nõ Luwaht kɨ nõ degt tube tɔ.

²⁰ Ngéjamosɨkadkari kɨbog kɨ mbaiɓeg loj lana kad gangɨn ta koi dɔat, gana kagdosɨt tɔ.

²¹ Na maɗi kɨ nda kamj dɔat j'an ĩla a badɔ Israel ye. Na kanj nyag'n non tube, ɓone la i ndɔ kɨkõmɨta go nyagt 'nten'n ɗan nya.

²² Dɔ ĩt 'nten tɔ dekɨdẽ madg ku degt loj elɨn ad yaj, awɨn dɔɓadt kɨ sĩ ritit.

²³ Na lon ngahn dãroa al ye, tel ɗe anan: N'oon malaikag, anan aw kɨ dɔn dõ.

²⁴ Kɨmadg ku ĩgɨtɨn ndɨn nat sed tɔ ye, awɨn dɔɓadt, ngahn tit'n dekɨdẽg elɨn ne, na ĩn kɨɓeg oon Jeju kɨ kumd al.

²⁵ Kamla Jeju eld an: Ĩn ɓood deg ngékamkɔidɨrɨr dɔ kadkam nyagt tube'n ngékelta kɨ ta Luwaht elɨn.

²⁶ Kari na Krist a dai yon kɨ nyag kɨ kõ 'nten, kamla a ndɨ kam kɔsɨgont tɔ ale?

²⁷ Ɔrrd girr nyag kɨ ndangɨn dan ne dɔa kam maktubt lo Luwah tube mba girra dɔ maktubgt lo Moij ɗen kɨdɔ tat lo ngékelta kɨ ta Luwaht tube.

²⁸ Nãi nderbe kad teen ngon ɓet'n ndɨ awɨnt, na Jeju ɗa tit ndɨ aw kɨ kete ɓaitɔ.

²⁹ Na deg kɨ joo'n non ɗe elɨna anan: I ndɨ sej, kɨta lo kɨ sɔl i nderbe, kàd ndɨ aw kɨta kud tɔ. Ad Jeju and kam kujt kad kɨ'n ndɨ nat sed.

³⁰ Lon ndɨ sed nat ta nyasat ye, un bɨna ɗa mersi Luwah hɔ tet, ad'd.

³¹ Kamla kumd tee ad gerɨn takĩa Jeju, na nyimɨr takumdt.

³² Elɨn na anan: Lon a elj ta dɔ ɗobt, a ɔrrjɨn girr ta kɨ kam maktubt lo Luwah ye, takela i tit horr kɨ õ kamjt ale?

³³ Tajigtbe ɓai awɨn ɓebo Jerusalemt gog, ngahn kɨkɨlah gidaikɨɗa'n non, kɨ ĩgɨn ĩn sed nat, kawɨn na kɨ nat lo kɨɗabe.

³⁴ Ndɨ anan Bɨraɓe ɓai lo koit, tee hɔi kɨ ro Simõt.

³⁵ Deg kɨ joo'n non ɔrrɨn hoi nyag'n ɗan nya dɔ ɗobt, kɨ tit'n ad'd gerɨn ne takĩa Jeju lo tet bɨnat.

Jeju tee hɔi kɨ ro ngéndoogt lon

³⁶ Ndɨ elɨn tag 'nten ɓaitɔ a ne, Bɨraɓe kɨ dɔn ɗa dandt eld an: Lapia kɨ ndɨ dɔsɨt.

³⁷ Ɓool tɔld sɔkɨr ad ndild tee saw oon a anan i ndil la n'ndɨ n'oon ye.

³⁸ Na Jeju eld an: Kɨtɔɗi kamsɨ gangɨn ngalang a? Kɨtɔɗi tɔ tagah kɨtitbe ndɨ ɓain kamsɨt a?

³⁹ Oon jim kɨ njam, i mĩ kɨ dɔm, ɔdmɨn oon; kɨta ndil a kɨ dã kɨ kɨngag al tit'n i ndɨ oon ne m'ndɨn.

⁴⁰ Lon elta 'nten ye dad jin kɨ njan.

⁴¹ Na lon ndɨ adɨn kamd al ɓaitɔ kɨta ronel, ta yad tɔ ye, eld an: I ndɨn kɨ nyasa mad nẽbe e?

⁴² Adɨna gind kanj kɨ su kɨ mbãr tej.

⁴³ Jeju un sa nõdt.

⁴⁴ Kamla eld an: 'Nten la i ta lom'n m'elsɨ lon mĩn sesɨ nat ɓaitɔ ye. Kari na a tɔlɨn ta nyag tube'n ndangɨn dan ne dɔm kam Mberkɨndat lo Moij kɨ kam tat lo ngékelta kɨ ta Luwaht kɨ kam pagt tɔ.

⁴⁵ Kamla tee hangald kɨtakad gerɨn ne girr ta kɨ kam Maktubt lo Luwah ye.

⁴⁶ Eld an: Titbe la ndangɨn ne kam Maktubt lo Luwah ye, kari na Krist a dai yon na ndɔt kɨkõmɨta a ne a ɓai ku ngékoit.

⁴⁷ Kari na a lan mber ta kɨ ro girrdegt kɨ dang dang tube kam tɔat kad tɔrrɨn ndid dɔ majalgt lod; a mbã girra Jerusalemt.

⁴⁸ Ĩn la ĩn ngémanaj dɔ nyagt 'nten ye.

⁴⁹ Oon tɔ. M'ndɨ m'la kɨ nya'n Bɔwm unɨn kɔn adsɨ kɨdɔsɨt, na ĩn i ndɨn bá kam ɓebot, mbã kad tɔg kɨ ko dõ dɔrãt ɗe dɔsɨt.

Jeju tel aw dɔrãt gog

⁵⁰ Kamla aw sed kɨtɨga mbã kɨkad ɓet kɨ Betani, nu la ɔi jin kɨ dõ njangɨn dɔd ye.

⁵¹ Lon ɗa njang dɔd ɓaitɔ ye, Jeju nyad, unɨn na kɨ kam dɔrãt dõ.

⁵² Ɔsɨn dɔd ber nõat, kamla tel awɨn ɓebo Jerusalemt gog kɨ ronel kɨ ngãi.

⁵³ Ndɨn kam kuj ndub Luwaht kɨndɔgndɔg ndɨ ndubɨn Luwah.