Hoita kɨmaj lo Jeju Krist'n Luk ndang 20 - Maktub Ta Kumkajir

Kɨbog lo Juipg ndɨjen Jeju ta dɔ tɔgat

¹ Ndɔ mad kam ndɔgt'n non, lon Jeju ndɨ ndoo deg kam kuj ndub Luwaht, na ndɨ la mber hoita kɨmaj ye, ngéjanyamosɨkadkari kɨbog, kɨ ngéndang maktubg sed kɨbog lo Juipg ɓain kɨ dɔat.

² Elɨna anan: Elj. Kɨ tɔg kɨ ɗa i ndɨ ɗan nyag'n non a? Ke i nõ adi tɔg 'nten a?

³ Jeju turd an: Mĩ tɔ m'a m'ndɨjesɨ ta mad.

⁴ Baptem lo Jã ye, i ko kɨ dõ dɔrãt e? Ke i kokɨro degt a?

⁵ Na ɔjɨn na ta kudt be anan: Ĩla kɨ j'an i ko kɨ dõ dɔrãt a ne, a el an: Kɨtɔɗi adɨna ne kamsɨ al a?

⁶ Na ĩla kɨ j'an i kokɨro degt a ne; deg tube a tɨlajɨn kɨ mbal; kɨta deg gerɨn ɓet Jã i ngekelta kɨ ta Luwaht.

⁷ Taa ne turɨn Jeju anan: Kɨ ger ko lon teet al.

⁸ Na Jeju eld an: Mĩ tɔ m'a m'elsɨ kɨ tɔg kɨ ɗi m'ndɨ m'ɗan nyag'n non al.

Terrta dɔ ndɔɔ nduut kɨ deg'n ɗan kɨlat

⁹ Kamla mbagɨr kel terrta 'nten deg, an: De mad hɔ ndɔɔ nduu, la ji deg madgt kɨ ndɔɔn, na aw mbah dɔningt mad ad kaga tɔi.

¹⁰ Lon dɔ nah ja kand nduu asɨ woi ye, la ɓer mad ro ngéndɔɔgt'n non kad ta gaj nyandɔɔ lon. Na ngéndɔɔg ndan ɓer'n non mbukɨ mbukɨ kamla tel lana kɨgog jia kari.

¹¹ Tel la ɓer mad kɨ rodt gog, ĩ tɔ a kɨ ndana mbukɨ mbukɨ lan rosɔl dɔat, na lana kɨ gog jia kari.

¹² Tel la ɓer kɨ ngekõmɨta, ĩ tɔ a kɨ adɨna doo, na tuɓana.

¹³ Bɨraɓe kɨ ngendɔɔ el an: Kam m'ɗa ɗi? M'am m'la ngonɨm kɨ ngetar lom; maja lon oona a ne, a ɓoolɨn ndila.

¹⁴ Na lon ngéndɔɔg oon ngon'n non ndɨ ɗe kɨ dɔdt ye, ɔjɨn na ta kɨnadt anan: Ĩn ɗan la i ngekõnduba ye, ad kɨ tɔlɨna kɨtakad nyanduba loa tel loj.

¹⁵ Taa ne, ɔrrɨna kɨ tɨga gid ndɔɔt tɔlɨna. Bɨraɓe kɨ ngendɔɔ ye, ɗi a ɗa sed a?

¹⁶ A ɗe nuj ngéndɔɔg'n non kɔ, na la ndɔɔ nduu ji degt kɨɗang. Lon deg oon dɔ ta 'nten ye anan: Be al.

¹⁷ Na Jeju nɔld mbet't an: Girr ta 'nten kɨ ndang kam maktubt lo Luwah i ɗi a? Mbal'n ngéɗakuj mbetɨna, nõ la tel bɨradɔ kuj kɨ dõ ye.

¹⁸ Dekɨɗen'n a so dõ mbalt'n non a ne, a tet ɗelɗel, na dekɨɗen'n mbal'n non a so dɔat a ne, a rigɨja.

Deg madg ndɨjen Jeju ta dɔ ba lambot

¹⁹ Ngéndang maktubg kɨ ngéjanyamosɨkadkari kɨbog gerɨn ɓet Jeju el terrta 'nten dan dɔd; kɨta 'nten sahn kɨ'n hɔna, na ɓoolɨn deg.

²⁰ Ndan kumd go Jeju tɔ, na lan ngéndalo ĩgɨn ɗan rod tit deg kɨdenesew be, kad kɨ'n ɓana kɨ gum ta kɨ taat kad kɨ'n lana ji ngekõɓet'n aw kɨ tɔg ho õɓe dɔ dɔningt ho.

²¹ Deg'n non ndɨjena anan: Ngendooj kɨ ger i ndɨ elta kɨ dene, i ndɨ ndoo deg goɗobat tɔ, i ndɨ ɔrr de dene al, na i ndɨ ndoo deg ɗob lo Luwah kɨgo rotat.

²² I goɗobat rojt kad jad lambo Sejar a? Ke i goɗobat al.

²³ Jeju ger ndo kɨɓa lod ɓet, ad eld an:

²⁴ Admɨn gursɨ kɨɗa m'oo, ndil dɔ de, kɨ ta kɨndang dɔt 'nten ye, i lo nõ a? Elɨna anan: I lo Sejar.

²⁵ Kamla Jeju eld an: Nya'n i lo Sejar taa adɨn Sejar, na nya'n i lo Luwah a ne, adɨn Luwah.

²⁶ Deg'n ɗa oon dɔ ta loa ye, de kɨ asɨ hɔa kɨ ta mad goto, ta kɨtur loa yad ngãi, ad ndɨn god mbo.

Sadukig ndɨjen Jeju ta dɔ ɓai ngékoigt

²⁷ Kɨmadg ku Sadukigt ɗen ro Jejut. Ĩgɨn non majɨn ta ɓai ngékoig ndɨjena anan:

²⁸ Ngendoodeg, Moij ndang ta 'nten kam Maktubt adj, an: Ĩla ngonkõ de mad oi, na nya nẽn kɨkanj ngon a ne, kɨ ngonkõa taa nẽa, ndan koh ngonkõ.

²⁹ Tag maɗi ngankõnag tanãimɨta ĩn nõ; kɨdasa taa dekɨdẽ, na oi kanj ngon.

³⁰ Kɨ ngekõ joo taa dekɨdẽ'n non tɔ, na oi kanj ngon.

³¹ Kɨ ngekõmɨta tɔ taa, titbe tɔ la tube tanãimɨta taan dekɨdẽ'n non, na oin kɨkanj ngang.

³² Godt gog dekɨdẽ ɗe oi ho.

³³ Ndɔ ɓai ngékoit ye, a i nẽ nõ kudt a? Kɨtɔ ĩn tanãimɨta la taana nẽdt ye.

³⁴ Jeju eld an: Deg kɨ kaglot'n ɗan ndɨ taan na.

³⁵ Na ĩgɨn oond ad asɨn ta ɓai ku ngékoigt tee koht kɨ nu ye, a taan na al.

³⁶ Asɨn koi gog al tɔ kɨta a asɨn na kɨ malaikag. Ĩn ngan Luwah tɔ tit kan ĩn ne deg kɨ ngeɓai lo koit.

³⁷ Na ta dɔ ɓai deg lo koit ye, Moij ɔj ta 'nten kam Maktubt ad deg oon maj, dɔtat lo dungarr kɨ horr i kamt lon kunɨn Bɨraɓe, Luwah lo Abraham, kɨ Luwah lo Isaak, kɨ Luwah lo Jakob tɔ.

³⁸ Luwah i Luwah lo ngékoig al, na i Luwah lo ngékumkajɨrg kɨta deg tube ndɨn kɨ kumkajir nõ Luwaht.

³⁹ Kɨmadg ku ngéndoo deg maktubt turɨn anan: Ngendoo deg el maj.

⁴⁰ Kɨtɔ 'nten iren kamd kad ndɨjena ta dɔ nyat mad gog al ta.

Jeju ndɨje deg ta dɔ ngon Dabidt

⁴¹ Jeju eld an: Titbãi deg ndɨ anan Krist i ngon Dabid a?

⁴² Dabid kɨdɔn el kam maktub pagt an: Bɨraɓe el Bɨraɓe lom an: I ndɨ ko jikõmt,

⁴³ mbã kad m'tel madngétaig komber nda njait.

⁴⁴ Jeju el an: Dabid kuna Bɨraɓe. Ye titbãi i ngona a?

Jeju el deg kad oon go rod maj dɔ ngéndang Maktubt

⁴⁵ Lon deg tube ndɨ oon dɔ ta loa ɓaitɔ ye, Jeju el ngéndoog lon an:

⁴⁶ Oon go rosɨ maj kɨ ngéndoo maktubg, ngéla kubjig kɨ ngal, kɨ ngendɨg kad deg ɗand lapia kam sukɨgt tɔ, ĩn ngesah lo ndɨ kɨdasa kam kuj kawnat lo Juipg kɨ lo ndɨ de kɨbog lo mburr namt,

⁴⁷ ĩn ngétaa nyag lo ngéngawkoig, ĩn ngékelta ngãi, kad deg oond kad nĩn ngékelta kɨ Luwah, na i ndokum. Ĩgɨn non, takɨgang kɨ Luwah a gang dɔdt a i kɨkootɓool ngãi kɨ tɔi.