Hoita kɨmaj lo Jeju Krist'n Luk ndang 21 - Maktub Ta Kumkajir

Jeju ɔsɨgon dekɨdẽ ngengawkoi'n ad Luwah nyaɓetron tube

¹ Jeju un kumɨn oon ngényag'n ɗa lan kadkarig lod kam sund nart.

² Oo ngengawkoi kɨ ngendo tɔ ɗe la gursɨ joo kamt.

³ Jeju el an: Rota la m'ndɨ m'elsɨ ye; nya'n ngengawkoi kɨ ngendo'n non la kam sundt ye, tɔi lodg tube,

⁴ kɨta ĩgɨn non tube ɔin kam nyamajgt lod kɨ ngãi la lan kadkarit ye, na dekɨdẽ'n non ɔi kam nyandot lon la ad nya tube'n to jiat kɨta ɓet'n ron.

Jeju elta kete dɔ nujt'n a nujɨn kuj ndub Luwah

⁵ Deg madg ɗa elɨn na ta dɔ mbalgt kɨmaj'n ɗan ne kuj ndub Luwah kɨ kadkarig'n deg lan adɨn Luwah tɔ, na Jeju el an:

⁶ Nyag 'nten tube ĩgɨn i ndɨ oon ye, ndɔ madg a ɗen nõ, ĩn a nyan mbal mad kɨɗa dɔ madt al, na a tɔsɨ tɨland tube.

Yaɓood kamkil kɨ darondo

⁷ Ndɨjena anan: Ngendoo deg, nyag'n non a ɗan nya ɗɨngãt a? Nyakɔj kɨ ɗi tɔ a ɗa nya kad deg gerɨn ne ndɔ ɗe woi, kad nyag'n non ɗan nya a?

⁸ Jeju turd an: Oon maj ot kad'n de mad goolsɨ. Kɨtɔ deg ngãibe a unɨn tɔm ɗen ne, anan: Mĩ la mĩ Krist ye, a elɨn tɔ anan: kaglo i nderbe. Ot ndulon go deg'n non.

⁹ Lon oon hoi ɗɔɔg kɨ kah ɗɔɔg ye, ot kad'n ndilsɨ tee saw, kɨta nyag'n non kari na a ɗan nya kamtã na dɔboia nãi ɓaitɔ.

¹⁰ Kamla eld an: Girrdeg madg a ɓai ɗɔɔn kɨ girrdeg madg, kõɓe mad a ɓai ɗɔɔ kɨ kõɓe mad,

¹¹ yee dɔning kɨbobog, kɨ ɓo kɨ õ, kɨ yokoosɨg a son kɨ log kɨ dang dang, nyag kɨkootɓool kɨ ga deg kɨngasat a ɗan nya, nya kɔjg kɨbobo a teen ko kɨ dõ dɔrãt.

¹² Na kete nõ nyagt 'nten tube, a hɔsɨn, a dan rosɨ ndo, a lasɨn ji kɨbogt kɨ kuj kawnat lo Juipg, a lasɨn dangait, a awɨn sesɨ nõ ngargt kɨ ngékõɓeg kɨtatɔm.

¹³ Nyag 'nten a teen dɔsɨt i kɨtakad i ngahn ne kaglo kad i man ne naj.

¹⁴ Kɨtɔ 'nten i ndan kamsɨt kad i soolɨn ngãi dɔ tatɨn a elɨn ɔrrɨn ne ta dɔsɨt al.

¹⁵ Kɨtɔ mĩ m'a m'adsɨ ta kad elɨn m'a m'adsɨ goosɨ kelta na ngéndoorsɨg a asɨn maj sesɨ ta al ho a asɨn tursɨ ta al ho tɔ.

¹⁶ Ngékoojsɨg kɨ ngankõsɨg, kɨ noojsɨg kɨ namsɨg a lasɨn ji degt, na a tɔlɨn kɨmadg kusɨt.

¹⁷ Deg tube a mbetsɨn kɨtatɔm,

¹⁸ na ke bisɨdɔsɨ kɨkɨɗa kaa a tuj al.

¹⁹ Kɨ lo hɔtɔgbat losɨ la a ajɨn ne rosɨ ye.

Jeju elta dɔ nujt'n a nujɨn ɓebo Jerusalem

²⁰ Na lon a oon ngéɗɔɔg lan na gugɨn dɔ ɓebo Jerusalem a ne, a i gerɨn tela gotɓe i nderbe.

²¹ Kamla ad ĩgɨn ndɨn dɔning Jude kɨ ãin na kɨ kam mbalgt, ĩgɨn ndɨn ngawden Jerusalemt kɨ teen kɨtɨga tɔ. Na ĩgɨn ndɨn ngan ɓegt kɨ kadat, ye kɨ ot kandɨn kamt.

²² Kɨtɔ ndɔg'n non ĩn ndɔ nda ngɨra kɨ a ɗen kad tɔlɨn ne ta tag tube'n ndangɨn kam Maktubt.

²³ Na dekɨdẽ kokemg kɨ ĩgɨn ndɨ adɨn mba ngang kam ndɔgt'n non ye, a i nyakookumtondo kɨ tɔd, kɨta kamkɔl kɨbobe a ɗe dɔningt 'nten, na wong kɨ tɔl sɔkɨr lo Luwah a ɗe dɔ degt'n ɗan tɔ.

²⁴ A tɔlɨnd kɨ kiyaɗɔɔ, girrdeg kɨ dang dang a hɔnd awɨn sed ɓert, deg kɨ gerɨn Luwah al a nujɨn ɓebo Jerusalem mbã kad kaglo lod asɨn.

Ngon de a tel a ɗe

²⁵ Deg a oon nyakɔjg kam kàdt kɨ nah kɨ kɨmẽg, kam kɨ gang ngalang a ɗa girrdeg kɨ dang dang dɔningt. Kamd a dad ta paa tɔ, kɨta bahbo kɨ a ko wu wu, mang a ɓain ngãi.

²⁶ Ɓool a tɔl deg sɔkɨr, ad rod oi siw lo ngoo nyagt'n ndɨ ɗen dɔ dɔningt, kɨta a yeen tɔgg kɨ kam dɔrãt dõ.

²⁷ Kamla a oon Ngon de ndɨ ɗe kam kilndiit nat kɨ tɔg kunj kɨɗangeɗeng kɨbobe.

²⁸ Na lon nyag'n non mbã girr ɗa nya a ne, i ɓai i ɗan dõ, oon lo kɨ dõ kɨta Luwah a ad i ngahn dɔsɨ nderbe.

Ta nyandoo dɔ kag mbaiɓoodt

²⁹ Jeju eld terrta mad an: Oon kag mbaiɓoodg kɨ kagg tube.

³⁰ Lon ɗa ɓan mbid a ne, kɨgo koot'n oon nõ i gerɨn ɓet kad ɓar kɨkud i nderbe.

³¹ Titbe tɔ ĩn, lon oon nyag'n non ndɨ ɗan nya a ne, kɨ i gerɨn ne kõɓe lo Luwah i nderbe.

³² Rota la m'ndɨ m'elsɨ ye, deg kɨkaglot'n ɗan a tɔin kɔ al bat, mbã kad nyag'n non tube ɗan nya kamtã.

³³ Dɔrã kɨ dɔning a tɔin kɔ, na tag lom a tɔin kɔ al bat.

Kari na deg lo Luwah a oon go rod maj

³⁴ Oon go rosɨ maj, na ɓeta sanyaboot, ke kasɨ kɨɗa, ke sool ĩn deg ndɨ soolɨn dɔ nyaɓetrot adɨn kamsɨ oi siw, ad ndɔ'n non ɓasɨ ɓer bɔp,

³⁵ tit gum be kɨta titbe la a ɓan deg tube ngéndɨ dɔningt kɨtaagbe.

³⁶ Kɨtɔ 'nten, dɔ kaglo kɨɗen kaa i ndɨn dɔgt, i hɔn kelta kɨ Luwah, kɨtakad i ngahn ne tɔg tee ta nyagt tube'n a ɗan nya, kad i ɗan ne nõ Ngon det tɔ.

³⁷ Jeju ndɨ ndoo deg kàda kam kuj ndub Luwaht, na tee ndɔ aw to dɔ mbalbot'n tɔa i mbalbo kagbirg.

³⁸ Deg tube ndɨ awɨn kɨroat kɨsĩ kam kuj ndub Luwaht kad kɨ n'oon dɔ ta loa.