Hoita kɨmaj lo Jeju Krist'n Luk ndang 23 - Maktub Ta Kumkajir

Jeju ɗa nõ Pilat't

¹ Koosɨg lod tube ɓai, ɔrrɨn Jeju an sia nõ Pilat.

² Mban girr kun dɔa, anan: Kɨ ndɔd de'n ɗan ɗa sɨla deg loj kɨ taanɗɔɔ ngekõɓeg, eld kad ban lambo Sejar al, ɗa el an: Nĩ kɨ dɔn nĩ Krist kɨ ngar tɔ.

³ Pilat ndɨje Jeju an: Ĩ ngar lo Juipg a? Jeju tura an: Ĩ el titbe.

⁴ Pilat el ngéjanyamosɨkadkari kɨbog kɨ deg koosɨg an: M'ngaa ta mad dɔ det'n ɗan al.

⁵ Na deg koosɨg hɔn kɨ dɔt kɨ tɔg anan: Ndɨ sila deg kɨ nyandoo loa kam dɔning Judet kɨtaagbe, mbagɨra ko Galilet mbã ɗen nẽbe.

⁶ Na lon Pilat oo dɔ ta 'nten ye, ndɨje ke i de kɨ dɔning Galilet a?

⁷ Lon ger kad Jeju i ko ɓekõt lo Herod ye, laa kɨ ro Herodt gog kɨta Herod kɨdɔn tɔ ndɨ ɓebo Jerusalemt ndɔgt'n non.

Jeju ɗa nõ Herodt

⁸ Lon Herod oo Jeju ye, ɗa ronel ngãi. Kɨtɔ kaglo ngãibe ndig kɨ n'ooa kɨta nyag ngãibe ĩn oo dɔat; nda kamɨnt kad kɨ n'oo Jeju ɗa nya mad kɨ ya.

⁹ Herod ndɨje tag ngãibe na Jeju tur al.

¹⁰ Na ngéjanyamosɨkadkari kɨbog kɨ ngéndoo Maktubg ɗa unɨn dɔ Jeju kɨ rotɨngad.

¹¹ Herod kɨ ngéɗɔɔg lon telɨna nya kɨ pãbet, gon dɔat na lana kub kɨmaj ngãi. Na tel laa kɨ ro Pilat't gog.

¹² Kam ndɔt'n non Herod kɨ Pilat telɨn ne namna, kɨta maɗi, ndoor i kɨnadt.

Gangɨn ta koi dɔ Jejut

¹³ Pilat kun ngéjamosɨ kadkarig kɨ mbaiɓeg kɨ deg kɨnat.

¹⁴ Eld an: I ɗen kɨ de'n ɗan romt tit de kɨ ngesɨla deg kad taanɗɔɔ, na oon maj, m'nder girra nõsɨt, na m'ngaa ta mad dɔat al tɔ.

¹⁵ Herod kaa ngah ta mad dɔat al, tel la sia kɨ gog rojt. Oon maj de'n ɗan ɗa nya mad kɨ asɨ koi al.

¹⁶ Kɨtɔ 'nten m'a mad ndana kɨ ndeh n'a m'ɔrra.

¹⁷ Kɨtɔ ndɔ ɗa nah Pakɨ kɨɗen, kari na a ɔrrɨn dedangãi kɨɗa.

¹⁸ Na deg tube unɨn ndid kon ne anan: I tɔlɨn de'n ɗan, na ɔrr Barabas adj.

¹⁹ Barabas i de'n lana dangait, kɨta lon deg ndun ɗɔɔ kam ɓet ndoorɨn ne romag ye, tɔl de.

²⁰ Pilat ndig kɨ n'ɔrr Jeju, kɨta 'nten tel eld ta gog ɓaitɔ.

²¹ Deg kon kɨ tɔgd kɨtɔi anan: I gaa kagdosɨt. I gaa kagdosɨt.

²² Pilat eld ta kɨkõmɨta, an: Kɨtɔɗi? Ɗi kɨmajal de'n ɗan ɗa a? M'ngaa ta mad kɨ asɨ koi dɔat al; m'a mad ndana kɨ ndeh, na m'a m'ɔrra.

²³ Na ɔsɨna tõtõ kɨ ndid kɨbo, ndɨjena kɨ gana kagdosɨt, dumɨn dɔ Pilat kɨ ndid kɨbo'n kon ne.

²⁴ Pilat gangta kɨ ɗan nya'n kɔna.

²⁵ De'n lana dangait kɨta ɗɔɔ kɨ ndu kɨ tɔl de, ad i de'n ndɨjena ye ɔrra na la Jeju jidt kad ɗan sia kɨgo ndigt lod.

Gan Jeju kagdosɨt

²⁶ Lon ndɨ awɨn kɨ Jeju ye, ndɔdɨn de mad kɨ dɔning Sirent, tɔa i Simõ, ɓai ndɔɔt ndɨ ɗe kam ɓet, hɔna lan kagdosɨ dɔat kad to ndulon go Jeju.

²⁷ Bakad deg koosɨg a ndulon goa kɨ dekɨdẽg tɔ, ĩgɨn a tɨgan kad'd a udɨn wi kɨ tɔa.

²⁸ Jeju mbel kɨ rodt an: Ngan kɨdẽg kɨ Jerusalem, ot nõmɨn, na i non rosɨ kɨ ngansɨg.

²⁹ Kɨtɔ oon maj, ndɔg a ɗen nõ ĩn a elɨnt anan: Ngeronel la i kujdekɨdẽ ye, ngéronel la ĩn dekɨdẽg'n oojɨn nja kɨɗa al, kɨ ĩgɨn lan mba ta ngont ad il al tɔ.

³⁰ Kamla a mbã girr kel mbalbog kɨ son kɨ dɔdt. Kɨ doorlog utɨn dɔd.

³¹ Kɨtɔ ĩla ɗan nyag 'nten lon kag i mbool ɓaitɔ a ne, ɗi a ɗa nya lon kag ĩn kɨ tut a?

³² Ɔrrɨn ngéɗamajal madg joo tɔ, kad kɨ'n tɔlɨnd nat kɨ Jeju.

³³ Lon ɗen lot'n a kunɨna ka dɔ ye, nu la gana kagdosɨt nat kɨ ngéɗamajal kɨ joo'n non, kɨkɨɗa ko kõat kɨ mad ɗa ko gelat.

³⁴ Jeju el an: Bɔw i nyàgo majal lod kɔ; kɨta gerɨn nya'n ɗa ɗan al. Deg kegɨn kubg loa yan yuk dɔt.

³⁵ Deg lan na nat ɗa oon, na mbaiɓeg lo Juipg telɨn Jeju nya got anan: Aj deg madg, ĩla i Krist kɨ mbed lo Luwah a ne, kɨ aj ron.

³⁶ Ngeɗɔɔg tɔ ɗa gon dɔat, awɨn roat nderbe ɗa lan kasɨnduu kɨmasɨ kɨ dɔat,

³⁷ anan: Ĩla ĩ Ngar lo Juipg a ne, aj roi.

³⁸ Maktub mad kɨ ndang i dɔat dõ titbe. Ĩn ɗan i Ngar lo Juipg.

³⁹ Kɨkɨɗa ku ngeɗamajalgt'n non ĩgɨn gand dõ ye, elta kɨmal an: I Krist ale? Aj roi kɨ jĩ tu.

⁴⁰ Na kɨmad un tan ndánga'n an: Mbã Luwah kaa i ɓoola ale?

⁴¹ El tɔ an: Na rota kɨ dɔjt i goɗobat kɨta kɨ ɗa kɨ taa bajij ĩn asɨ ta nyaɗaj; na de'n ɗan ɗa nya mad kɨgoɗobat al al.

⁴² El Jeju an: Bɨraɓe, i ga kami dɔmt lon i ɗe kɨ kõɓe loi.

⁴³ Jeju ela an: Rota la m'ndɨ m'eli ye: Ɓola a i ndɨ sem kam Paradisɨt.

Jeju oi kagdosɨt

⁴⁴ Nãi nderbe kad kàd ɗadenɓet, til ut dɔning kɨtaagbe mbã kàd norrjin.

⁴⁵ Til ut kum kàd, ad lo duw dɔningt kɨtaagbe; kubganglo kam kuj ndub Luwaht til dene joo.

⁴⁶ Jeju ko kɨ ndin kɨbobe an: Bɔwm m'ndɨ m'la ndilɨm kam jiit. Lon elta 'nten ye, ad ndilɨn tee.

⁴⁷ Lon bɨradɔ ngéɗɔɔg oo nya'n ɗa nya ye, ɔsɨgon Luwah an: Rota de'n ɗan i de kɨdenesew.

⁴⁸ Koosɨdeg tube'n kawɨn na kɨ nat kad kɨ n'oon nyag'n non ye, lon oon nyag'n ɗan nya ye, tel gan gud.

⁴⁹ Nam Jejug tube kɨ dekɨdẽg'n ndulon goa ko dɔning Galilet tɔ ye, ɗan sãi ɗa oon nyag'n non.

Duwɨn Jeju bulombalt

⁵⁰ De mad ndɨ nõ tɔa i Jojep i kɨkɨɗa ku ngékoogotat lo Juipg, i de kɨmaj, i de kɨdenesew tɔ,

⁵¹ ɓe loa i Arimate kam dɔningt lo Juipg. De'n non la kɔn ta kɔjt lo ngekoogota kɨ nyaɗad al, ndɨ ngoo kõɓe lo Luwah keɗengẽ.

⁵² Jojep aw ro Pilat't kɔa dãro Jeju.

⁵³ Ɗisɨ sia kagdosɨt kɨ ber. Duloa kɨ kub nĩn; laa kam ɓet'n urr kam mbalt, i ɓe kɨ lan det nja kɨɗa al.

⁵⁴ I ndɔ ɗago nyag, kɨta ndɔ taakò i nderbe.

⁵⁵ Dekɨdẽg'n ɗen ko Galilet nat kɨ Jeju ye, ndulon go Jojep, oon ɓe nĩn ke titbãi lan Jeju tit a?

⁵⁶ Kamla telɨn kɨɓe ɗan go nyakɨkootg kɨ yib kɨ kootmbĩ. Taan koo ndɔ taakòt kɨgo Mberkɨndat.