Hoita kɨmaj lo Jeju Krist'n Luk ndang 22 - Maktub Ta Kumkajir

Kɨbog lo Juipg sahn ɗob tɔl Jeju

¹ Ɗa nah bɨna kɨkanj berrkasɨ kɨ a kunɨna Pakɨ i nderbe.

² Ngéjamosɨkadkari kɨbog kɨ ngéndoo Maktubg sahn ɗob kɨ'n tɔlɨn Jeju, na ndɨ ɓoolɨn deg.

Judas ndig la Jeju ji madngétaagt

³ Judas'n tɔa kɨmad i Iskariot, i kɨkɨɗa ku ngéndoogt kɨkɨlah gidaijoo lo Jeju. Sitan and kamat.

⁴ Titbe aw, ɔj ta kɨ ngéjanyamosɨkadkari kɨbog, kɨ bɨradɔ ngéɗɔɔg ĩgɨn ĩn ngéngom kuj ndub Luwah dɔ nyat'n n'an ɗa kad'n lan Jeju jidt.

⁵ Deg'n non ɗan ronel dɔt, unɨn kɔd adɨna anan: J'a jadi nar.

⁶ Judas ndig dɔt, aw sah ɗob kad'n lan Jeju jidt kɨkanj kad deg gerɨn.

Jeju el ngéndoog lon kad ɗan go Pakɨ

⁷ Ndɔ ɗa nah bɨna kɨkanj berrkasɨ ɗe woi. Kari na a jan ngon bat Pakɨt ndɔt'n non.

⁸ Jeju la Pierr kɨ Jã an: Awɨn, i ɗan go Pakɨ kɨtaj, kɨtakad kɨ san.

⁹ Elɨna anan: Lo kɨɗen i ndig kad kɨ ɗat a?

¹⁰ Eld an: Oon maj. Lon a andɨn kam ɓet ye, de mad a ndɔdsɨ, de'n non a to man kɨ ɓir. I ndulon goa mbã kɨ kam kujt'n a andt.

¹¹ A elɨn ngekuj anan: Ngendoo deg ndɨjei: Ke kuj mbahg'n m'a m'sa Pakɨt tit nat kɨ ngéndoog lom i ɗa a?

¹² A dasɨ kuj mad kɨbo kɨ dõ, ĩn ɗan goa woi; nyag tube ĩn kamt kɨta ɗa nah Pakɨ.

¹³ Awɨn, a kɨ ngahn nyag tit'n eldɨn ye be, ɗan go Pakɨ tit nõbe.

Jeju la girr kawna'n tɔa i mburr nam kɨhɔ kɨ Bɨraɓe

¹⁴ Lon dɔkàd asɨ woi ye, Jeju ndɨ ber ta nyasat sed ngombangkɨlag.

¹⁵ Eld an: M'ge ngãi kɨ m'sa Pakɨ 'nten nat sesɨ kamtã la kɨ m'dai yom kɨ kõ ye.

¹⁶ Kɨtɔ m'elsɨ m'a m'sa gog al ta, mbã kad girra kɨ jeje tee kam kõɓet lo Luwah.

¹⁷ Kamla Jeju taa kop, ɗa mersi Luwah, na eld an: I taan, 'nten i kegɨn na kɨnasɨt.

¹⁸ Kɨtɔ m'elsɨ, nẽbekɨnõt, m'a m'ãi man kand nduu gog al, mbã kõɓe lo Luwah ɗe kamtã.

¹⁹ Kamla un bɨna ɗa mersi hɔ tet ad'd an: 'Nten i dãrom ĩn adɨn kɨtɔsɨ. I ɗan nya 'nten kad i nya ndahkamdɔt.

²⁰ Titbe tɔ la un kop go nyasat, an: Kop 'nten i kij kunkɔ kam mosɨmt, ĩn i kɨ kũ kɔ kɨtɔsɨ.

²¹ Na oon. Ji de'n a lam ji madngétagt i nat sem dɔ tabɨlt.

²² Kɨtɔ rota Ngon de ndɨ aw lo koit tit'n Luwah ndan kete. Na beto lo de'n a laa ji madngétaagt.

²³ Kamla mban girr ndɨjen na kɨnadt, ke nõ kudt a ɗa nya'n non.

Nõ i kɨbo tɔi

²⁴ Gakɨna ɓai dan ngéndoogt lo Jeju kad n'oon ke nõ i kɨbo tɔi kudt.

²⁵ Jeju eld an: Ngarg lo girrdeg kɨ dang dang ndɨ õnɓe dɔdt, awɨn kɨ tɔg dɔdt tɔ. Be kaa ne, ndɨ geen kad kunɨnd ngeɗamaj.

²⁶ Na ĩn kɨ i ɗan titbe al. De'n i kɨbo tɔi kusɨt a ne, kɨ i tit kɨ ngon kɨdu be; de'n i bɨradɔ a ne, i tit ɓer be.

²⁷ Kɨtɔ nõ i kɨbo tɔi a? De kɨbo tɔi i de'n ndɨ ta nyasat e? Ke de'n ndɨ ɗa ɓer ada a? I de'n ndɨ ta nyasat ale? Na mĩ taa ne, mĩ dãsɨt tit ngeɗa ɓer be.

²⁸ Ĩla i hɔn tɔgsɨ ba sem kam nágt'n namɨn a ne,

²⁹ mĩ tɔ, m'a m'adsɨ tɔg kõɓe tit kɨ Bɔwm admɨn tɔg kõɓe ye be ho.

³⁰ Kɨtɔkad a i san nya, a ãin dɔ tabɨlt lom, kam kõɓet lom, a i ndɨn dɔ pong gangtagt kad i gangɨn ta dɔ girr Israelgt kɨkɨlah gidaijoo.

Jeju elta kete an Pierr a maj ta gerɨn

³¹ Simõ, Simõ, oo maj, Sɨtan kɔ kɨ'n ngah ta ɗob siasɨ tube tit'n de a sian kum nyako be.

³² Na m'kɔ Luwah kɨtɔi ĩ Pierr, kɨtakad kadkam loi du al. Ĩ tɔ lon i tel kɨromt a ne, sumba kad i ɗa kɨ ngankõig kad hɔntɔgd bá.

³³ Pierr ela an: Bɨraɓe m'ɗa rom woi kɨ m'aw dangait sei, ke koi kaa m'a mõi sei.

³⁴ Jeju ela an: M'eli Pierr, ɓone kɨnja a ko al ɓaitɔ a ne, a i maj ta gerɨm nja mɨta.

Ɗa goro kɨta ɗɔɔ

³⁵ Jeju eld tɔ an: Lon m'lasɨ kɨkanj ngong nar, kɨkanj ɓɔl, kɨkanj sanja ye, nya mad nalsɨ a? Turɨna anan: Kɨ nal nya mad al.

³⁶ Jeju eld an: Tajigtne de'n aw kɨ ngong nar a ne, ad un. Titbe tɔ ngeɓɔl kɨ un ɓɔl lon jint ho, na de'n kiyaɗɔɔ loa goto a ne, kɨ ɗaw kub lon kɔ ndugon kiyaɗɔɔ.

³⁷ Kɨtɔ m'ndɨ m'elsɨ. Ta 'nten, ĩn ndangɨn kam Maktubt: Tɨdana nat kɨ ngétɔidɔtag ye, kari na a tɔlɨn taa romt. Kɨtɔ nyag'n Luwah ndah dɔmt ndɨn ta tɔl kondt.

³⁸ Ngéndoog loa elɨna anan: Bɨraɓe oo kiyaɗɔɔ joo la eld an: Asɨ.

Jeju elta kɨ Luwah lot kɨ tɔa i Jesemani

³⁹ Jeju tee aw dɔ mbalbo kag olibgt kɨgo nyabelɓet lon, ngéndoog loa ndulon goa.

⁴⁰ Lon tee lot'n non ye, eld an: Elɨn ta kɨ Luwah, i kɔn ne kɨtakad i son al lon násɨn.

⁴¹ Jeju tɔ ron rodt ɗoba wo asɨ la mbal, ɔsɨ gojɨn ber, elta kɨ Luwah,

⁴² an: Bɔwm, ĩla i ndig a ne, un kop 'nten romt kɔ, na m'ndig kɨ m'ɗa kɨgo ndigt lom al, na kɨgo ndigt loi tã.

⁴³ Kamla malaika mad tee hɔi kɨ roat ko dõ dɔrãt, ɗa ada ngang.

⁴⁴ Kɨtɔ dai yon kam keltat kɨ Luwah kɨ rotĩn ad tutoa tel tit kɔwɨr mosɨ kɨ tuso dodɔ dɔningt be.

⁴⁵ Lon ɓai lo keltat kɨ Luwah ye, ɗe ro ngéndoogt lon, ngahd to ɓin kɨta kamkil.

⁴⁶ Eld an: Kɨtɔɗi i to i ɓin ne a? I ɓain dõ elɨn ta kɨ Luwah kɨtakad i son al lon násɨn.

Judas la Jeju ji madngétagt ad hɔna

⁴⁷ Ɗa elta ɓaitɔ la, deg koosɨg ɗen. De mad kɨɗa ku ngéndoog kɨkɨlah gidaijoo'n a kunɨna Judas ɔrrd ta ɗob. Ɗe nderbe kɨ ro Jejut, ɗaa lapia njuta.

⁴⁸ Na Jeju ela an: Judas, kɨ lapia njuta la i ndɨ lan Ngon de ji madngétagt yo?

⁴⁹ Lon ngéndoog'n ɗan gugɨn dɔ Jeju oon nya'n ndɨ ɗa nya ye, anan: Bɨraɓe kaa kɨ ga kɨ kiyaɗɔɔ?

⁵⁰ Kɨɗa ku ngéndoogt ga mbi ɓer lo bɨra ngejanyamosɨkadkari kɨbo ko kõat ga gang.

⁵¹ Na Jeju el an: Asɨ ta. Ɔd mbia yootan.

⁵² Kamla el ngéjanyamosɨkadkari kɨbog, kɨ bɨradɔ ngéɗɔɔg, ĩgɨn ĩn ngéngom kuj ndub Luwah, kɨ kɨbog lo Juipg ĩgɨn ɗen kɨ dɔat ye an: I teen kɨ kiyaɗɔɔ kɨ gɔlg tit deg kɨ ngéhɔ de kɨ ngekumɗob be e?

⁵³ Kɨ ndɔg tube mĩ sesɨ nat kam kuj ndub Luwaht, na i sahn ɗob hɔm al. Na kaglo 'nten i kaglo losɨ kɨ tɔg til.

Pierr maj ta ger Jeju

⁵⁴ Deg'n non hɔn Jeju, awɨn sia ɓe lo bɨra ngejanyamosɨkadkari, na Pierr a ndulo goa ko sãi.

⁵⁵ Lon ɗan horr natɓet ye, Pierr aw ndɨ dan degt nõ.

⁵⁶ Ɓer mad kɨdẽ ooa ndɨ tuw horr, tɔrr kumɨn kɨ dɔat, an: De'n ndɨn i sia nat.

⁵⁷ Na Pierr maj ta an: Dekɨdẽ m'ger de'n non al.

⁵⁸ Goot gog jenbe, de mad ooa an: Ĩ kudt ho. Na Pierr an: Dekɨdɨngã, m'gotot.

⁵⁹ Lon kaglo tɔi asɨ dɔkàd kɨɗa ye, de mad tɔ hɔ tan ngang an: Rota de'n ndɨn i nat sia kɨta i de kɨ Galilet.

⁶⁰ Na Pierr el an: Dekɨdɨngã m'ger ta'n i ɗa el al. Tentenbe lon ndɨ elta ɓaitɔ kɨnja kɔ.

⁶¹ Bɨraɓe mbel, la kumɨn dɔ Pierrt. Pierr tɔ ga kamɨn dɔ tat'n Bɨraɓe ela, an: Ɓone kɨnja a ko kete al, na a i maj ta gerɨm nja mɨta.

⁶² Tee aw nõ kɨ n'oi.

⁶³ Deg'n hɔn Jeju ye, ɗa ɔlɨna, ɗa tɨndana.

⁶⁴ Ndomɨn kuma, na ɗa ndɨjena anan: I ndɔ ndil, nõ ndai a?

⁶⁵ Elɨna ta kɨ mal madg ngãibe tɔ.

Jeju ɗa nõ ngékoogotagt

⁶⁶ Lon loti woi ye, ɓut kɨbog lo deg sed ngéjanyamosɨkadkari kɨbog, kɨ ngéndoo Maktubg kawɨn na kɨnat, ad ɗen kɨ Jeju nõ ngekoogotagt lod.

⁶⁷ Elɨna anan: Ĩla ĩ Krist a ne, elj. Na Jeju eld an: Ke m'elsɨ kaa ne, a i admɨn kamsɨ al.

⁶⁸ Na ĩla m'ndɨjesɨ ta mad a ne, a i turmɨn al.

⁶⁹ Nẽbekɨnõt a oon Ngon de ndɨ ko jikõ tɔg Luwaht.

⁷⁰ Ĩn tube anan: Ad ĩ Ngon Luwah a? Eld an: Ĩ elɨn anan i mĩ.

⁷¹ Kamla anan: Kɨ ge naj kɨ ma mad kɨɗang gog tɔ al. Jĩ kɨdɔj j'oo ta kɨ taat.